അഹമ്മദാബാദ്: ലോക്സഭ തെരഞ്ഞെടുപ്പിൽ അയോധ്യയിൽ ബി.ജെ.പിയെ തകർത്തത് പോലെ ഗുജറാത്തിലും തോൽപ്പിക്കുമെന്ന് കോൺഗ്രസ് നേതാവ് രാഹുൽ ഗാന്ധി. ഗുജറാത്തിൽ നടക്കാനിരിക്കുന്ന നിയമസഭ തെരഞ്ഞെടുപ്പിൽ കോൺഗ്രസ് വിജയിക്കുമെന്നും രാഹുൽ ഗാന്ധി പറഞ്ഞു. അഹമ്മദാബാദിൽ നടന്ന പരിപാടിയിൽ പങ്കെടുത്ത് സംസാരിക്കുമ്പോഴാണ് രാഹുലിന്റെ പരാമർശം.
ദൈവവുമായി നേരിട്ട് ബന്ധമുണ്ടെന്ന് പറയുന്നയാളാണ് മോദി. എന്നിട്ടും അയോധ്യയിൽ എന്തുകൊണ്ടാണ് ബി.ജെ.പി തോറ്റത്. ബി.ജെ.പി ഞങ്ങളെ എതിർക്കുകയും ഓഫീസ് തകർക്കുകയും വരെ ചെയ്തു. നമ്മുടെ ഓഫീസ് തകർത്തത് പോലെ ഗുജറാത്ത് സർക്കാറിനെയും നമ്മൾ തോൽപ്പിക്കുമെന്ന് രാഹുൽ ഗാന്ധി പറഞ്ഞു.
രാമക്ഷേത്രത്തിന്റെ പ്രതിഷ്ഠ ചടങ്ങിന് സാധാരണക്കാരായ ജനങ്ങളെ വിളിക്കാത്തതിൽ അവർക്ക് പ്രതിഷേധമുണ്ട്. അംബാനിയേയും അദാനിയേയും ചടങ്ങിന് ക്ഷണിച്ചപ്പോൾ സാധാരണക്കാരായ ജനങ്ങൾക്ക് ക്ഷണമുണ്ടായിരുന്നില്ല. അയോധ്യയിൽ കർഷകരുടെ ഭൂമിയിൽ അന്താരാഷ്ട്ര വിമാനത്താവളം നിർമിച്ചു. എന്നാൽ, കർഷകർക്ക് മതിയായ നഷ്ടപരിഹാരം നൽകിയില്ലെന്നും രാഹുൽ ഗാന്ധി പറഞ്ഞു.
നരേന്ദ്രമോദിക്ക് അയോധ്യ ഉള്‍പ്പെടുന്ന ഫൈസാബാദില്‍ മത്സരിക്കാന്‍ ആഗ്രഹമുണ്ടായിരുന്നു. എന്നാല്‍, പരാജയപ്പെടുമെന്നും രാഷ്ട്രീയജീവിതം അവസാനിക്കുമെന്നും സര്‍വേ നടത്തിയവര്‍ മുന്നറിയിപ്പ് നല്‍കി. ഇതേതുടർന്നാണ് മോദി മത്സരരംഗത്ത് നിന്ന് പിന്മാറിയതെന്നും രാഹുൽ ഗാന്ധി ആരോപിച്ചു. അയോധ്യയിൽ രാമക്ഷേത്രം ലക്ഷ്യമിട്ട് എൽ.കെ അദ്വാനി ആരംഭിച്ച മൂവ്മെന്റ് പരാജയപ്പെട്ടുവെന്നും രാഹുൽ ഗാന്ധി കൂട്ടിച്ചേർത്തു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.