കോഴിക്കോട്: വ്യത്യസ്ത സംഭവങ്ങളിലായി മൂന്നുപേരെ കഞ്ചാവുമായി പിടികൂടി. പിക്അപ് വാഹനത്തിൽ ഒളിപ്പിച്ചു കടത്തുകയായിരുന്ന 13.5 കിലോഗ്രാം കഞ്ചാവുമായി രണ്ടുപേരെ കസബ പൊലീസാണ് അറസ്റ്റ് ചെയ്തത്. ഒന്നര കിലോയിലധികം കഞ്ചാവുമായി ടൗൺ പൊലീസും ജില്ല ആന്റി നാർകോട്ടിക്ക് സ്പെഷൽ ആക്ഷൻ ഫോഴ്സിന്റെ(ഡൻസാഫ്) സഹായത്തോടെ ഒരാളെയും പിടികൂടി. നരിക്കുനി സ്വദേശി വാടയക്കണ്ടിയിൽ മൊട്ട സുനി എന്ന സുനീഷ് (45), പുന്നശ്ശേരി സ്വദേശി അനോട്ട് പറമ്പത്ത് ദീപേഷ് കുമാർ (35 ) എന്നിവരെ കസബ പൊലീസ് സ്റ്റേഷൻ സബ് ഇൻസ്പെക്ടർ അഭിഷേക്, മലപ്പുറം മുതുവല്ലൂർ പാറകുളങ്ങര വീട്ടിൽ റിൻഷാദ് (28) നെ ടൗൺ പൊലീസ് സബ് ഇൻസ്പെക്ടർ സുഭാഷ് ചന്ദ്രനും അറസ്റ്റ് ചെയ്തു.
പിടിച്ചെടുത്ത കഞ്ചാവിന് കിലോഗ്രാമിന് ചില്ലറ വിപണിയിൽ മുപ്പതിനായിരത്തോളം രൂപ വില വരും. ടൗൺ സ്റ്റേഷനിൽ പിടിയിലായ റിൻഷാദിന്റെ പേരിൽ നിരവധി കഞ്ചാവു കേസുകളും മോഷണ കേസുകളും നിലവിലുണ്ട്. അടുത്തിടെയാണ് ജയിൽമോചിതനായത്.
കസബ പൊലീസ് സ്റ്റേഷനിൽ പിടിയിലായ സുനീഷ് ജില്ലയുടെ വിവിധ ഭാഗങ്ങളിലേക്ക് കഞ്ചാവുകടത്തുന്ന സംഘത്തിലെ മുഖ്യ കണ്ണിയാണ്. നരിക്കുനി, പുന്നശ്ശേരി, കാക്കൂർ ഭാഗങ്ങളിൽ ചില്ലറ വിൽപന നടത്തുന്നത് ഇവരുടെ സംഘമാണ്. കഞ്ചാവ് എത്തിച്ച് നൽകുന്നവരെയും സംഘത്തിലെ സ്ത്രീകളെയും ചില്ലറ വിൽപന നടത്തുന്നവരെയും കുറിച്ചുള്ള വ്യക്തമായ സൂചന ലഭിച്ചിട്ടുണ്ടെന്ന് ടൗൺ അസി. കമീഷണർ പി. ബിജുരാജ് പറഞ്ഞു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.