കൊട്ടാരക്കരയിൽ ആംബുലന്‍സും ലോറിയും കൂട്ടിയിടിച്ച് രോഗിയും ഭാര്യയും മരിച്ചു; ഏഴുപേർക്ക് പരിക്ക്

കൊല്ലം: കൊട്ടാരക്കരയിൽ ആംബുലൻസും ലോറിയും കൂട്ടിയിടിച്ച് രോഗിയടക്കം രണ്ടുപേർ മരിച്ചു. ഏഴ് പേർക്ക് പരിക്കേറ്റു.

ആംബുലൻസിലുണ്ടായിരുന്ന അടൂർ ഏഴംകുളം സ്വദേശികളായ തമ്പി (65), ഭാര്യ ശ്യാമള (60) എന്നിവരാണ് മരിച്ചത്. തമ്പിയെ ആശുപത്രിയിലേക്ക് കൊണ്ടുപോകും വഴിയാണ് അപകടം.

എം.സി റോഡിൽ കൊട്ടാരക്കര സദാനന്ദപുരത്ത് അർധരാത്രിയോടെയാണ് സംഭവം. അടൂരിൽ നിന്ന് തിരുവനന്തപുരത്തേക്ക് പോകുകയായിരുന്ന ആംബുലൻസും കോഴിയുമായി പോകുകയായിരുന്ന ലോറിയുമാണ് കൂട്ടിയിടിച്ചത്.

ആംബുലൻസിലുണ്ടായിരുന്ന മറ്റു മൂന്ന് പേർക്കും ലോറിയിലുണ്ടായിരുന്ന നാല് പേർക്കുമാണ് പരിക്കേറ്റത്. ഇവരെ തിരുവനന്തപുരം മെഡിക്കൽ കോളജിലേക്ക് മാറ്റി.