മലയാളി സമൂഹത്തിന് അഭിമാനമാണ് കോട്ടയം ചങ്ങനാശ്ശേരി സ്വദേശി മാർ ജോർജ് ജേക്കബ് കൂവക്കാടിന്‍റെ കർദിനാൾ സ്ഥാനലബ്ദി. ശനിയാഴ്ച നടന്ന ചരിത്രപരമായ ചടങ്ങിലാണ് മാർ ജോർജ് ജേക്കബ് കൂവക്കാടിനെ ഫ്രാൻസിസ് മാർപാപ്പ കർദിനാൾ പദവിയിലേക്ക് ഉയർത്തിയതെന്ന് വത്തിക്കാൻ സിറ്റിയിൽ നിന്ന് ഫാ. മിഥുൻ ജെ. ഫ്രാൻസിസ് എസ്.ജെ റിപ്പോർട്ട് ചെയ്യുന്നു.
വൈദിക പദവിയിൽ നിന്ന് നേരിട്ട് കർദിനാളാകുന്ന ആദ്യ ഇന്ത്യൻ പുരോഹിതനാണ് മാർ കൂവക്കാട്. സെന്‍റ് പീറ്റേഴ്സ് ബസിലിക്കയിൽ നടന്ന മഹത്തായ ചടങ്ങിൽ ലോകമെമ്പാടുമുള്ള 21 പുതിയ കർദിനാൾമാരെ ഉൾപ്പെടുത്തി കത്തോലിക്ക സഭയുടെ സാർവത്രിക സ്വഭാവം ലോകത്തിന് മുന്നിൽ പ്രഖ്യാപിച്ചു.
കർദിനാൾ നിയുക്തരുടെ ബലിപീഠത്തിലേക്കുള്ള ഘോഷയാത്രയോടെയാണ് പരിപാടി ആരംഭിച്ചത്. ചുവന്ന ബിരേറ്റയും കർദിനാൾ മോതിരവും ഓരോ പുതിയ കർദിനാളിനും പ്രാർഥനയോടെയും സർട്ടിഫിക്കറ്റുകളോടെയും ഫ്രാൻസിസ് മാർപാപ്പ കൈമാറുന്നതിനു മുമ്പ് അദ്ദേഹം സദസിനെ അഭിസംബോധന ചെയ്തു.
കേരളത്തിലെ ചങ്ങനാശ്ശേരി അതിരൂപതയിൽ നിന്നുള്ള കർദിനാൾ കൂവക്കാടിന്‍റെ സ്ഥാനക്കയറ്റത്തോടെ, ഇന്ത്യയിൽ നിന്നുള്ള കർദിനാളുകളുടെ എണ്ണം ആറായി ഉയർന്നു. അദ്ദേഹത്തിന്‍റെ നിയമനത്തെ രാഷ്ട്രീയ നേതാക്കളും സഭാനേതാക്കളും ഇന്ത്യയിലുടനീളമുള്ള വിശ്വാസികളും ഊഷ്മളമായി സ്വാഗതം ചെയ്തു.
ചടങ്ങിൽ പങ്കെടുക്കാൻ കേന്ദ്രമന്ത്രി ജോർജ് കുര്യന്‍റെ നേതൃത്വത്തിലുള്ള ഇന്ത്യൻ പ്രതിനിധി സംഘം വത്തിക്കാനിൽ സാന്നിധ്യം വഹിച്ചു. കേരളത്തിലെ ക്രിസ്ത്യൻ സമൂഹത്തിന് ലഭിച്ച ബഹുമതിയെ അംഗീകരിച്ച്, കേരള മുഖ്യമന്ത്രി പിണറായി വിജയൻ അഭിനന്ദനങ്ങൾ അറിയിച്ചു.
കർദിനാൾ കൂവക്കാടിന് അൾജീരിയ, ദക്ഷിണ കൊറിയ, ഇറാൻ, കോസ്റ്റാറിക്ക, വെനസ്വേല എന്നീ രാജ്യങ്ങളിൽ വിവിധ സുപ്രധാന നയതന്ത്ര ചുമതലകളിൽ പ്രവർത്തിച്ച പരിചയമുണ്ട്. 2020 മുതൽ അദ്ദേഹം വത്തിക്കാനിൽ താമസിച്ച് ഫ്രാൻസിസ് മാർപാപ്പയുടെ അന്താരാഷ്ട്ര യാത്രകൾ ക്രമീകരിക്കുന്നു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.