ഇടുക്കി അണക്കെട്ട് തുറന്നു; സെക്കൻഡിൽ 40,000 ലിറ്റർ വെള്ളം പെരിയാറിലേക്ക്

ചെറുതോണി: അധിക ജലം ക്രമീകരിക്കുന്നതിനായി ഇടുക്കി ജലസംഭരണിയുടെ ഭാഗമായ ചെറുതോണി അണക്കെട്ട് തുറന്നു. രാവിലെ 10 മണിയോടെ അണക്കെട്ടിന്‍റെ മൂന്നാമത്തെ ഷട്ടർ 40 സെന്‍റീമീറ്റർ ഉയർത്തിയാണ് സെക്കൻഡിൽ 40 ഘനയടി (40,000 ലിറ്റർ) വെള്ളം പെരിയാറി നദിയിലേക്ക് ഒഴുക്കി വിടുന്നത്. ഏഴാം തവണയാണ് ഇടുക്കി അണക്കെട്ട് തുറക്കുന്നത്. ഒരു വർഷത്തിനിടെ മൂന്നാം തവണ അണക്കെട്ട് തുറക്കുന്നത് ചരിത്രത്തിലാദ്യമാണ്.

അണക്കെട്ടിലെ ജലനിരപ്പ് അപ്പർ റൂൾ ലെവലായ 2400.03 അടിക്ക് മുകളിലെത്താനുള്ള സാധ്യത കണക്കിലെടുത്താണ് അധിക ജലം ക്രമീകരിക്കാനുള്ള കെ.എസ്.ഇ.ബി‍യുടെ നടപടി. കൂടാതെ, ഇന്ന് രാവിലെ മുല്ലപ്പെരിയാർ അണക്കെട്ട് തുറന്ന് വെള്ളം ഒഴുക്കുന്ന സാഹചര്യത്തിൽ മുൻകരുതൽ കൂടി പരിഗണിച്ചാണ് അധികൃതരുടെ തീരുമാനം.

Full View

രാവിലെ രേഖപ്പെടുത്തിയത് പ്രകാരം 2399.40 അടിയാണ് നിലവിലെ ജലനിരപ്പ്. 1397.296 ഘനയടി വെള്ളമാണ് സംഭരണി‍യിലുള്ളത്. സംഭരണശേഷിയുടെ 95.73 ശതമാനമാണിത്. 2403.00 അടിയാണ് അണക്കെട്ടിന്‍റെ ആകെ സംഭരണശേഷി. കഴിഞ്ഞ വർഷം ഇതേ സമയത്ത് 2393.18 അടി വെള്ളമാണ് ജലസംഭരണി‍യിൽ ഉണ്ടായിരുന്നത്.

അണക്കെട്ട് തുറക്കുന്ന സാഹചര്യത്തിൽ ചെറുതോണി ടൗൺ, പെരിയാറിന്‍റെ ഇരുകരകളിലും താമസിക്കുന്ന ജനങ്ങൾ ജാഗ്രത പാലിക്കണമെന്ന് ജില്ലാ കലക്ടർ അറിയിച്ചു. ഡാം തുറക്കുന്ന സമയം വെള്ളപ്പാച്ചിൽ ഉണ്ടാകുന്ന സ്ഥലങ്ങളിലെ പുഴ മുറിച്ചു കടക്കുന്നതും ഈ സ്ഥലങ്ങളിലെ മീൻപിടിത്തവും നിരോധിച്ചിരിക്കുന്നു. നദിയിൽ കുളിക്കുന്നതും തുണി അലക്കുന്നത് ഒഴിവാക്കുക. വീഡിയോ, സെൽഫി എടുക്കൽ, ഫേസ്ബുക് ലൈവ് എന്നിവ കർശനമായി നിരോധിച്ചിരിക്കുന്നു.

ഈ മേഖലകളിൽ വിനോദ സഞ്ചാരത്തിന് നിയന്ത്രണം ഏർപ്പെടുത്തിയിട്ടുണ്ട്. പൊതുജനങ്ങൾ പൊലീസിന് നിർദേശങ്ങൾ കർശനമായി പാലിക്കണം. മാധ്യമപ്രവർത്തകർ അവർക്ക് അനുവദിച്ചിട്ടുള്ള സ്ഥലങ്ങളിൽ മാത്രം ചിത്രീകരണം നടത്തേണ്ടതാണ് എന്നും ജില്ലാ കലക്ടർ അറിയിച്ചു.

സംസ്ഥാനത്ത്​ മഴ കനക്കുമെന്ന്​ കാലാവസ്ഥ നിരീക്ഷണ കേന്ദ്രം മുന്നറിയിപ്പ്​ നൽകി. അടുത്ത മൂന്നു മണിക്കൂറിൽ കേരളത്തിൽ തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, തൃശ്ശൂർ, മലപ്പുറം, കോഴിക്കോട്, കണ്ണൂർ എന്നീ ജില്ലകളിൽ ഒറ്റപ്പെട്ടയിടങ്ങളിൽ മഴക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.

