പ്ര​​ത്യാ​​ശ​​യു​​ടെ പു​​തു ജീ​​വി​​ത​​ത്തി​​ലേ​​ക്ക്...​

അ​​ബൂ​​ദ​​ബി: ഗ്യാസ്​ സിലിണ്ടർ പൊട്ടിത്തെറിച്ച്​ ഗുരുതരമായി പൊള്ളലേറ്റ ഗാർഹിക തൊഴിലാളി ഒരു വർഷത്തെ ചികിത്സക്ക്​ ശേഷം ആശുപത്രി വിട്ടു. ഇത്യോപ്യൻ യുവതി നസറിയ ഷുറെ (30) ആണ്​ അബൂദബിയിലെ ശൈഖ്​ ശക്​ബൂത്ത്​ മെഡിക്കൽ സിറ്റിയിലെ ചികിത്സയിൽ കഴിഞ്ഞിരുന്നത്​. 2023 ജനുവരിയിലാണ് വീട്ടിൽ വൻ സ്​ഫോടനമുണ്ടയത്​.

ജോലി ചെയ്തിരുന്ന വീട്ടിൽ പ്രഭാത ഭക്ഷണം ഉണ്ടാക്കുന്നതിനിടെ ഗ്യാസ്​ സിലിണ്ടർ ഉഗ്ര ശബ്​ദത്തോടെ പൊട്ടിത്തെറിക്കുകയായിരുന്നു. ഗ്യാസ്​ ചോർച്ച അറിയാതെ സ്റ്റൗ കത്തിച്ചതാണ്​ അപകടത്തിന്​ കാരണം. പൊട്ടിത്തെറിയിൽ അടുക്കളയുടെ ജനവാതിലുകൾ അടക്കം തകർന്നുപോയിരുന്നു. അപകടത്തിൽ 90 ശതമാനം പൊള്ളലേറ്റ യുവതി മൂന്നു മാസത്തോളം കോമയിൽ അബോധാവസ്ഥയിലായിരുന്നു. ഡോക്ടർമാരുടെ മികച്ച പരിചരണമാണ്​ തന്‍റെ ജീവൻ രക്ഷിച്ചതെന്ന്​ നസറിയ പറഞ്ഞു.

90 ശതമാനം പൊള്ളലേറ്റാൽ ജീവഹാനി സംഭവിക്കാൻ സാധ്യതയേറയാണ്​. പക്ഷെ, മികച്ച ചികിത്സയിലൂടെ തന്‍റെ ജീവൻ തിരിച്ചുപിടിക്കാൻ കഴിഞ്ഞുവെന്നത്​ ആശ്വാസകരം. എന്താണ്​ സംഭവിച്ചതെന്ന്​ കൃത്യമായി ഓർമയില്ല. അപകടത്തിൽ എനിക്ക്​ മാത്രം എങ്ങനെയാണ്​ പരിക്കേറ്റതെന്ന്​ അറിയില്ലെന്നും അവർ പറഞ്ഞു. ഡോക്ടർമാരും നഴ്​സുമാരും ചേർന്ന്​ മികച്ച ടീമാണ്​ ചികിത്സക്ക്​ നേതൃത്വം നൽകിയത്​.

പൊള്ളലേൽക്കുന്ന രോഗികളെ ചികിത്സിക്കുന്നതിൽ വിദഗ്​ധനായ ഡോ. മുഹമ്മദ്​ റിയാസ്​ ഖാന്‍റെ നേതൃത്വത്തിലുള്ള സംഘത്തിന്​​ നിരവധി പ്ലാസ്റ്റ്​ സർജറികളും നടത്തേണ്ടി വന്നിരുന്നു. നടക്കാനായി സന്ധികൾക്ക്​ ചുറ്റും പ്രത്യേകം നിർമിച്ച ചർമം വെച്ചുപിടിപ്പിക്കേണ്ടിയും വന്നു. ഇത്തരം കേസുകളിൽ ഭൂരിഭാഗവും മരണത്തിന്​ കീഴടങ്ങുകയാണ്​ പതിവ്​. തുടക്കത്തിൽ വലിയ വെല്ലുവിളിയാണ്​ രോഗിയിൽ നിന്നുണ്ടായത്​.

എങ്കിലും മികച്ച ടീമിന്‍റെ പ്രയത്നം കൊണ്ടും ദൈവത്തിന്‍റെ അനുഗ്രഹം കൊണ്ടും രോഗി ജീവിതത്തിലേക്ക്​ തിരികെ വന്നിരിക്കുകയാണെന്ന്​ ഡോ. മുഹമ്മദ്​ റിയാസ്​ ഖാൻ പറഞ്ഞു. ലോകത്തെ ഏറ്റവും മികച്ച ചികിത്സ ലഭ്യമാക്കുന്ന ആശുപത്രികളിൽ ഒന്നാണ്​ അബൂബദിയിലെ ശൈഖ്​ ശക്​ബൂത്ത്​ മെഡിക്കൽ സിറ്റി. ഏറ്റവും ആധുനികമായ സജ്ജീകരണങ്ങളും മികച്ച പരിശീലനം നേടിയ ഡോക്ടർമാരുമാണ്​ ഇവിടെ പ്രവർത്തിക്കുന്നത്​.