കൊല്ലാൻ ഇസ്രായേൽ; മരിക്കാതിരിക്കാൻ ദീഫ്

60 ലേറെ കുഞ്ഞുങ്ങൾ ഉൾപ്പെടെ 230 ഫലസ്​തീനികൾ കൊല്ലപ്പെടുകയും അസംഖ്യം കെട്ടിടങ്ങൾ തകർക്കപ്പെടുകയും ചെയ്​ത, 11 ദിവസം കഴിഞ്ഞ ഇസ്രയേലിൻെറ ഗസ്സ ആക്രമണത്തിന്​ സമാന്തരമായി ഹമാസും ഇസ്രയേൽ സൈന്യവു​ം തമ്മിൽ മറ്റൊരു രഹസ്യ മനശാസ്​ത്ര യുദ്ധം നടക്കുകയായിരുന്നുവെന്ന വിവരങ്ങൾ പുറത്തുവരുന്നു. ഹമാസിൻെറ ​സായുധ വിഭാഗമായ അൽഖസം ബ്രിഗേഡിൻെറ തലവൻ മുഹമ്മദ്​ ദീഫി​ൻെറ തലയ്​ക്ക്​ വേണ്ടിയുള്ള അതിശക്​തമായ നീക്കങ്ങളാണ്​ ഇസ്രയേൽ ഇൗ കഴിഞ്ഞ 11 ദിവസങ്ങളിലും നടത്തിക്കൊണ്ടിരുന്നത്​. ദീഫിനെ കാക്കാൻ ഹമാ സ്​ അതിൻെറ സകല വിഭവ ശേഷിയും എടുത്ത്​ പ്രയോഗിക്കുകയും ചെയ്​തു. 11 ദിവസത്തിനിടെ ഏറ്റവും കുറഞ്ഞത്​ രണ്ടു വലിയ വ്യോമാക്രമണങ്ങൾ ഇതിനായി ഇസ്രയേൽ ഗസ്സയിൽ നടത്തി. ഒൗദ്യോഗികമായി പുറത്തുവിട്ട ഇൗ രണ്ട്​ ആക്രമണങ്ങൾക്ക്​ പുറമേ, ഗസ്സയിലെ രഹസ്യ ചാര സംവിധാനങ്ങൾ ഉപ​േയാഗിച്ച്​ ദീഫിനെ വധിക്കാനുള്ള നീക്കങ്ങളും നടന്നിരിക്കാമെന്നാണ്​ അനുമാനം. പക്ഷേ, രണ്ടുതവണയും അത്​ഭുതകരമായ ദീഫ്​ രക്ഷപ്പെട്ടു.

ഗസ്സ അതിർത്തിയിലേക്ക്​ നൂറുകണക്കിന്​ ടാങ്കുകൾ നീക്കുകയും 9,000 റിസർവ്​ സൈനികരെ വിളിച്ചുവരുത്തുകയും ചെയ്​തിട്ടും കരയുദ്ധം തുടങ്ങാതെ, ലക്ഷ്യമില്ലാതെ കെട്ടിടങ്ങൾ മാത്രം ബോംബിടുകയാണെന്ന ആക്ഷേപം രാജ്യത്തിനുളളിൽ നിന്ന്​ തന്നെ കേട്ടിട്ടും ഇസ്രയേൽ വ്യോമാക്രമണങ്ങൾ ഇതുവരെ തുടർന്നതിന്​ പിന്നിൽ ദീഫ്​ ഉൾപ്പെടെ ഹമാസ്​ നേതാക്കളെ വകവരുത്തുക എന്ന ലക്ഷ്യമായിരുന്നു. ഇൻറലിജൻസ്​ വിവരങ്ങളുടെ അടിസ്​ഥാനത്തിലുള്ള ബോംബിങ്​, സൈനിക ലക്ഷ്യം എന്നൊക്കെ പറഞ്ഞിരുന്ന ആക്രമണങ്ങളാണ്​ യഥാർഥത്തിൽ സാധാരണക്കാരെ കുരുതി കൊടുത്തിട്ടാണെങ്കിലും ദീഫിനെയും മറ്റ്​ നേതാക്കളെയും വധിക്കാനുള്ള ഉദ്യമങ്ങളായിരുന്നുവെന്ന്​ വ്യക്​തമാകുന്നത്​.

