വീരസ്മരണ പുതുക്കി അവർ 'തല്ലിത്തീർത്തു'

പല്ലശ്ശന: കോവിഡ് മാനദണ്ഡം പാലിച്ച് ഓണത്തല്ല്, അവിട്ടത്തല്ല് എന്നിവ നടത്തി.

പല്ലശ്ശനയുടെ നാട്ടുരാജാവായിരുന്ന കുറൂർ നമ്പിടിയെ അയൽനാട്ടുരാജാവായിരുന്ന കുതിരവട്ടത്ത് നായർ യുദ്ധത്തിൽ ചതിച്ചുകൊന്നതിൽ രോഷംപൂണ്ട നാട്ടുമക്കൾ പ്രതികാരം തീർക്കാൻ ശത്രുരാജാവിനെതിരെ പോർവിളി നടത്തി പടനയിച്ചതി​െൻറ വീരസ്മരണ പുതുക്കിയാണ് ഓണത്തല്ലും അവിട്ടത്തല്ലും നടത്തിയത്. ​

കോവിഡ് കാലമായതിനാൽ കാഴ്ചക്കാരും ദേശവാസികളും പത്തിൽ ഒരുഭാഗം മാത്രമായി ചുരുങ്ങി. തിരുവോണദിവസം വിവിധ സമുദായത്തിലെ ദേശവാസികൾ തല്ലുമന്ദത്ത് ഭസ്മം തൊട്ട് കച്ചക്കെട്ടി എത്തി.

വിവിധ സമുദായത്തിലെ ഒരുകുടി, ഏഴുകുടി ദേശങ്ങളിൽനിന്ന്​ പൊന്തിപ്പിടിച്ച കാരണവർമാരുടെ നേതൃത്വത്തിലാണ് ദേശവാസികളിൽ ചിലർ ചടങ്ങ് നടത്താൻ എത്തിയത്. തല്ലുമന്ദം വേട്ടക്കൊരുമകൻ ക്ഷേത്രാങ്കണത്തിൽ രണ്ടുപേർ മാത്രമാണ് ആചാരപ്രകാരം ഓണത്തല്ല് നടത്തിയത്. പല്ലശ്ശന വേട്ടക്കൊരുമകൻ ക്ഷേത്രാങ്കണത്തിൽ അവിട്ടദിനമായ ചൊവ്വാഴ്​ച വൈകീട്ട്​ ചടങ്ങുകളിലായി മാത്രം ചുരുക്കി അവിട്ടത്തല്ല് നടത്തി.

കിഴക്കുമുറി, പടിഞ്ഞാറേമുറി നായർദേശക്കാരാണ് അവിട്ടത്തല്ലിൽ പങ്കെടുക്കുന്നത്. അപ്പുക്കുട്ടൻ, സുകുമാരൻ എന്നീ കാരണവൻമാർ പൊന്തിപ്പിടിച്ചു. ഓണത്തല്ലിന് വിവിധ ദേശങ്ങളെ പ്രതിനിധാനംചെയ്​ത്​ മാധവൻ, രാമചന്ദ്രൻ, ചെന്താമരാഴൻ, പരമേശ്വരൻ, രാജേഷ്, രതീഷ് എന്നിവർ ക്ഷേത്രസന്നിധിയിലെത്തി.

കൊല്ലങ്കോട് സർക്കിൾ ഇൻസ്പെക്ടർ എ. വിപിൻദാസ്, ആരോഗ്യവകുപ്പിലെ ബോബി. ഇ. ചെറിയൻ, പഞ്ചായത്ത് അധികൃതർ എന്നിവർ സന്നിഹിതരായിരുന്നു.