തിരുവനന്തപുരം: എല്ലാ പശ്ചാത്തലത്തിൽ നിന്നുമുള്ള കുട്ടികളും സ്കൂളിൽ ചേരുന്നു എന്നതാണ് കേരളത്തിന്റെ പ്രത്യേകതയെന്ന് മന്ത്രി വി. ശിവൻകുട്ടി. പാഠപുസ്തക വിതരണത്തിന്റെ സംസ്ഥാനതല ഉദ്ഘാടനം നിർവഹിക്കുകയായിരുന്നു അദ്ദേഹം. എന്നാൽ രാജ്യം മൊത്തം എടുത്താൽ അതല്ല സ്ഥിതി. വിദ്യാഭ്യാസ ലക്ഷ്യങ്ങൾ നിറവേറ്റുന്നതിൽ പാഠപുസ്തകങ്ങളുടെ പ്രധാന പങ്ക് കേരള സർക്കാർ തിരിച്ചറിയുന്നു. പാഠപുസ്തകങ്ങളുടെ സമയോചിതമായ വിതരണം പഠിതാക്കൾക്ക് അവരുടെ അക്കാദമിക് യാത്രക്ക് ആവശ്യമായ വിഭവങ്ങൾ ഉണ്ടെന്ന് ഉറപ്പാക്കുന്നു.
യു.ഡി.എഫ് ഭരണകാലത്തെ വെല്ലുവിളികളിൽ നിന്ന് വ്യത്യസ്തമായി ഇടതുപക്ഷ ജനാധിപത്യ മുന്നണി സർക്കാരിന് കീഴിൽ, പാഠപുസ്തക വിതരണം തടസമില്ലാത്ത പ്രക്രിയയാണ്. ശരിയായ ആസൂത്രണം മൊത്തത്തിലുള്ള അക്കാദമിക് അന്തരീക്ഷം മെച്ചപ്പെടുത്താൻ നമ്മെ അനുവദിച്ചു, അതിന്റെ ഫലമായി സ്കൂൾ പ്രവേശനം വർധിക്കുകയും പൊതുവിദ്യാഭ്യാസ മേഖല വികസിക്കുകയും ചെയ്തു.
കേരളം ദേശീയ പാഠ്യപദ്ധതി മാറ്റങ്ങളെ അഭിസംബോധന ചെയ്യുക മാത്രമല്ല, ഭരണഘടനാ മൂല്യങ്ങൾ സംരക്ഷിക്കുന്നതിനായി ബദൽ പാഠപുസ്തകങ്ങൾ തയാറാക്കുകയും അനാവശ്യ ഇടപെടലുകൾക്കെതിരെ നിലകൊള്ളുകയും ചെയ്തു. ഒന്നു മുതൽ 10 വരെ ക്ലാസുകൾക്കുള്ള പാഠപുസ്തകങ്ങൾ നിർമിക്കുന്നത് നമ്മൾ തന്നെയാണ്. അതുകൊണ്ട് എൻ.സി.ഇ.ആർ.ടി കൊണ്ടുവന്ന വെട്ടിമാറ്റലുകൾ ഈ മേഖലയെ ബാധിക്കില്ല. എന്നാൽ 11, 12 ക്ലാസുകളെ ഇത് ബാധിക്കും. അതുകൊണ്ടുതന്നെ അഡീഷണൽ പാഠപുസ്തകങ്ങൾ പുറത്തിറക്കിയാണ് നാം ഈ നീക്കത്തെ പ്രതിരോധിച്ചത്.
ജനാധിപത്യം, മതേതരത്വം, സാമൂഹ്യനീതി, സമത്വം, ശാസ്ത്രബോധം എന്നിവയിൽ വേരൂന്നിയ നമ്മുടെ പാഠ്യപദ്ധതി പരിഷ്കരണം, സാമൂഹിക അസമത്വങ്ങൾ ഇല്ലാതാക്കാൻ ലക്ഷ്യമിടുന്നു. പുതിയ നിർദ്ദേശങ്ങൾ അറിവിന്റെയും ജോലിയുടെയും പരസ്പര ബന്ധത്തിന് ഊന്നൽ നൽകുന്നു, യഥാർഥ ജീവിത സാഹചര്യങ്ങളിൽ ശാസ്ത്രത്തെയും സാങ്കേതികവിദ്യയെയും കുറിച്ച് ആഴത്തിലുള്ള ധാരണ വളർത്തുന്നു.
പാഠപുസ്തകങ്ങൾ സമയബന്ധിതമായി അച്ചടിക്കുന്നത് ഒരു ഉത്തരവാദിത്തമാണെങ്കിലും, കേന്ദ്രീകൃത പാഠപുസ്തകങ്ങൾക്കായി പ്രേരിപ്പിക്കുന്ന കേന്ദ്ര ഭരണാധികാരികൾക്കെതിരായ പ്രതിരോധം കൂടിയാണ് ഇത്. വൈവിധ്യത്തെ സംരക്ഷിക്കുക, അസമത്വത്തെ ചെറുക്കുക, പൊതുവിദ്യാഭ്യാസത്തിൽ മാതൃകാപരമായ നിലവാരം പുലർത്തുക എന്നിവയിലാണ് നമ്മുടെ പ്രതിബദ്ധത.
സൃഷ്ടിപരമായ വിമർശനങ്ങളെ അംഗീകരിച്ചുകൊണ്ട്, തുടർച്ചയായ പുരോഗതി ഉറപ്പാക്കാൻ നമ്മൾ തുറന്ന മനസോടെ യാത്ര തുടരുകയാണ്. വിദ്യാഭ്യാസത്തിലെ യഥാർഥ പുരോഗതിക്ക് പാഠപുസ്തക പരിഷ്കരണങ്ങൾക്കപ്പുറം പരിശ്രമങ്ങൾ ആവശ്യമാണെന്ന് തിരിച്ചറിഞ്ഞുകൊണ്ട്, അധിക വിഭവങ്ങളും പരിശീലനങ്ങളും ഉപയോഗിച്ച് അധ്യാപകരെ ശാക്തീകരിക്കുകയാണ് ലക്ഷ്യമിടുന്നതെന്നും അദ്ദേഹം പറഞ്ഞു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.