ഹമാസിൻെറയും ഇസ്​ലാമിക്​ജിഹാദിൻെറയും ​ൈസനിക, ആയുധ ശേഷി ഗണ്യമായി നശിപ്പിക്കുക, അവരുടെ സംവിധാനങ്ങൾ തകർക്കുക, നേതാക്കളെ വധിക്കുക എന്നിവയായിരുന്നു 'ഗാർഡിയൻ ഒാഫ്​ ദ വാൾസ്​' എന്ന്​ വിളിക്കുന്ന നിലവിലെ ​ൈസനിക നടപടിയുടെ ലക്ഷ്യങ്ങളെന്ന്​ ഇസ്രയേൽ തന്നെ വ്യക്​തമാക്കിയിരുന്നു. പ്രധാന നേതാക്കളെ വധിക്കുകയെന്ന ലക്ഷ്യം ഒഴികെ ബാക്കിയുള്ളവയൊക്കെ ഏകദേശം കൈവരിച്ചതായി ഇസ്രയേൽ സൈന്യം വിശദീകരിക്കുന്നു.

കുറഞ്ഞത്​ രണ്ടുതവണയെങ്കിലും ദീഫ്​ തങ്ങളിൽ നിന്ന്​ വഴുതിയെന്ന്​ ഇസ്രയേലി ഡിഫൻസ്​ ഫോഴ്​സ്​ വക്​താവ്​ ഹിദായ്​ സിൽബെർമാൻ തന്നെയാണ്​ ബുധനാഴ്​ച വ്യക്​തമാക്കിയത്​. ഒന്നുരണ്ടു ദിവസങ്ങൾക്ക്​ മ​​ുമ്പ്​ തന്നെ പരാജയപ്പെട്ട ഇൗനീക്കങ്ങളെ കുറിച്ച്​ ചില ഇസ്രയേലി മാധ്യമങ്ങൾക്ക്​ വിവരം ലഭിച്ചിരു​ന്നുവെങ്കിലും പ്രസിദ്ധീകരിക്കുന്നതിന്​ വിലക്കുണ്ടായിരുന്നു. ആ വിലക്ക്​ ചൊവ്വാഴ്​ച രാത്രിയോടെയാണ്​ നീക്കിയത്​. വിലക്ക്​ നീക്കിയതിന്​ അർഥം ഇന്നോ നാ​ളെയോ വെടിനിർത്തൽ ഉണ്ടാകുമെന്നാണെന്ന്​ ചില നിരീക്ഷകർ ചൂണ്ടിക്കാട്ടുന്നു.

ആരാണ്​ മുഹമ്മദ്​ ദീഫ്​ ?

ഇസ്രയേൽ സൈന്യം ഇത്ര ഗൗരവത്തോടെ കൈകാര്യം ചെയ്യാൻ മാത്രം എന്തുപ്രധാന്യമാണ്​ മുഹമ്മദ്​ ദീഫിനുള്ളതെന്ന്​ പെട്ടന്ന്​ ആർക്കും സംശയം തോന്നാം. പക്ഷേ, ദീഫിൻെറ ചരിത്ര​മറിഞ്ഞാൽ ആ സംശയം നീങ്ങും. '90 കളുടെ തുടക്കത്തിലാണ്​ ദീഫ്​ (55) ഹമാസിനൊപ്പം ചേരുന്നത്​. ഹമാസ്​ സായുധവിഭാഗം നേതാക്കളായ യഹ്​യ അയ്യാശിൻെറയും അദ്​നാൻ അൽഗൂലിൻെറയും സമകാലീനനാണ്​ ദീഫ്​. ഇരുവരും പിൽക്കാലത്ത്​ ഇസ്രയേൽ ആക്രമണങ്ങളിൽ കൊല്ലപ്പെട്ടു.

