ബ​ത്തേ​രി-​കോ​ളി​മൂ​ല-​അ​യ്യ​ൻ​കൊ​ല്ലി ബ​സ് സർവിസ് പു​ന​രാ​രം​ഭി​ച്ചി​ല്ല

സു​ൽ​ത്താ​ൻ ബ​ത്തേ​രി: നീ​ല​ഗി​രി ജി​ല്ല​യി​ലെ മ​ല​യാ​ളി​ക​ൾ​ക്ക് ഏ​റെ ഉ​പ​കാ​ര​പ്ര​ദ​മാ​യി​രു​ന്ന ബ​ത്തേ​രി-​കോ​ളി​മൂ​ല-​അ​യ്യ​ൻ​കൊ​ല്ലി ബ​സ് സർവീസ് പു​ന​രാ​രം​ഭി​ക്കാ​ൻ ന​ട​പ​ടി​യാ​യി​ല്ല. സു​ൽ​ത്താ​ൻ ബ​ത്തേ​രി​യി​ൽ​നി​ന്ന് കെ.​എ​സ്.​ആ​ർ.​ടി.​സി ബ​സാ​ണ് അ​യ്യ​ൻ​കൊ​ല്ലി​യി​ലേ​ക്ക് സ​ർ​വി​സ് ന​ട​ത്തി​യി​രു​ന്ന​ത്. നാ​ലു​വ​ർ​ഷ​ത്തോ​ള​മാ​യി സ​ർ​വി​സ് നി​ർ​ത്ത​ലാ​ക്കി​യി​ട്ട്. ചു​ള്ളി​യോ​ട് അ​ഞ്ചാം​മൈ​ലി​ൽ​നി​ന്ന് തു​ട​ങ്ങു​ന്ന റോ​ഡ് കു​റു​ക്ക​ൻ​കു​ന്ന്-​കോ​ളി​മൂ​ല-​മാ​ങ്ങോ​ട് വ​ഴി അ​യ്യ​ൻ​കൊ​ല്ലി​യി​ലാ​ണ് അ​വ​സാ​നി​ക്കു​ന്ന​ത്. അ​ഞ്ചാം​മൈ​ലി​ൽ​നി​ന്ന് അ​യ്യ​ൻ​കൊ​ല്ലി​യി​ലേ​ക്ക് ഏ​ക​ദേ​ശം 10 കി​ലോ​മീ​റ്റ​റാ​ണ് ദൂ​രം.

സം​സ്ഥാ​ന അ​തി​ർ​ത്തി​യാ​ണ് കോ​ളി​മൂ​ല. കോവിഡ് കാ​ല​ത്തി​നു മു​മ്പാ​ണ് സു​ൽ​ത്താ​ൻ ബ​ത്തേ​രി ഡി​പ്പോ​യി​ലെ ബ​സ് ഈ ​റൂ​ട്ടി​ൽ സ​ർ​വി​സ് ന​ട​ത്തി​യി​രു​ന്ന​ത്. പി​ന്നീ​ട് പ​ല കാ​ര​ണ​ങ്ങ​ളാ​ൽ സ​ർ​വി​സ് മു​ട​ക്കു​ക​യാ​യി​രു​ന്നു. കെ.​എ​സ്.​ആ​ർ.​ടി.​സി നി​ന്ന​തോ​ടെ കു​റ​ച്ചു​കാ​ലം ഒ​രു സ്വ​കാ​ര്യ ബ​സും സ​ർ​വി​സ് ന​ട​ത്തി. എ​ന്നാ​ൽ, സ്വ​കാ​ര്യ ബ​സി​നെ ഗൂ​ഡ​ല്ലൂ​ർ ആ​ർ.​ടി.​ഒ പെ​ർ​മി​റ്റി​ന്റെ കാ​ര്യം പ​റ​ഞ്ഞ് പി​ടി​ച്ചെ​ടു​ത്തു. അ​തോ​ടെ ജ​നം തീ​ർ​ത്തും ദു​രി​ത​ത്തി​ലാ​യി. ബ​സു​ക​ൾ സ​ർ​വി​സ് തു​ട​ങ്ങു​ന്ന​തി​നു മു​മ്പ് ചു​ള്ളി​യോ​ടു​നി​ന്നും അ​തി​ർ​ത്തി പ്ര​ദേ​ശ​മാ​യ കോ​ളി​മൂ​ല വ​രെ സ്വ​കാ​ര്യ ജീ​പ്പു​ക​ൾ ലോ​ക്ക​ൽ സ​ർ​വി സ് ​ന​ട​ത്തി​യി​രു​ന്നു.