അ​ണ​ക്കെ​ട്ട്​ തുറക്കുന്നത്​ ഏഴാം ത​വ​ണ, ഒരു വർഷത്തിനിടെ മൂന്നാം തവണ

ജ​ല​നി​ര​പ്പ്​ പൂ​ർ​ണ സം​ഭ​ര​ണ​ശേ​ഷി​യി​ലേ​ക്ക്​ എ​ത്തി​യ​തി​നെ​ത്തു​ട​ർ​ന്ന്​​ ഇ​ടു​ക്കി അ​ണ​ക്കെ​ട്ട്​ ഏഴാം ത​വ​ണ​യാണ് തു​റക്കുന്നത്. അധിക ജലം ക്രമീകരിക്കുന്നതിന്‍റെ ഭാഗമായാണ് അ​ണ​ക്കെ​ട്ടി​െൻറ മൂ​ന്നാ​മ​ത്തെ ഷ​ട്ട​ർ 40 സെ.​മീ. ഉ​യ​ർ​ത്താ​ൻ തീ​രു​മാ​നി​ച്ച​ത്. ഒരു വർഷത്തിനിടെ മൂന്നു തവണ അണക്കെട്ട് തുറക്കുന്നത് ചരിത്രത്തിലാദ്യമാണ്.

1981 ഒ​ക്​​ടോ​ബ​ർ 29, 1992 ഒ​ക്​​ടോ​ബ​ർ 12, 2018 ആ​ഗ​സ്​​റ്റ്​ ഒ​മ്പ​ത്, 2018 ഒ​ക്​​ടോ​ബ​ർ ആ​റ്​ , 2021 ഒ​ക്​​ടോ​ബ​ർ 19 തീ​യ​തി​ക​ളി​ലാ​ണ് ഇ​തി​ന്​​ മു​മ്പ്​ ഇ​ടു​ക്കി അ​ണ​ക്കെ​ട്ട്​ തു​റ​ന്ന​ത്.

1981 ഒ​ക്​​ടോ​ബ​ർ 29നാ​ണ്​ ആ​ദ്യ​മാ​യി ഡാം ​തു​റ​ന്ന​ത്. ചെ​റു​​തോ​ണി​യി​ലെ അ​ഞ്ച്​ ഷ​ട്ട​റും 15 ദി​വ​സം തു​റ​ന്നു​വെ​ച്ചു. 1992 ഒ​ക്​​ടോ​ബ​ർ 12 ന്​ ​അ​ഞ്ച്​ ദി​വ​സം തു​റ​ന്നു.

26 വ​ർ​ഷ​ത്തി​ന്​ ശേ​ഷം പ്ര​ള​യ​കാ​ല​ത്ത്​ 2018 ആ​ഗ​സ്​​റ്റ്​ ഒ​മ്പ​തി​നാ​ണ്​ മൂ​ന്നാ​മ​ത്​ തു​റ​ന്ന​ത്. സെ​പ്റ്റം​ബ​ർ ഏ​ഴ്​ വ​രെ 29 ദി​വ​സം ഷ​ട്ട​റു​ക​ൾ 70 സെ.​മീ. തു​റ​ന്നു​വെ​ച്ചു. 15 മി​നി​റ്റ് കൊ​ണ്ട്​ 50 സെ.​മീ. ഉ​യ​ർ​ത്തി സെ​ക്ക​ൻ​ഡി​ൽ 50 ഘ​ന​മീ​റ്റ​ർ വെ​ള്ളം പു​റ​ത്തേ​ക്കൊ​ഴു​ക്കി. ചെ​റു​തോ​ണി​യാ​റിേ​ല​ക്ക് വെ​ള്ളം ഇ​ര​ച്ചെ​ത്തി​യ​തോ​ടെ ആ​ദ്യം പാ​ല​വും തു​ട​ർ​ന്ന് ചെ​റു​തോ​ണി ടൗ​ണും വെ​ള്ള​ത്തി​ലാ​യി.

2018 ഒ​ക്​​ടോ​ബ​ർ ആ​റി​ന്​ തു​റ​ന്നെ​ങ്കി​ലും വെ​ള്ളം ശാ​ന്ത​മാ​യൊ​ഴു​കി ക​ട​ന്നു​പോ​യി.

2021 ഒ​ക്​​ടോ​ബ​ർ 19ന്​ ​തു​റ​ന്ന മൂ​ന്ന്​ ഷ​ട്ട​റി​ൽ ര​ണ്ടെ​ണ്ണം 22നും ​മൂ​ന്നാ​മ​ത്തേ​ത്​ 27 നും ​അ​ട​ച്ചു. തുടർന്ന് നവംബർ 14ന് അണക്കെട്ടിന്‍റെ ഒരു ഷട്ടർ വീണ്ടും 40 സെന്‍റീമീറ്റർ ഉയർത്തി സെക്കൻഡിൽ 40,000 ലിറ്റർ ജലം പെരിയാറിലേക്ക് ഒഴുക്കിവിട്ടിരുന്നു.