പുണ്യഭൂമിയിൽ കുഞ്ഞിന്​ ജന്മം നൽകി തീർഥാടക

മക്ക: ഈ വർഷത്തെ ഹജ്ജ്​ സീസണിൽ ആദ്യകുഞ്ഞിന്​ ജന്മം നൽകി നൈജീരിയൻ യുവതി. മക്കയിലെ മെറ്റേണിറ്റി ആൻഡ് ചിൽഡ്രൻസ് ആശുപത്രിയിലാണ്​ 30കാരി പ്രസവിച്ചത്​. കുട്ടിക്ക്​ ‘മുഹമ്മദ്​’ എന്ന്​ പേരിട്ടു. ഹജ്ജ്​ തീർഥാടകർക്കിടയിലെ ആദ്യത്തെ പ്രസവമാണിത്​. പ്രസവവേദന അനുഭവപ്പെട്ടതിനെ തുടർന്നാണ്​​ യുവതിയെ ആശുപത്രി അത്യാഹിത വിഭാഗത്തിൽ പ്രവേശിപ്പിച്ചതെന്ന്​ മക്ക ഹെൽത്ത്​ ക്ലസ്​റ്റർ അധികൃതർ പറഞ്ഞു. ഉടൻ പ്രസവ വാർഡിലേക്ക്​ മാറ്റുകയും സ്വഭാവിക പ്രസവം നടക്കുകയും ചെയ്​തു.

യുവതി പൂർണ ആരോഗ്യവതിയാണ്​. എന്നാൽ, മാസം തികയാതെയുള്ള പ്രസവമായതിനാൽ കുഞ്ഞ്​ തീവ്ര പരിചരണ കേന്ദ്രത്തിലാണെന്നും അധികൃതർ സൂചിപ്പിച്ചു. മക്കയിലെത്തുന്ന തീർഥാടകരുടെ അത്യാഹിത കേസുകൾ കൈകാര്യം ചെയ്യുന്നതിനും ഏറ്റവും ഉയർന്ന നിലവാരമുള്ള സേവനങ്ങൾ നൽകുന്നതിനും മെറ്റേണിറ്റി ആൻഡ് ചിൽഡ്രൻസ് ആശുപത്രി പൂർണ ശേഷിയോടെ പ്രവർത്തിക്കുന്നുണ്ടെന്നും ക്ലസ്​റ്റർ പറഞ്ഞു. തനിക്കും കുഞ്ഞിനും ലഭിച്ച മികച്ച പരിചരണത്തിന് മെഡിക്കൽ സ്​റ്റാഫിനോട് നൈജീരിയൻ യുവതി നന്ദി പറഞ്ഞു.