കോവിഡ് വാക്​സിനെടുത്തതിന്​ പിന്നാലെ അസ്വസ്ഥത; രക്തസ്രാവത്തെത്തുടർന്ന്​ ഗർഭിണി മരിച്ചു

കാഞ്ഞിരപ്പള്ളി (കോട്ടയം): കോവിഡ് വാക്സിനെടുത്തതിന്​ പിന്നാലെ അസ്വസ്ഥത അനുഭവപ്പെട്ട ഗർഭിണി ചികിത്സയിലിരിക്കെ മരിച്ചു. കാഞ്ഞിരപ്പള്ളി ആനക്കൽ തൈപറമ്പിൽ മാത്യു-മോളമ്മ ദമ്പതികളുടെ മകൾ മഹിമ മാത്യുവാണ്​ (31) മരിച്ചത്. തലക്കുള്ളിലെ രക്തസ്രാവവും കോവിഡ് വാക്സിനേഷനുമാവാം മരണകാരണമെന്നാണ് പാലായിലെ സ്വകാര്യ ആശുപത്രി അധികൃതർ തയാറാക്കിയ മരണറിപ്പോർട്ടിൽ പറയുന്നത്​. തലച്ചോറിലെ രക്തസ്രാവമാണ് മരണകാരണമെന്നാണ്​ പ്രാഥമിക പോസ്​റ്റ്​മോർട്ടം റിപ്പോർട്ടിലുമുള്ളത്​.

ഈ മാസം ഒമ്പതിന്​ മരങ്ങാട്ടുപിള്ളി സർക്കാർ പ്രാഥമികാരോഗ്യകേന്ദ്രത്തിൽ കോവിഡ് വാക്സിനെടുത്ത മഹിമക്ക്​ തൊട്ടടുത്ത ദിവസങ്ങളിൽ അസ്വസ്ഥതയും തലവേദനയും അനുഭവപ്പെട്ടു. തുടർന്ന് 15ന് പാലായിലെ സ്വകാര്യ ആശുപത്രിയിൽ പ്രവേശിപ്പിക്കുകയായിരുന്നു. വെള്ളിയാഴ്ച രാത്രിയോടെ മരിച്ചു. സംഭവത്തിൽ സമഗ്ര അന്വേഷണം ആവശ്യപ്പെട്ട്​ ബന്ധുക്കൾ മുഖ്യമന്ത്രി, ആരോഗ്യ മന്ത്രിയടക്കമുള്ളവർക്ക് പരാതി നൽകി.

പോസ്റ്റുമോർട്ടം റിപ്പോർട്ട് ലഭ്യമായ ശേഷമേ കൂടുതൽ വിവരം അറിയാനാവൂവെന്ന് കാഞ്ഞിരപ്പള്ളി ഡിവൈ.എസ്.പി സജിമോൻ 'മാധ്യമ'ത്തോട് പറഞ്ഞു. ആന്തരികാവയവങ്ങൾ പരിശോധനക്ക് അയച്ചതി​െൻറ ഫലംകൂടി ലഭിക്കേണ്ടതുണ്ട്​.

നാലുമാസം മുമ്പ് വിവാഹിതയായ മഹിമ രണ്ടുമാസം ഗർഭിണിയായിരുന്നു. എം.എസ്.ഡബ്ല്യു കോഴ്സ് പഠനം പൂർത്തീകരിച്ച മഹിമ കാനഡക്ക്​ പോകാനുള്ള തയാറെടുപ്പിലായിരുന്നു. ജന്മനാ ഇടതുകാൽ ഇല്ലാത്ത മഹിമ പഠനത്തിലും കലാരംഗത്തും മുന്നിലായിരുന്നു.

ഒറ്റക്കാലിൽ നൃത്തം ചെയ്ത്​ സംസ്ഥാനതലത്തിൽ വിജയിയാണ്. പടിഞ്ഞാറ്റുകര കാഞ്ഞിരത്തുങ്കൽ രഞ്ജിത്താണ് ഭർത്താവ്. സഹോദരി: ലിന മാത്യു. സംസ്കാരം തിങ്കളാഴ്ച ഉച്ചക്ക്​ രണ്ടിന് തിടനാട് പെന്തക്കോസ്ത് പള്ളി സെമിത്തേരിയിൽ.