കേന്ദ്ര പൊതുമേഖലാ സംരംഭമായ എയർപോർട്സ് അതോറിറ്റി ഓഫ് ഇന്ത്യ പരസ്യനമ്പർ 02/2025/CHQ പ്രകാരം രാജ്യത്തെ വിമാനത്താവളങ്ങളിലേക്ക് ജൂനിയർ എക്സിക്യുട്ടിവ് (എയർട്രാഫിക് കൺട്രോൾ) തസ്തികയിൽ നിയമനത്തിന് അപേക്ഷകൾ ക്ഷണിച്ചു. ആകെ 309 ഒഴിവുകളുണ്ട് (ജനറൽ 125, ഇ.ഡബ്ല്യു.എസ് 30, ഒ.ബി.സി നോൺ ക്രീമിലെയർ 72, എസ്.സി 55, എസ്.ടി 27) ഭിന്നശേഷിക്കാർക്ക് ഏഴ് ഒഴിവുകളിൽ നിയമനം ലഭിക്കും.
വിദ്യാഭ്യാസ യോഗ്യത: മൂന്നുവർഷത്തെ ഫുൾടൈം ബി.എസ്.സി വിത്ത് ഫിസിക്സ് ആൻഡ് മാത്തമാറ്റിക്സ് അല്ലെങ്കിൽ ഏതെങ്കിലും വിഷയത്തിൽ ഫുൾടൈം റെഗുലർ എൻജിനീയറിങ് ബിരുദം (ഏതെങ്കിലും സെമസ്റ്ററിൽ ഫിസിക്സ്, മാത്തമാറ്റിക്സ് വിഷയങ്ങൾ പഠിച്ചിരിക്കണം). ഇംഗ്ലീഷിൽ സംസാരിക്കാനും എഴുതാനും പ്രാവീണ്യമുണ്ടായിരിക്കണം.
പ്രായപരിധി : 24.05.2025ൽ 27 വയസ്സ്. പട്ടികജാതി/വർഗം, ഒ.ബി.സി, ഭിന്നശേഷി, വിമുക്തഭടന്മാർ എന്നിവർക്കും മറ്റും ചട്ടപ്രകാരവും പ്രായപരിധിയിൽ ഇളവുണ്ട്.
വിശദവിവരങ്ങളടങ്ങിയ വിജ്ഞാപനം www.aai.aeroൽ ലഭിക്കും. അപേക്ഷാഫീസ് 1000 രൂപ (നികുതി ഉൾപ്പെടെ). വനിതകൾ/എസ്.സി/എസ്.ടി/ഭിന്നശേഷി /എ.എ.ഐയിൽ ഒരുവർഷത്തെ അപ്രന്റിസ്ഷിപ് പരിശീലനം പൂർത്തിയാക്കിയവർ എന്നിവർക്ക് ഫീസില്ല. ഏപ്രിൽ 25 മുതൽ മേയ് 24 വരെ ഓൺലൈനിൽ അപേക്ഷിക്കാം.
സെലക്ഷൻ: കമ്പ്യൂട്ടർ അധിഷ്ഠിത പരീക്ഷ നടത്തി ഷോർട്ട്‍ലിസ്റ്റ് ചെയ്ത് വോയിസ് ടെസ്റ്റ്/സൈക്കോ ആക്ടിവ് സബ്സ്റ്റൻസസ് ടെസ്റ്റ്/സൈക്കോളജിക്കൽ അസസ്മെന്റ്/വൈദ്യപരിശോധന മുതലായവയുടെ അടിസ്ഥാനത്തിലാണ് തെരഞ്ഞെടുപ്പ്. വിശദമായ തെരഞ്ഞെടുപ്പ് പ്രക്രിയ വിജ്ഞാപനത്തിലുണ്ട്. നിയമനം ഇന്ത്യയിലെവിടെയുമാവാം.
ശമ്പളനിരക്ക്: 40,000-1,40,000 രൂപ. അടിസ്ഥാന ശമ്പളത്തോടൊപ്പം ക്ഷാമബത്ത, എച്ച്.ആർ.എ, പ്രോവിഡന്റ് ഫണ്ട്, ഗ്രാറ്റ്വിറ്റി, ചികിത്സ സഹായം അടക്കമുള്ള ആനുകൂല്യങ്ങളുമുണ്ട്. വർഷത്തിൽ 13 ലക്ഷത്തോളം രൂപ ശമ്പളമായി ലഭിക്കും.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.