ആ 'സ്​നേഹബന്ധം' സത്യമല്ല; ടെസ്​ലയെ തള്ളിപ്പറഞ്ഞ്​ ടാറ്റ

ആഗോളവൈദ്യുത വാഹന ഭീമൻ ടെസ്​ലയുമായുള്ള ബന്ധം തള്ളിപ്പപറഞ്ഞ്​ ടാറ്റ മോ​ട്ടോഴ്​സ്​. ടെസ്​ല ഇന്ത്യയിലേക്ക്​ വരുമെന്ന്​ ഉറപ്പിച്ചതുമുതൽ ഇന്ത്യയിലെ കൂട്ടാളിയെച്ചൊല്ലി നിരവധി അഭ്യൂഹങ്ങൾ പ്രചരിച്ചിരുന്നു. അതിൽ ഏറ്റവും കൂടുതൽ പറഞ്ഞുകേട്ടത്​ ടാറ്റയു​െട പേരാണ്​. ഇതോടെ ടാറ്റയുടെ ഓഹരി മൂല്യത്തിൽ കുതിപ്പും രേഖപ്പെടുത്തിയിരുന്നു. എന്നാലിപ്പോൾ ടെസ്​ലയുമായി യാതൊരു ചർച്ചയും നടന്നിട്ടില്ലെന്ന്​ വെളിപ്പെടുത്തലുമായി എത്തിയിരിക്കുകയാണ്​ ടാറ്റ.

'ഞങ്ങളുടെ പിവി (പാസഞ്ചർ വെഹിക്​ൾ) ബിസിനസ്സിനായുള്ള തന്ത്രപരമായ പങ്കാളിയെക്കുറിച്ച് ഞങ്ങൾ ഒരു തീരുമാനവും എടുത്തിട്ടില്ല. മാത്രമല്ല ഇത് സംബന്ധിച്ച എല്ലാ അഭ്യൂഹങ്ങളും തള്ളിക്കളയുകയും ചെയ്യുന്നു'- ടാറ്റ ഔദ്യോഗികമായി പങ്കുവച്ച ട്വീറ്റിൽ പറയുന്നു. വൈദ്യുത വാഹന നിർമാണത്തിൽ ടാറ്റയും ടെസ്​ലയും തമ്മിൽ സഹകരിക്കുമെന്ന വാർത്തകൾക്കാണ് ഇതോടെ വിരാമമായത്​. ​ഈ ആഴ്ച ആദ്യം ബംഗളൂരു രജിസ്ട്രാർ ഓഫ്​ കമ്പനീസിൽ 'ടെസ്​ല ഇന്ത്യ മോട്ടോഴ്സ് എനർജി പ്രൈവറ്റ് ലിമിറ്റഡ്' എന്ന പേര്​ രജിസ്റ്റർ ചെയ്​തിരുന്നു. ഇതോടെ ഇന്ത്യയിലേക്കുള്ള ടെസ്​ലയുടെ വരവ്​ ഉറപ്പിച്ചിട്ടുണ്ട്​.

വൈദ്യുത വാഹനങ്ങൾ നിർമ്മിക്കുന്നതിന്​ രാജ്യത്ത്​ സൗകര്യം ഒരുക്കുന്നതിനായി ടെസ്​ല ഇപ്പോഴും നിരവധി സംസ്ഥാന സർക്കാരുകളുമായി ചർച്ച നടത്തുന്നുണ്ട്. തുടക്കത്തിൽ ഇന്ത്യയിൽ ബിസിനസ്സ് ആരംഭിക്കാൻ ടെസ്‌ലയ്ക്ക് പ്രാദേശിക പങ്കാളിയെ ആവശ്യമുണ്ട്. കഴിഞ്ഞ ദിവസം ടാറ്റ മോട്ടോഴ്‌സിന്‍റെ ഇവി വിഭാഗത്തിൽ നിന്നുള്ള ഒരു ട്വീറ്റാണ്​ എല്ലാ ഊഹാപോഹങ്ങൾക്കും തുടക്കമിട്ടത്​.​ പ്രശസ്ത ബോളിവുഡ് ഗാനത്തിലെ രണ്ട് വരികൾ ഉദ്ധരിച്ചാണ്​ ടാറ്റ മോട്ടോഴ്സ് ഇലക്ട്രിക് മൊബിലിറ്റി ട്വീറ്റ് ചെയ്തത്​.

വെൽക്കം ടെസ്‌ല, ടെസ്‌ല ഇന്ത്യ എന്നീ ഹാഷ്‌ടാഗുകളും അവർ പങ്കുവച്ചിരുന്നു. പിന്നീട്​ ഈ ട്വീറ്റ് ഡിലീറ്റ്​ ചെയ്​തു. ഉൽപ്പാദന കേന്ദ്രം സ്ഥാപിക്കുന്നതിന്​ കർണാടക സർക്കാർ ബംഗളൂരു നഗരത്തിന്‍റെ പ്രാന്തപ്രദേശത്തുള്ള തുങ്കൂരിൽ ടെസ്‌ലയ്ക്ക് ഭൂമി വാഗ്ദാനം ചെയ്തതായി റിപ്പോർട്ടുകളുണ്ട്​. ടെസ്‌ലയുടെ ആദ്യ വാഹനമായ മോഡൽ 3 2021-22 സാമ്പത്തിക വർഷത്തിന്‍റെ ആദ്യ പാദത്തിൽ വിൽപ്പനയ്‌ക്കെത്താനാണ്​ സാധ്യത. വാഹനത്തിന്‍റെ പ്രീ-ബുക്കിങ്​ ഉടൻ ആരംഭിക്കും.