മൂന്നര വയസ്സുകാരിയുടെ ശരീരത്തിലെ മുറിവ്​ പീഡനം മൂലമല്ലെന്ന് പിതാവ്

ഗാന്ധിനഗർ (കോട്ടയം): മാരകപരി​േക്കാടെ കോട്ടയം മെഡിക്കൽ കോളജ് കുട്ടികളുടെ ആശുപത്രിയിൽ ചികിത്സയിൽ കഴിയുന്ന മൂന്നര വയസ്സുകാരി പീഡനത്തിന്​ ഇരയായിട്ടില്ലെന്ന് പിതാവ്. സ്വകാര്യഭാഗങ്ങളിലെ മുറിവ് സൈക്കിളി‍െൻറ സീറ്റ് ഒടിഞ്ഞ് കമ്പി കുത്തിക്കയറി ഉണ്ടായതാണെന്നാണ്​ പിതാവ് പറയുന്നത്​. അതിനാൽ ലൈംഗികപീഡനം നടന്നിട്ടുണ്ടോയെന്ന് സ്ഥിരീകരിക്കാൻ കൂടുതൽ പരിശോധന നടത്താനൊരുങ്ങുകയാണ് മെഡിക്കൽ ബോർഡ്.

ചൊവ്വാഴ്ച ആശുപത്രി അധികൃതർ മൂവാറ്റുപുഴ പൊലീസിന് ചികിത്സ സംബന്ധമായ പ്രാഥമിക മെഡിക്കൽ റിപ്പോർട്ട് നൽകിയിരുന്നു. കുട്ടിയുടെ സ്വകാര്യഭാഗങ്ങളിലെ മുറിവ്​ മൂർച്ചയുള്ള വസ്തുകൊണ്ട്​ ഉണ്ടായതാണെന്നും കൈകാലുകൾ ഒടിഞ്ഞിട്ടുണ്ടായിരുന്നെന്നും റിപ്പോർട്ടിൽ പറയുന്നു. വാരിയെല്ലിന്​ പൊട്ടലും തലക്ക്​ ചെറിയ മുറിവുകളും ഉണ്ടായിരുന്നു. പഴക്കമുള്ള ഈ മുറിവുകൾക്ക് വേണ്ടവിധം ചികിത്സ നൽകിയിരുന്നില്ല. ഫോറൻസിക്, അസ്ഥിരോഗ വിഭാഗങ്ങൾ നടത്തിയ പരിശോധനയിലാണ് ഈ കണ്ടെത്തൽ. ശരീരത്തിലെ മുറിവുകൾ പീഡനമോ ക്രൂരമർദനം മൂലമോ ഉണ്ടാകാൻ സാധ്യതയുണ്ടെന്നാണ് മെഡിക്കൽ ബോർഡ് വിലയിരുത്തൽ. ഇത് സ്ഥിരീകരിക്കാൻ ഗ്യാസ്ട്രോഎൻ​േട്രാളജിയുൾപ്പെടെ കൂടുതൽ പരിശോധനക്കുശേഷം തിങ്കളാഴ്ച മെഡിക്കൽ ബോർഡ് കൂടാനാണ് ആശുപത്രി അധികൃതരുടെ തീരുമാനം.

രണ്ടാനമ്മയാണെങ്കിലും ഭാര്യക്ക്​ ത​െൻറ മകളെ ഇഷ്​ടമാണെന്നും ഉപദ്രവിക്കുമെന്ന് വിശ്വസിക്കുന്നില്ലെന്നും പിതാവ് പറയുന്നു. ഇറച്ചിക്കടയിൽ ജോലി ചെയ്യുന്ന താൻ വീട് പുറത്തുനിന്ന്​ പൂട്ടിയ ശേഷമാണ് ജോലിക്ക് പോകുന്നത്​. മാസത്തിൽ ഒന്നോ രണ്ടോ തവണ എത്തുന്ന ഭാര്യസഹോദരൻ കുട്ടിയോട് സ്നേഹപൂർവമാണ്​ പെരുമാറിയിരുന്നത്​. കുട്ടിക്കുണ്ടായ പരിക്കുകളിൽ ഇദ്ദേഹത്തെ സംശയിക്കുന്നില്ല. കാലിലെ പൊട്ടൽ കുളിമുറിയിൽ തെന്നിവീണപ്പോൾ ഉണ്ടായതാണ്​. എന്നാൽ, വലതുകൈയിലെ ഒടിവും വാരിയെല്ലിനേറ്റ പൊട്ടലും എങ്ങനെ ഉണ്ടായതാണെന്ന്​ അറിയില്ലെന്നും പിതാവ് പറയുന്നു.

മാർച്ച് 27ന് വയറുവേദനയെത്തുടർന്നാണ് മൂവാറ്റുപുഴ പെരുമുറ്റത്ത്​ വാടകക്ക്​ താമസിക്കുന്ന അസം സ്വദേശിയുടെ മൂന്നര വയസ്സുകാരി മകളെ കോട്ടയം മെഡിക്കൽ കോളജ് കുട്ടികളുടെ ആശുപത്രിയിൽ പ്രവേശിപ്പിച്ചത്. തുടർന്ന് നടത്തിയ പരിശോധനയിലാണ് സ്വകാര്യഭാഗങ്ങളിൽ മുറിവുകൾ കണ്ടെത്തിയത്​.