തിരുവനന്തപുരം: പ്ലസ് വൺ സീറ്റ് ക്ഷാമം പരിഹരിക്കാൻ സീറ്റ് വർധനക്ക് അനുമതി നൽകി ഉത്തരവിറങ്ങി. നിലവിലുള്ള ബാച്ചുകളിൽ പത്ത് മുതൽ 20 ശതമാനം വരെ സീറ്റ് വർധനക്കാണ് അനുമതി. സീറ്റ് വർധനയിലൂടെയും പ്രതിസന്ധി പരിഹരിക്കാൻ സാധിച്ചില്ലെങ്കിൽ മാത്രം ആവശ്യമുള്ള ജില്ലകളിലെ സർക്കാർ ഹയർസെക്കൻഡറികളിൽ താൽക്കാലിക ബാച്ചുകൾ അനുവദിക്കാനും ഉത്തരവിൽ പറയുന്നു.
നേരത്തേ 20 ശതമാനം സീറ്റ് വർധന അനുവദിച്ച പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട്, തിരുവനന്തപുരം ജില്ലകളിൽ സീറ്റിെൻറ ആവശ്യകത ഉണ്ടാകുകയാണെങ്കിൽ സർക്കാർ ഹയർസെക്കൻഡറികളിൽ പത്ത് ശതമാനം കൂടി സീറ്റുവർധനക്കാണ് അനുമതി. ഇതേ ജില്ലകളിൽ അടിസ്ഥാന സൗകര്യമുള്ളതും അപേക്ഷിക്കുന്നതുമായ എയ്ഡഡ് ഹയർസെക്കൻഡറികളിലും അൺ എയ്ഡഡ് ഹയർസെക്കൻഡറികളിലും പത്ത് ശതമാനം സീറ്റിനും വർധനവിന് അനുമതിയുണ്ട്. നേരത്തേ ആനുപാതിക സീറ്റ് വർധന അനുവദിക്കാത്ത കൊല്ലം, ഇടുക്കി, ആലപ്പുഴ, പത്തനംതിട്ട, കോട്ടയം, തൃശൂർ, എറണാകുളം ജില്ലകളിൽ ആവശ്യകതയനുസരിച്ച് 20 ശതമാനംവരെ സീറ്റ് വർധിപ്പിക്കാനും അനുമതി നൽകി.
ഇൗ ജില്ലകളിലെ അടിസ്ഥാന സൗകര്യമുള്ളതും അപേക്ഷിക്കുന്നതുമായ എയ്ഡഡ് ഹയർസെക്കൻഡറികൾക്കും അൺ എയ്ഡഡ് ഹയർസെക്കൻഡറികൾക്കും 20 ശതമാനം സീറ്റ് വർധനക്കും അനുമതിയുണ്ട്. സർക്കാർ ഹയർസെക്കൻഡറികളിൽ നാമമാത്ര വിദ്യാർഥികളുള്ള ബാച്ചുകൾ കണ്ടെത്തിയാൽ അവ ആവശ്യമുള്ള ജില്ലകളിലേക്ക് മാറ്റാം. പ്രതിസന്ധി സീറ്റ് വർധനയിലൂടെ പരിഹരിക്കുന്നില്ലെങ്കിൽ മാത്രം ആവശ്യകതയനുസരിച്ച് സർക്കാർ ഹയർസെക്കൻഡറികളിൽ താൽക്കാലിക ബാച്ചുകൾ അനുവദിക്കാനും ഉത്തരവിൽ പറയുന്നു. വയനാട് നല്ലൂർനാട് അംബേദ്കർ മെമ്മോറിയൽ മോഡൽ റസിഡൻഷ്യൽ സ്കൂളിലും കൽപറ്റ മോഡൽ റസിഡൻഷ്യൽ സ്കൂൾ ഫോർ ഗേൾസിലും ഹ്യുമാനിറ്റീസ് ബാച്ച് അനുവദിക്കാനും അനുമതി നൽകി.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.