'90 കളിൽ ബസുകളിലും മറ്റും ഹമാസ്​ ചാവേർ ആക്രമണങ്ങൾ നടത്തുന്ന കാലത്തേ ഇസ്രയേലിൻെറ നോട്ടപ്പുള്ളിയാണ്​ ദീഫ്​. അന്നുമുതൽ ഇപ്പോൾ നടക്കുന്ന ഹമാസിൻെറ റോക്കറ്റ്​ ആക്രമണങ്ങളിൽ വരെ ദീഫിൻെറ കൈമുദ്രയുണ്ട്​. ഇപ്പോഴത്തെ സംഘർഷത്തിൻെറ തുടക്കത്തിൽ തെൽ അവീവിലേക്ക്​ കഴിഞ്ഞ ബുധനാഴ്​ച 130 മിസൈലുകൾ തൊടുത്തത്​ പോലും ദീഫിൻെറ നിർദേശത്തെ തുടർന്നാണ്​. നൂറുകണക്കിന്​ ഇസ്രയേലികളുടെ മരണത്തിന്​ കാരണക്കാരനാണ്​ ദീഫ്​ എന്നതിനാൽ തന്നെ അയാളോട്​ പ്രത്യേകമായൊരു വി​േദ്വഷം ഇസ്രയേലി സൈന്യത്തിനുണ്ട്​. '95 മുതൽ ​െഎ.ഡി.എഫിൻെറ മോസ്​റ്റ്​ വാണ്ടഡ്​ പട്ടികയിൽ ഒന്നാം സ്​ഥാനത്ത്​. 2015 മുതൽ അമേരിക്കയുടെ ഭീകര പട്ടികയിലും ദീഫ്​ ഉൾപ്പെടുന്നു.

കഴിഞ്ഞ മൂന്നുപതിറ്റാണ്ടിലേറെയായി ഒളിവുജീവിതത്തിലാണ്​ ദീഫ്​. ഏതാണ്ട്​ ഒമ്പതുതവണയാണ്​ ഇസ്രയേൽ ദീഫിനെ ഇല്ലാതാക്കാൻ​ വേണ്ടി ഇന്നേവരെ ആക്രമണങ്ങൾ നടത്തിയത്​. നേരിട്ടുള്ള ആക്രമണം, വീടുകൾക്ക്​ മുകളിലുള്ള​ ബോംബിങ്​, കാറിന്​മേലുള്ള മിസൈൽ വർഷം തുടങ്ങി ഇസ്രയേൽ പരീക്ഷിക്കാത്ത വിദ്യകളില്ല. പക്ഷേ, ഒാരോ തവണയും അയാൾ രക്ഷ​െപ്പട്ടുപോന്നു.

ദീഫിനെതിരായ അറിയപ്പെടുന്ന ആദ്യ ആക്രമണം നടന്നത്​ 2001 ലാണ്​. 2002 ലെ രണ്ടാം ആക്രമണത്തിൽ ദീഫ്​ കൊല്ലപ്പെട്ടുവെന്നായിരുന്നു ആദ്യ വിലയിരുത്തൽ. പക്ഷേ, അത്​ഭുതകരമായി രക്ഷപ്പെട്ട കഥയാണ്​ പിന്നീട്​ പുറത്തുവന്നത്​. പക്ഷേ, ആ ആക്രമണത്തിൽ ഒരു കണ്ണ്​ നഷ്​ടമായി. തൊട്ടടുത്ത വർഷം തന്നെ അടുത്ത ശ്രമം. അതും പരാജയം. പക്ഷേ, അടുത്ത അനുയായി അദ്​നാൽ അൽഗൂലിന്​ ജീവൻ നഷ്​ടമായി. 2006 ൽ ദീഫ്​ മരണത്തിൻെറ പടിവാതിലിൽ നിന്ന്​ തിരിച്ചുവന്നു. ഹമാസ്​ നേതാക്കള​ുടെ യോഗം നടന്ന കെട്ടിടത്തിന്​ നേർക്ക്​ ഇസ്രയേലി യുദ്ധവിമാനങ്ങൾ മിസൈൽ തൊടുക്കുകയായിരുന്നു. നിരവധി പേർ കൊല്ലപ്പെട്ട ഇൗ ആക്രമണത്തിൽ നിന്ന്​ ദീഫിനെ ആശുപത്രിയിലേക്ക്​ കൊണ്ടുപോകുന്നത്​ മരിച്ചുവെന്ന്​ കരുതിയാണ്​. പക്ഷേ, ജീവൻെറ ചെറു കണിക ബാക്കിയായിരുന്നു. ജീവൻ രക്ഷപ്പെടുത്തിയെങ്കിലും ദീഫ്​ അതിന്​ നൽകിയ വില ഏറെ വലുതായിരുന്നു. ഇരുകാലുകളും ഒരു കൈയും മുറിച്ചുമാറ്റേണ്ടി വന്നു. ന​െട്ടല്ലിന്​ ഏറ്റ പരിക്ക്​ പിന്നീട്​ ചലനശേഷിയെ ബാധിച്ചു.

