യു.പിയിലെ സഖ്യ വാർത്തകൾ നിഷേധിച്ച്​ എ.ഐ.എം.ഐ.എം; 'മുസ്​ലിം ഉപമുഖ്യമന്ത്രി വേണമെന്ന്​ പറഞ്ഞിട്ടില്ല'

ഹൈദരാബാദ് (തെലങ്കാന): വരാനിരിക്കുന്ന ഉത്തർപ്രദേശ് നിയമസഭാ തെരഞ്ഞെടുപ്പിൽ സമാജ്‌വാദി പാർട്ടിയുമായി സഖ്യമുണ്ടാക്കുമെന്ന റിപ്പോർട്ടുകൾ ഒാൾ ഇന്ത്യ മജ്​ലിസെ ഇത്തിഹാദുൽ മുസ്​ലിമീൻ (എ.ഐ.എം.ഐ.എം) നിഷേധിച്ചു. മുസ്ലീം നേതാവിനെ ഉപമുഖ്യമന്ത്രിയാക്കിയാൽ സമാജ്‌വാദി പാർട്ടിയുമായി സഖ്യത്തിന് തയ്യാറെന്ന് തങ്ങൾ ഒരിക്കലും പറഞ്ഞിട്ടില്ലെന്ന് എ.ഐ.എം.ഐ.എം ഉത്തർപ്രദേശ് പ്രസിഡൻറ്​ ഷൗക്കത്ത് അലി പറഞ്ഞു. താനോ എ.ഐ.എം.ഐ.എം മേധാവി അസദുദ്ദീൻ ഉവൈസിയോ ഇത്തരമൊരു പ്രസ്​താവന നടത്തിയിട്ടില്ലെന്നാണ് അദ്ദേഹം പറഞ്ഞത്​.

'കഴിഞ്ഞതിന്​ മുമ്പുള്ള തെരഞ്ഞെടുപ്പിൽ എസ്​പിക്ക് 20 ശതമാനം മുസ്ലീം വോട്ടുകൾ ലഭിച്ചിരുന്നു. അങ്ങിനെയാണ്​ അന്നവർ അധികാരത്തിൽ വന്നത്​. എന്നാൽ അവർ ഒരു മുസ്ലീമിനെ ഉപമുഖ്യമന്ത്രിയാക്കിയില്ല. ഇതാണ്​ ഞങ്ങൾ പറഞ്ഞത്​'-ഷൗക്കത്ത് അലി പറഞ്ഞു. ഏതെങ്കിലും മുസ്ലീം എം‌എൽ‌എയെ ഉത്തർപ്രദേശിൽ ഉപമുഖ്യമന്ത്രിയാക്കാൻ എസ്​പി മേധാവി അഖിലേഷ് യാദവ് സമ്മതിച്ചാൽ പാർട്ടിയുമായി സഖ്യമുണ്ടാക്കാൻ തയ്യാറാണെന്ന് അസദുദ്ദീൻ ഉവൈസി ശനിയാഴ്ച പറഞ്ഞതായാണ്​ വാർത്തകൾ പുറത്തുവന്നിരുന്നത്​. അതാണിപ്പോൾ പാർട്ടിയുടെ ഉത്തർപ്രദേശ് പ്രസിഡൻറ്​ നിഷേധിച്ചത്​. അടുത്ത വർഷം ആദ്യം നടക്കാനിരിക്കുന്ന ഉത്തർപ്രദേശ് തെരഞ്ഞെടുപ്പിൽ 100 സീറ്റുകളിൽ എ.ഐ.എം.ഐ.എം മത്സരിക്കുമെന്ന് ഉവൈസി നേരത്തെ അറിയിച്ചിരുന്നു.

നിലവിൽ യു.പിയിലെ 110 നിയമസഭാ മണ്ഡലങ്ങളിൽ മുസ്ലീം വോട്ടർമാർ 30-39 ശതമാനം ഉണ്ട്​. 44 സീറ്റുകളിൽ ഇത്​ 40-49 ശതമാനവും 11 സീറ്റുകളിൽ മുസ്‌ലിം വോട്ടർമാർ 50-65 ശതമാനവുമാണ്​.2017 ലെ നിയമസഭാ തെരഞ്ഞെടുപ്പിൽ 38 സീറ്റുകളിൽ എ.ഐ.എം.ഐ.എം സ്ഥാനാർഥികളെ നിർത്തിയെങ്കിലും ഒരു മണ്ഡലത്തിൽ പോലും വിജയിക്കാൻ കഴിഞ്ഞിരുന്നില്ല. 2019 ലെ ലോക്‌സഭാ തെരഞ്ഞെടുപ്പിൽ ഇവർ യു.പിയിൽ മത്സരിച്ചിരുന്നില്ല.

നിലവിൽ ഓം പ്രകാശ് രാജ്ഭറി​െൻറ നേതൃത്വത്തിലുള്ള ഭഗിദാരി സങ്കൽപ് മോർച്ചയുമായി ഉവൈസി സഖ്യമുണ്ടാക്കിയിരുന്നു. ഭാരതീയ വഞ്ചിത് സമാജ് പാർട്ടി, ഭാരതീയ മാനവ് സമാജ് പാർട്ടി, ജനത ക്രാന്തി പാർട്ടി, രാഷ്ട്ര ഉദയ് പാർട്ടി തുടങ്ങിയ ചെറുസംഘടനകളുടെ യൂനിയനാണ് ഭഗിദാരി സങ്കൽപ് മോർച്ച​. ത​െൻറ പാർട്ടി ചെറിയ കക്ഷികളുമായി സഖ്യമുണ്ടാക്കുമെന്ന് അഖിലേഷ് യാദവും അടുത്തിടെ പറഞ്ഞിരുന്നു. എന്നാൽ യു.പിയിൽ ബി.എസ്​.പി ഒറ്റയ്ക്ക് മത്സരിക്കുമെന്നാണ്​ മായാവതി പറയുന്നത്​.