എൻഡോസൾഫാൻ: നൂറുപേർക്കുവീതം അഞ്ചുലക്ഷം നൽകാൻ അനുമതി

സുപ്രീംകോടതിക്ക് റിപ്പോർട്ട് നൽകി കാസർകോട്​: സുപ്രീംകോടതി വിധിപ്രകാരം, എൻഡോസൾഫാൻ ദുരിതബാധിതർക്കുള്ള ധനസഹായ വിതരണം ഒരുദിവസം അഞ്ചുപേർ എന്നത്​ നൂറുപേർ എന്നായി ഉയർത്തും. ഇതിനുള്ള പ്രത്യേക അനുമതി സർക്കാർ കലക്ടർക്ക്​ നൽകി. ട്രഷറി നിയന്ത്രണം ഏർപ്പെടുത്തിയതിനാൽ ഒരു ദിവസം 25 ലക്ഷം രൂപ മാത്രമേ പിൻവലിക്കാൻ അനുമതിയുണ്ടായിരുന്നുള്ളൂ. 3714 പേർക്കാണ്​ സഹായം വിതരണം ചെയ്യേണ്ടിയിരുന്നത്​. അഞ്ചുപേർക്ക്​ വീതം നൽകിയാൽ ദുരിതബാധിതർ ഇനിയും കാത്തിരിക്കേണ്ടിവരും എന്നതിനാലാണ്​ കലക്ടർ പ്രത്യേക അനുമതി സർക്കാറിൽനിന്നും വാങ്ങിയത്​. നാലാഴ്​ചക്കുള്ളിൽ സഹായം വിതരണം ചെയ്തിരിക്കണമെന്നാണ് സുപ്രീംകോടതി വിധിയുണ്ടായത്​. അതുപ്രകാരം വിതരണം ചെയ്യേണ്ട സമയം കഴിഞ്ഞു. കോടതിവിധി അനുസരിച്ചില്ലെങ്കിൽ കോടതിയലക്ഷ്യമാകുമെന്നതിനാൽ ഹരജിക്കാരായ എട്ടുപേർക്ക്​ ആദ്യഘട്ടത്തിൽത്തന്നെ അഞ്ചുലക്ഷം വീതം നൽകി. ഇത്​ സുപ്രീംകോടതിക്ക്​ റിപ്പോർട്ടായി സമർപ്പിക്കുകയും, മറ്റുള്ളവർക്ക്​ തുക വിതരണം ചെയ്യുന്നതിനുള്ള നടപടി പുരോഗമിക്കുകയാണെന്ന്​ അറിയിക്കുകയും ചെയ്തിട്ടുണ്ട്​. നൂറുപേർക്കുവീതം വിതരണം ചെയ്യുന്നതോടെ 37 ഘട്ടങ്ങളിലായി തുക നൽകാനാകും. എങ്കിലും ഒരുമാസത്തിലേറെ സമയം ഇതിനായി വേണ്ടിവരും. ഇതിനുപുറമെ ധനസഹായത്തിന് അർഹരായവർക്ക്​ തുക വിതരണം ചെയ്യുന്നതിനുള്ള നടപടിക്രമങ്ങളും ഏറെ പാലിക്കേണ്ടതുണ്ടെന്ന്​ എൻഡോസൾഫാൻ സെല്ലിൽനിന്നും അറിയിച്ചു. പട്ടികയിൽപെട്ടവരും അർഹരായവരുമായവരുടെ വിലാസം, ആധാർ കാർഡ്​, ബാങ്ക്​ അക്കൗണ്ട്​, മറ്റു വിവരങ്ങൾ എന്നിവ പരിശോധിക്കുകയും ഉറപ്പുവരുത്തുകയും വേണം. ഇതിനും സമയം വേണ്ടിവരും. 2010ലെ മനുഷ്യാവകാശ കമീഷനാണ്​ എൻഡോസൾഫാൻ ഇരകൾക്ക്​ ധനസഹായം ശിപാർശ ചെയ്തത്​. തുടർന്ന്​ സുപ്രീംകോടതിയാണ്​ ഇത്​ വിധിയായി മാറ്റിയത്​. എന്നിട്ടും ധനസഹായം നൽകാൻ മാറിവന്ന സർക്കാറുകൾ തയാറായില്ല. തുടർന്നാണ്​ കോൺഫെഡറേഷൻ ഓഫ്​ എൻഡോസൾഫാൻ റൈറ്റ്​സ്​ വിക്ടിംസ്​ കലക്ടിവ്​ നേതൃത്വത്തിൽ, ഇരകളായ എട്ടുപേർ സുപ്രീംകോടതിയെ സമീപിച്ചത്​. ഈ ഹരജിയിൽ ചീഫ്​ ജസ്​റ്റിസ്​ ഡി.വൈ. ചന്ദ്രചൂഡിന്‍റെ നേതൃത്വത്തിലുള്ള മൂന്നംഗ ബെഞ്ചിന്‍റേതാണ്​ വിധി.