ദുബൈയിൽ വെള്ളപ്പൊക്കം തടയാൻ ഓവുചാൽ പദ്ധതി

ദുബൈ: നഗരത്തിലെ വെള്ളപ്പൊക്കം തടയാൻ വിപുലമായ ഓവുചാൽ സംവിധാനം നിർമിക്കുന്നു. പദ്ധതിക്ക്​ ദുബൈ മുനിസിപ്പാലിറ്റി 143കോടി ദിർഹമിന്‍റെ കരാറാണ്​ നൽകിയിരിക്കുന്നത്​.

ഭാവിയിലേക്ക്​ ആവശ്യമായ തന്ത്രപ്രധാന പദ്ധതികൾ നടപ്പാക്കാനുള്ള യു.എ.ഇ വൈസ്​ പ്രസിഡൻറും ​പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂമിന്‍റെ നിർദേശമനുസരിച്ചാണ്​ പദ്ധതിക്ക്​ രൂപം നൽകിയത്​. സുസ്ഥിരവും കാലാവസ്ഥക്ക്​ അനുയോജ്യവുമായ അടിസ്ഥാന സൗകര്യങ്ങൾ വികസിപ്പിച്ച്​ ലോകത്തെ ഏറ്റവും മികച്ച സംവിധാനങ്ങളുള്ള നഗരമാക്കി ദുബൈയെ മാറ്റുകയെന്ന കാഴ്ചപ്പാടിലൂന്നിയാണ്​ പദ്ധതി രൂപപ്പെടുത്തിയത്​.

ദുബൈയിലെ ഏറ്റവും വലിയ ഏകീകൃത മഴവെള്ള ശേഖരണ സംവിധാനവും മേഖലയിലെ ഏറ്റവും മികച്ചതുമായ ‘തസ്​രീഫ്’ പദ്ധതിയുടെ പരിധിയിൽ വരുന്നതാണ് പുതിയ കരാറുകൾ. നഗരത്തിലെ മഴവെള്ള ഓവുചാൽ സംവിധാനം വിപുലീകരിക്കാനുള്ള ‘തസ്​രീഫ്​’ എന്ന പദ്ധതിക്ക്​ കീഴിൽ നാല്​ സുപ്രധാന പദ്ധതികളാണ്​ നടപ്പിലാക്കുന്നത്​.

നാദൽ ഹമർ, ദുബൈ അന്താരാഷ്ട്ര വിമാനത്താവളത്തിന് സമീപമുള്ള പ്രദേശങ്ങൾ, അൽ ഗർഹൂദ്, അൽ റാശിദിയ, അൽ ഖൂസ്, സഅബീൽ, അൽ വാസൽ, ജുമൈറ, അൽ ബദാ എന്നിവയുൾപ്പെടെ എമിറേറ്റിലെ പ്രധാന പ്രദേശങ്ങൾ ഉൾകൊള്ളുന്നതാണ്​ പദ്ധതി. വെള്ളപ്പൊക്ക സാധ്യത ലഘൂകരിക്കാനും നിലവിലുള്ള ശൃംഖലകളുടെ കാര്യക്ഷമത വർധിപ്പിക്കാനും മൊത്തത്തിലുള്ള സേവന നിലവാരം മെച്ചപ്പെടുത്താനും ഉപകരിക്കുന്ന രീതിയിലാണ്​ പ്രവൃത്തികൾ രൂപകൽപന ചെയ്തിരിക്കുന്നത്.

പദ്ധതിയിൽ ഉൾപ്പെടുത്തി നഗരത്തിലെ ഓവുചാൽ സംവിധാനവുമായി ബന്ധിപ്പിക്കുന്ന 36 കിലോമീറ്ററിലധികം നീളമുള്ള പുതിയ ഡ്രെയിനേജ് ലൈൻ നിർമ്മിക്കും.

ദുബൈയിലെ മഴവെള്ള ഡ്രെയിനേജ് ശൃംഖല വികസിപ്പിക്കാനും നവീകരിക്കുന്നതിനുമുള്ള ‘തസ്​രീഫ്’ പദ്ധതിയുടെ നടത്തിപ്പിലെ പ്രധാന നാഴികക്കല്ലാണ് പുതുതായി ആരംഭിച്ച പദ്ധതിയെന്ന് ദുബൈ മുനിസിപ്പാലിറ്റി ആക്ടിങ്​ ഡയറക്ടർ ജനറൽ എൻജിനീയർ മർവാൻ അഹമ്മദ് ബിൻ ഗലീത പറഞ്ഞു.

അടിസ്ഥാന സൗകര്യങ്ങളുടെ കാര്യത്തിൽ ലോകത്തിലെ ഏറ്റവും വികസിതവും പ്രതിരോധശേഷിയുള്ളതുമായ നഗരങ്ങളിൽ എമിറേറ്റിന്റെ നേതൃത്വം ഉറപ്പിക്കുന്നതാണിതെന്നും അദ്ദേഹം കൂട്ടിച്ചേർത്തു. 3,000കോടി ദിർഹം ചെലവ് കണക്കാക്കുന്ന പദ്ധതിയാണ്​ തസ്​രീഫ്.