2014 ൽ അടുത്ത വലിയ ആക്രമണം. ഗസ്സയിലെ ശൈഖ്​ റദ്​വാൻ മേഖലയിൽ ദീഫ്​ ഉണ്ടെന്ന്​ ഉറപ്പിച്ച കെട്ടിടത്തിന്​ മുകളിൽ അഞ്ച്​ മാരക ലേസർ ബോംബുകൾ വർഷിക്കപ്പെട്ടു. നാലുനില കെട്ടിടം തവിടുപൊടിയായി. ദീഫിൻെറ ഭാര്യ വിദാദ്​ (28), മകൾ മൂന്നുവയസുകാരി സാറ, മകൻ ഏഴുമാസം പ്രായമുള്ള അലി എന്നിവരുടെയും ഏതാനും അടുത്ത ബന്ധുക്കളുടെയും മൃതദേഹം മണിക്കൂറുകൾക്ക്​ ശേഷമാണ്​ അവശിഷ്​ടങ്ങൾക്കിടയിൽ നിന്ന്​ പുറത്തെടുത്തത്​. ദീഫും മരിച്ചുവെന്ന്​ ഇസ്രയേൽ ആദ്യം കരുതി. മണിക്കൂറുകൾക്ക്​ ശേഷം വ്യക്​തമായി, ഭാഗ്യം ഒരിക്കൽ കൂടി ദീഫിനെ കടാക്ഷിച്ചിരിക്കുന്നു.​ ബോംബിങ്​ നടക്കു​േമ്പാൾ ദീഫ്​ കെട്ടിടത്തിൽ ഉണ്ടായിരുന്നില്ല. ഭാര്യയുടെയും മക്കളുടെയും മരണം നടന്ന ഇൗ ആക്രമണത്തിന്​ ശേഷം ദീഫ്​ വിഷാദ രോഗിയായി. ഹമാസിനുള്ളിൽ നിന്ന്​ തന്നെയുള്ള വിവര ചോർച്ചയിലേക്കാണ്​ ഇൗ ആക്രമണം അന്ന്​ വിരൽ ചൂണ്ടിയത്​.

തൊട്ടടുത്ത വർഷം ദീഫിനെ​ വെടിവെച്ചുകൊല്ലാനുള്ള ശ്രമവുമുണ്ടായി. ഇവ കൂടാതെ പല ചെറിയ നീക്കങ്ങളും ദീഫിന്​ നേർക്കുണ്ടായി.

ഇത്തവണ ദീഫിന്​ നേർക്കുണ്ടായ ആക്രമണങ്ങ​െള കുറിച്ച്​ വിശദീകരിച്ചത്​ ​െഎ.ഡി.എഫിൻെറ സതേൺ കമാൻഡ്​ തലവൻ എലിസർ തോലെദാനോയാണ്​. ഗസ്സ ഒാപറേഷനിൽ നിർണായക പങ്കുവഹിക്കുന്ന ഉദ്യോഗസ്​ഥനാണ്​എലിസർ. ദീഫിനെയും ഹമാസിൻെറ ഗസ്സയിലെ മറ്റൊരുപ്രമുഖ നേതാവ്​ യഹ്​യ സിൻവറിനെയുമാണ്​ പ്രധാനമായും ലക്ഷ്യം വെച്ചതെന്ന്​ അദ്ദേഹം പറഞ്ഞു. ശനിയാഴ്​ചയാണ്​ സിൻവാറിൻെറ ഗസ്സയിലെ വീട്​ ഇസ്രയേൽ ബോംബിട്ട്​ തകർത്തത്​. ഇരുവരും ഞങ്ങളുടെ കൺവെട്ടത്തുണ്ടായിരുന്നുവെന്നും ഇപ്പോഴും ഉണ്ടെന്നും എലിസർ അവകാശപ്പെട്ടു.

