യമനി സയാമീസുകളുടെ വേർപെടുത്തൽ ശസ്ത്രക്രിയ ഇന്ന്

ജിദ്ദ: യമനി സയാമീസുകളായ 'മവദ്ദ, റഹ്മ' ഇരട്ടകളുടെ വേർപെടുത്തൽ ശസ്ത്രക്രിയ വ്യാഴാഴ്ച റിയാദിൽ നടക്കും. സൗദി ഭരണാധികാരി സൽമാൻ രാജാവ് ആവശ്യപ്പെട്ടതിനെ തുടർന്ന് യമനിലെ ഏദനിൽനിന്ന് ഒരു മാസം മുമ്പാണ് ഇരട്ടകളെ വേർപെടുത്തൽ ശസ്ത്രക്രിയക്കായി റിയാദിലെത്തിച്ചത്. വ്യാഴാഴ്ച നാഷനൽ ഗാർഡ് മന്ത്രാലയത്തിന്റെ റിയാദിലുള്ള കിങ് അബ്ദുൽ അസീസ് മെഡിക്കൽ സിറ്റിയിലെ കിങ് അബ്ദുല്ല ചിൽഡ്രൻസ് സ്പെഷാലിറ്റി ആശുപത്രിയിലാണ് ശസ്ത്രക്രിയ. മവദ്ദയെയും റഹ്മയെയും വേർപെടുത്തുന്ന ശസ്ത്രക്രിയക്ക് ഡോ. അബ്ദുല്ല അൽറബീഅയാണ് നേതൃത്വം നൽകുക.

ശസ്ത്രക്രിയ ഏകദേശം 11 മണിക്കൂർ എടുക്കുമെന്ന് പ്രതീക്ഷിക്കുന്നതായി അദ്ദേഹം പറഞ്ഞു. ആറ് ഘട്ടങ്ങളിലായാണ് ശസ്ത്രക്രിയ നടക്കുക. 28 ഡോക്ടർമാരും സ്പെഷലിസ്റ്റുകളും ടെക്നീഷ്യൻമാരും നഴ്സിങ് സ്റ്റാഫും സംഘത്തിലുണ്ടാകും. സയാമീസ് ഇരട്ടകൾ പെൺകുട്ടികളാണ്. ജനിച്ചത് നെഞ്ചിലും അടിവയറ്റിലും ഒട്ടിപ്പിടിച്ച നിലയിലാണ്. പരിശോധനകൾ അനുസരിച്ച് അവർ കരളും കുടലും പങ്കിടുന്നുവെന്നും ഡോ. റബീഅ പറഞ്ഞു. രാജ്യത്തെ മെഡിക്കൽ ടീമിനും ആരോഗ്യമേഖലക്കും മാനുഷിക സഹായം ആവശ്യമുള്ളവർക്കും സൽമാൻ രാജാവും കിരീടാവകാശിയും നൽകിവരുന്ന പിന്തുണക്ക് ഡോ. അൽറബീഅ നന്ദി പറഞ്ഞു.