സ്വപ്​നതുല്ല്യം ഥാർ റോക്സ്​

ഇന്ത്യൻ വാഹനവിപണിയിലെ സൂപ്പർസ്റ്റാർ നക്ഷത്രത്തിളക്കത്തിൽ പിറവിയെടുത്തു. ഥാർ ഫൈവ്​ ഡോറെന്നും അർമാഡയെന്നു വാഹനപ്രേമികൾ വിളിച്ച സാക്ഷാൽ ഥാർ റോക്സ്​ സ്വപ്​നതുല്ല്യമായി അലങ്കരിച്ച വേദികളിൽ രാജ്യമാകമാനം ലോഞ്ച്​ ചെയ്യപ്പെട്ടു. മുന്നിലെ ഗ്രിൽ മുതൽ ഏറ്റവും വെള്ളക്കളറിൽ റോക്സനെ പുറ​ത്തിറക്കാനുള്ള മഹീന്ദ്രയുടെ തീരുമാനം പോലും ആഘോഷിക്കപ്പെട്ട ദിനങ്ങൾക്കൊടുവിലാണ്​ ഓഫ്​ റോഡർമാരുടെ സ്വപ്​നം ഭൂമിയിലിറങ്ങിയത്​.

പെ​ട്രോൾ വേരിയന്‍റ്​ 12.99 ലക്ഷത്തിനും അതിനേക്കാൾ ഒരു ലക്ഷം കൂടുതൽ കൊടുത്താൽ ഡീസൽ ​വേരിയന്‍റും കിട്ടുമെന്നത്​ ആരാധകരുടെ കിക്ക്​ ഉയർത്തിയിട്ടുണ്ട്​. ലോഞ്ച്​ വീഡിയോ കണ്ടവർക്ക്​ ഥാറിന്‍റെ മുഖ്യഎതിരാളിയായ സുസുകി ജിംനി ഇനി എന്തുചെയ്യും എന്നതു സംബന്ധിച്ച്​ ഏകദേശ ധാരണയായിട്ടുണ്ട്​. റോക്സിന്‍റെ വരവു മുന്നിൽ കണ്ടു ഫോഴ്​സ്​ മോ​ട്ടോഴ്​സ്​ ഒരു മുഴം മുന്നിലെറിഞ്ഞിട്ടിരിക്കുന്ന ഗൂർഖ ഫൈവ്​ഡോറിനും മിണ്ടാട്ടം മുട്ടിയേക്കാം.

ലോക്ക് ചെയ്യാവുന്ന റിയർ ഡിഫറൻഷ്യൽ, വെൻ്റിലേറ്റഡ് ഫ്രണ്ട് സീറ്റുകൾ, ഹിൽ ഡിസൻ്റ് കൺട്രോൾ, 10.25 ഇഞ്ച് ഡിജിറ്റൽ ഡ്രൈവർ ഡിസ്‌പ്ലേ, 10.25 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെൻ്റ് സിസ്റ്റം, ഹർമൻ കാർഡൺ സൗണ്ട് സിസ്റ്റം, ഓട്ടോമാറ്റിക് എ.സി, പുഷ്-ബട്ടൺ സ്റ്റാർട്ട്, വയർലെസ് ഫോൺ ചാർജർ, പനോരമിക് സൺറൂഫ് എന്നിവക്കുപുറമെ അഡാപ്റ്റീവ് ക്രൂയിസ് കൺട്രോൾ, ഓട്ടോണമസ് എമർജൻസി ബ്രേക്കിംഗ് സിസ്റ്റം, ലെയ്ൻ കീപ്പ് അസിസ്റ്റ് തുടങ്ങിയവ പോലുള്ള സവിശേഷതകൾ വാഗ്ദാനം ചെയ്യുന്ന XUV700ലെ ലെവൽ 2 ADAS സ്യൂട്ടും പുതിയ ഥാർ റോക്സിന്‍റെ വിവിധ മോഡലുകളിലുണ്ടാകും.

360-ഡിഗ്രി ക്യാമറ, ഹിൽ ഹോൾഡ് ആൻഡ് ഡിസെൻ്റ് കൺട്രോൾ, ഇലക്ട്രോണിക് സ്റ്റെബിലിറ്റി കൺട്രോൾ, ടയർ പ്രഷർ മോണിറ്ററിംഗ് സിസ്റ്റം എന്നിവയുമുണ്ടാകും.മൂന്നു ഡോർ ഥാറിനേക്കാൾ മികച്ച ഓഫ്-റോഡറായിരിക്കും റോക്സ്​ ഫോർവീൽ ഡ്രൈവ്​ എന്നാണ്​ സങ്കൽപം.

മഹീന്ദ്ര ഥാർ റോക്സിൻ്റെ സവിശേഷതകൾ വരും ദിവസങ്ങളിൽ വെളിപ്പെടുത്തും. 160 ബിഎച്ച്​പി, 2.0 ലിറ്റർ ടർബോ പെട്രോൾ, 175 ബിഎച്ച്​പി, 1.2ലിറ്റർ ടർബോ പെട്രോൾ, 172 ബിഎച്ച്​പി, 2.2 ലിറ്റർ ഡീസൽ എഞ്ചിൻ ഓപ്ഷനുകളാണുള്ളത്​. ആറു സ്പീഡ് മാനുവൽ,ആറു സ്പീഡ്​ ടോർക്ക് കൺവെർട്ടർ ഓട്ടോമാറ്റിക്ക് എന്നിങ്ങനെ രണ്ട് ഗിയർബോക്സുകൾ ഉണ്ടാകും.