വ്യാജ വാഹന രജിസ്‌ട്രേഷന്‍ സര്‍ട്ടിഫിക്കറ്റ്: അന്വേഷണം നടത്തും

തിരുവനന്തപുരം: സംസ്ഥാനത്ത് വാഹന രജിസ്‌ട്രേഷന്‍ സര്‍ട്ടിഫിക്കറ്റുകള്‍ വ്യാജമായി നിര്‍മിക്കുന്നതിനെ കുറിച്ച് മോട്ടോര്‍വാഹന വകുപ്പിലെ ഉന്നത ഉദ്യോഗസ്ഥരെ ഉള്‍പ്പെടുത്തി വിശദമായ വകുപ്പുതല അന്വേഷണത്തിന്  ഗതാഗത മന്ത്രി ജോസ് തെറ്റയില്‍ ഉത്തരവിട്ടു. ഇതിനെപറ്റി സംസ്ഥാന പൊലീസിനെ കൊണ്ട് അന്വേഷണം നടത്താന്‍ ആഭ്യന്തര മന്ത്രിയോട് ഗതാഗതമന്ത്രി അഭ്യര്‍ഥിച്ചു. അന്വേഷണത്തിന് ആഭ്യന്തരമന്ത്രിയും നിര്‍ദേശം നല്‍കി. വകുപ്പ് ഉപയോഗിക്കുന്ന രജിസ്‌ട്രേഷന്‍ സര്‍ട്ടിഫിക്കറ്റില്‍ യു.വി പ്രിന്റിങ് മൈക്രോലൈന്‍, പെനിട്രേറ്റിങ് ഇങ്ക് ഉപയോഗിച്ചുള്ള നമ്പറിങ്, വോയ്ഡ് പാന്തോഗ്രാഫ് എന്നീ സെക്യൂരിറ്റി സംവിധാനങ്ങള്‍ ഉള്‍ക്കൊള്ളിച്ചിട്ടുണ്ട്.

സംശയമുള്ള കേസുകളില്‍ ഈ സംവിധാനങ്ങളുണ്ടോയെന്ന് പരിശോധിക്കാവുന്നതാണ്. ബാര്‍കോഡുപയോഗിച്ചും  സര്‍ട്ടിഫിക്കറ്റ് യാഥാര്‍ഥ്യമാണോയെന്നും പരിശോധിക്കാം. പതിച്ചിരിക്കുന്ന ഹോളോ ഗ്രാമിന്റെ വിശ്വാസ്യതയും പരിശോധിക്കേണ്ടതുണ്ട്. ഒരു വാഹനത്തെ സംബന്ധിച്ച അത്യാവശ്യ വിവരങ്ങള്‍ മൊബൈല്‍ ഫോണിലൂടെ MDV< വാഹനത്തിന്റെ നമ്പര്‍> എന്ന് 53725 എന്ന നമ്പറിലേക്ക് എസ്.എം.എസ് ചെയ്താല്‍ ലഭിക്കും. അങ്ങനെ സംശയാസ്‌പദമായ വാഹനങ്ങളുടെയും രേഖകളുടെയും നിജസ്ഥിതി അറിയാം.