അൽഫജർ പത്രം അഭിപ്രായം തേടിയവരിൽ മല‍യാളി മാധ്യമപ്രവർത്തകനും

ദുബൈ: അബൂദബി ആസ്ഥാനമായി പുറത്തിറങ്ങുന്ന യു.എ.ഇയിലെ പ്രമുഖ പത്രമായ അൽഫജറിൽ അഭിപ്രായം രേഖപ്പെടുത്തി മലയാളി മാധ്യമപ്രവർത്തകനും. ദേശീയദിനാചരണത്തോടനുബന്ധിച്ചാണ് പത്രം യു.എ.ഇയെകുറിച്ച് വ്യത്യസ്ത രാജ്യങ്ങളിലുള്ളവരുടെ അഭിപ്രായം ആരാഞ്ഞത്. ഇന്ത്യയെ പ്രതിനിധീകരിച്ച് എഴുത്തുകാരനും മാധ്യമപ്രവർത്തകനുമായ അബ്​ദു ശിവപുരം യു.എ.ഇയെ കുറിച്ചുള്ള അഭിപ്രായം രേഖപ്പെടുത്തി.

സമാധാനപരമായ സഹവർത്തിത്വത്തി​െൻറ സവിശേഷമായ മാതൃകയാണ് യു.എ.ഇ പ്രതിനിധീകരിക്കുന്നതെന്നും അതാണ് എല്ലാ വിഭാഗങ്ങളും ഇന്ത്യൻ സമൂഹത്തിലെ എല്ലാ അംഗങ്ങളും വലിയ സ്നേഹവും നിർവചിക്കാനാവാത്ത വിലമതിപ്പും രാജ്യ സ്ഥാപകനും ശിൽപിയുമായ ശൈഖ് സായിദ് ബിൻ സുൽത്താൻ അൽ നഹ്യാനോട് കാട്ടുന്നതെന്നും മാധ്യമപ്രവർത്തകൻ അബ്​ദു ശിവപുരം പറഞ്ഞു.

യുണൈറ്റഡ് അറബ് എമിറേറ്റ്സ് എല്ലാവരെയും ഒരു പോലെ ഇഷ്​ടപ്പെടുന്നു. രാജ്യത്തി​െൻറയോ വൈവിധ്യത്തിെൻറയോ പേരിൽ മനുഷ്യരെ വേർതിരിച്ചുകാണാൻ ഇൗ രാജ്യം ഇഷ്​ടപ്പെടുന്നില്ല. അഭിമാന ഉറവിടമായ മഹത്തായ ഭൂതകാലത്തെ സംരക്ഷിക്കുമ്പോൾ തന്നെ കൂടുതൽ സമൃദ്ധമായ ഭാവിയാണ് രാജ്യം പ്രതീക്ഷിക്കുന്നത് -പത്രത്തിന് അനുവദിച്ച അഭിമുഖത്തിൽ അബ്​ദു ശിവപുരം വ്യക്തമാക്കി. ഇൗജിപ്ത്, ഫലസ്തീൻ, ലെബനാൻ, സുഡാൻ തുടങ്ങിയ രാജ്യങ്ങളിലെ പ്രമുഖരും യു.എ.ഇയെ കുറിച്ചുള്ള അഭിപ്രായങ്ങൾ പങ്കുവെച്ചു.