ഇസ്രയേലിൻെറ സദാ തുറന്നിരിക്കുന്ന ചാരക്കണ്ണുകളിൽ നിന്ന്​ രക്ഷപ്പെടാൻ ഡിജിറ്റൽ ഡിവൈസുകൾ പൂർണമായും ഒഴിവാക്കിയാണ്​ ദീഫ്​ കഴിയുന്നതെന്ന്​ സുരക്ഷ വിദഗ്​ധർ അനുമാനിക്കുന്നു. കുറിപ്പുകളും കൊറിയറുകളുമാണ്​ അദ്ദേഹത്തിൻെറ വിനിമയ മാർഗങ്ങളത്രെ. വളരെ കുറച്ച്​ വ്യക്​തികളുമായി മാത്രമേ നേരിട്ട്​ ഇടപഴകുന്നുമുള്ളു. ഇപ്പോൾ 55 വയസുള്ള ദീഫിൻെറ പുതിയൊരു ചിത്രം പോലും ലഭ്യമല്ല. ആകെയുള്ളത്​ കുറഞ്ഞത്​ 25 വർഷം മുമ്പുള്ള ചിത്രമാണ്​.

വെള്ളിയാഴ്​ചയോടെ വെടിനിർത്തൽ ഉണ്ടാകുമെന്നാണ്​ പ്രമുഖ രാജ്യാന്തര മാധ്യമങ്ങൾ ഇ​േപ്പാൾ പ്രവചിക്കുന്നത്​. പക്ഷേ, ക​ൃത്യമായ ഒരു വിജയം പ്രഖ്യാപിക്കാനാകാതെ നെതന്യാഹുവിന്​ എങ്ങനെ വെടിനിർത്തലിലേക്ക്​ പോകാനാകുമെന്ന്​ സംശയിക്കുന്നവരുമുണ്ട്​. കരയുദ്ധം ഏതാണ്ട്​ വിദൂര സാധ്യതയായ നിലയ്​ക്ക്​ ഇനിയുള്ള മണിക്കൂറുകൾ നിർണായകമാണ്​. ദീഫ്​ ഉൾപ്പെടെ നേതാക്കളെ വധിച്ച്​ രാഷ്​ട്രത്തിന്​ മുന്നിൽ നേട്ടമായി ഉയർത്തിക്കാട്ടി യുദ്ധം അവസാനിപ്പിക്കാനായിരിക്കും നെതന്യാഹുവിൻെറ ശ്രമം. ജീവിച്ചിരിക്കാനുള്ള പോരാട്ടത്തിലായിരിക്കും ഇൗ മണിക്കൂറുകളിൽ ദീഫ്​ എന്ന്​ ഉറപ്പാണ്​.

ഇസ്രയേലി മിലിറ്ററി അഫയേഴ്​സ്​ ​േജണലിസ്​റ്റും മൊസാദിനെ കുറിച്ച്​ 'Rise And Kill First' എന്ന പുസ്​തകം രചിക്കുകയും ചെയ്​ത റോനൻ ബെർഗ്​മാ​ൻ റിപ്പോർട്ട്​ ചെയ്യുന്നത്​ 48 മണിക്കൂറിനുള്ളിൽ എന്തായാലും യുദ്ധം അവസാനിക്കുമെന്നാണ്​. വെടിനിർത്തൽ വ്യവസ്​ഥകളും അദ്ദേഹം പറയുന്നു: എല്ലാ ആക്രമണങ്ങളും ഇസ്രയേൽ അവസാനിപ്പിക്കും. മുതിർന്ന ഹമാസ്​ നേതാക്കളെ വധിക്കാനുള്ള ശ്രമവും നിർത്തും. പകരം, ഹമാസ്​ റോക്കറ്റാക്രമണം അവസാനിപ്പിക്കും. ടണല​ുകൾ കുഴിക്കുന്നതും അതിർത്തി വേലിക്ക്​ സമീപം പ്രകടനങ്ങൾ നടത്തുന്നതും നിർത്തും.'. പക്ഷേ, ഇൗ അവസാന മണിക്കൂറുകൾ നിർണായകമാണ്​. ഹമാസിനും ദീഫിനും.