ബ​സ് വ​ന്ന​തോ​ടെ ജീ​പ്പു​ക​ൾ ഓ​ട്ടം നി​ർ​ത്തി. ബ​സ് നി​ർ​ത്തി പോ​യ​പ്പോ​ൾ ജീ​പ്പു​ക​ൾ തി​രി​കെ വ​ന്ന​തു​മി​ല്ല. ഇ​പ്പോ​ൾ ടാ​ക്സി വാ​ഹ​ന​ങ്ങ​ൾ മാ​ത്ര​മാ​ണ് ജ​ന​ത്തി​ന്റെ ആ​ശ്ര​യം.

റോ​ഡി​ന്റെ പ​രി​താ​പ​ക​രാ​വ​സ്ഥ​യും മ​റ്റു​മാ​യി​രു​ന്നു സ​ർ​വി​സ് നി​ർ​ത്ത​ലാ​ക്കാ​ൻ ബ​ത്തേ​രി കെ.​എ​സ്.​ആ​ർ.​ടി.​സി അ​ധി​കൃ​ത​ർ കാ​ര​ണം പ​റ​ഞ്ഞി​രു​ന്ന​ത്. അ​ഞ്ചാം​മൈ​ൽ മു​ത​ൽ കോ​ളി​മൂ​ല വ​രെ​യു​ള്ള ര​ണ്ട​ര കി​ലോ​മീ​റ്റ​റോ​ളം ഭാ​ഗ​ത്ത് ഒ​ന്നു​ര​ണ്ടി​ട​ങ്ങ​ളി​ൽ ഇ​പ്പോ​ൾ ചെ​റി​യ കു​ഴി​ക​ളു​ണ്ട്. എ​ന്നാ​ൽ കോ​ളി​മൂ​ല മു​ത​ൽ അ​യ്യ​ൻ​കൊ​ല്ലി വ​രെ​യു​ള്ള എ​ട്ടു കി​ലോ​മീ​റ്റ​ര്‍ റോ​ഡ് ര​ണ്ടു​വ​ർ​ഷം മു​മ്പാ​ണ് ത​മി​ഴ്നാ​ട് പു​തു​ക്കി പ​ണി​ത​ത്. അ​തോ​ടെ റോ​ഡ് ഉ​ന്ന​ത നി​ല​വാ​ര​ത്തി​ലാ​യി.

അ​യ്യ​ൻ​കൊ​ല്ലി ഉ​ൾ​പ്പെ​ടെ ത​മി​ഴ്നാ​ട്ടി​ലെ ചി​ല പ്ര​ദേ​ശ​ങ്ങ​ളി​ൽ ചി​കി​ത്സ സൗ​ക​ര്യ​ങ്ങ​ൾ വ​ള​രെ കു​റ​വാ​ണ്. അ​തി​നാ​ൽ ബ​ത്തേ​രി​യി​ലേ​ക്ക് ചി​കി​ത്സ ആ​വ​ശ്യ​ത്തി​നാ​യി എ​ത്തു​ന്ന​വ​ർ നി​ര​വ​ധി​യാ​ണ്. പ​ഴ​യ കെ.​എ​സ്.​ആ​ർ.​ടി.​സി സ​ർ​വി​സ് അ​വ​ർ​ക്ക് വ​ലി​യ ഉ​പ​കാ​ര​മാ​യി​രു​ന്നു. കോവിഡ് കാ​ല​ത്തി​നു​മു​മ്പ് കോ​ളി​മൂ​ല-​അ​യ്യ​ൻ​കൊ​ല്ലി സ​ർ​വി​സ് ആ​രം​ഭി​ച്ച​പ്പോ​ൾ കോ​ളി​മൂ​ല​യി​ൽ ബ​സി​ന് നാ​ട്ടു​കാ​ർ സ്വീ​ക​ര​ണം കൊ​ടു​ത്ത​ത് വ​ലി​യ ആ​ഘോ​ഷ​പൂ​ർ​വ​മാ​ണ്.