ആദ്യഘട്ട വോ​ട്ടെടുപ്പ്​ സൂചിപ്പിക്കുന്നത്​

വ്യാഴാഴ്​ച ആദ്യഘട്ട പോളിങ്​ നടന്ന പടിഞ്ഞാറൻ യു.പിയിൽ ഏറെ ആവേശപൂർവമാണ്​ വോട്ടർമാർ ബൂത്തിലേക്കൊഴുകിയത്​. ഇതിൽനിന്ന്​ എന്താണ്​ വായിച്ചെടുക്കേണ്ടത്​​? നിലവിലെ ഭരണത്തിനെതിരായ വികാരമാണ്​ ​​വോട്ടർമാരെ കൂട്ടമായി പോളിങ്​ സ്​റ്റേഷനിലെത്തിച്ചതെന്ന്​ ഉറപ്പിക്കാൻ കഴിയുമോ? അതാണ്​ വാസ്​തവമെങ്കിൽ തുടർഭരണം തേടുന്ന യോഗിക്കും സംഘത്തിനും അൽപം തലവേദനതന്നെയാവും.

58 മണ്ഡലങ്ങളിലേക്കാണ്​ കഴിഞ്ഞ ദിവസം വോ​ട്ടെടുപ്പ്​ നടന്നത്​. 2017ലെ തെരഞ്ഞെടുപ്പിൽ ആകെയുള്ള 403ൽ 312 സീറ്റുകളിൽ വിജയം കൈവരിച്ച ബി.ജെ.പിക്ക്​ 53 എണ്ണം സംഭാവന ചെയ്​ത മേഖലയാണ്​ പടിഞ്ഞാറൻ യു.പി.

കഴിഞ്ഞ കുറി ഈ മേഖലയിൽ അഭൂതപൂർവമായ നേട്ടം കൊയ്യാൻ ബി.ജെ.പിക്ക്​ തുണയായതെന്താണെന്ന്​ നാം ഏവരും ഓർമിക്കുന്നുണ്ട്​. 2013ലെ കുപ്രസിദ്ധമായ മുസഫർനഗർ വംശീയ അതിക്രമത്തെ തുടർന്ന്​ വൻതോതിൽ പ്രകടമായ ഹിന്ദു ധ്രുവീകരണമായിരുന്നു അതിന്​ കാരണം. ജാട്ടുകൾക്ക്​ മേൽക്കോയ്​മയുള്ള ഈ കർഷക മേഖലയിൽ ഹിന്ദുക്കൾക്കും മുസ്​ലിംകൾക്കുമിടയിൽ വലിയ വിടവ്​ സൃഷ്ടിക്കുന്നതിൽ വിജയിച്ച ബി.ജെ.പിക്ക്​ തെരഞ്ഞെടുപ്പ്​ വിജയം അത്രയേറെ പ്രയാസമില്ലാത്ത ഒരു ഏർപ്പാടായി മാറുകയായിരുന്നു. എന്നാലിന്ന്​ പരമ്പരാഗതമായി നിലനിന്നിരുന്ന സൗഹാർദത്തിലേക്ക്​ ജാട്ടുകളും മുസ്​ലിംകളും മടങ്ങിയെത്തിക്കൊണ്ടിരിക്കുന്നതായി കാണാം. അവർക്കിടയിലെ മുറിവുകൾ ഉണങ്ങിക്കൊണ്ടിരിക്കുന്നു. വിവാദ കാർഷിക നിയമങ്ങൾ അടിച്ചേൽപിച്ച്​ കർഷകസമൂഹത്തെ സമരത്തിലേക്കും ദുരിതങ്ങളിലേക്കും തള്ളിവിട്ട മോദി സർക്കാർ നടപടി ഒരുതരത്തിൽ പറഞ്ഞാൽ അടിസ്​ഥാന വിഭാഗങ്ങൾക്കിടയിൽ ഐക്യത്തിനുള്ള പാലമായി മാറുകയായിരുന്നു.

സമുദായങ്ങൾക്കിടയിൽ രൂപപ്പെട്ട ​ഐക്യം ഭരണപാർട്ടിയെ നന്നായി ആശങ്കയിലാക്കിയിട്ടുണ്ട്​. തെരഞ്ഞെടുപ്പിനു​ മുമ്പായി അവർക്കിടയിൽ വേർതിരിവ്​ സൃഷ്​ടിക്കാൻ കിട്ടുന്ന ഒരു അവസരം പോലും പാഴാക്കാതിരിക്കാനും ഭരണപക്ഷം ശ്രദ്ധിക്കുന്നുമുണ്ട്​.

മനസ്സില്ലാമനസ്സോടെയാണെങ്കിലും കാർഷിക നിയമങ്ങൾ പിൻവലിക്കാൻ മോദി സർക്കാർ സന്നദ്ധമായത്​ ജാട്ടുകളെ വരുതിയിലാക്കാൻ വേണ്ടിത്തന്നെയായിരുന്നു. പക്ഷേ, അപ്പോഴേക്കും 700ഓളം കർഷകരുടെ ജീവൻ പൊലിഞ്ഞിരുന്നു, അത്​ അത്ര പെ​ട്ടെന്ന്​ മറക്കാനും പൊറുക്കാനും കഴിയുന്ന നഷ്​ടമല്ലല്ലോ. കാർഷിക നിയമങ്ങൾ പിൻവലിക്കാൻ തയാറായി എന്നതു ശരിതന്നെ. പക്ഷേ, ഭീകരവാദികളെന്നും ഖലിസ്​ഥാനികളെന്നും വിഘടനവാദികളെന്നുമൊക്കെയുള്ള വിളി കേട്ടതി​ന്റെ വിഷമം കർഷകരിലുണ്ട്​.

അക്കിടി മനസ്സിലാക്കിയ പ്രധാനമന്ത്രി മോദിയും ആഭ്യന്തരമന്ത്രി അമിത്​ ഷായും അവർക്ക്​ എളുപ്പത്തിൽ വഴങ്ങുന്ന വിദ്യ പുറത്തെടുത്തതിൽ യാതൊരത്ഭുതവുമില്ല. പക്ഷേ, ജാട്ടുകളെയും മുസ്​ലിംകളെയും വീണ്ടും തമ്മിൽ തെറ്റിക്കാനുള്ള ശ്രമം അങ്ങനെ വിലപ്പോയില്ലെന്ന്​ പറയേണ്ടിവരും.

ഞങ്ങളൊരു മാറ്റത്തിനാണ്​ കാത്തിരിക്കുന്നത്​ എന്നായിരുന്നു 11 കാർഷിക ജില്ലകളിലും റിപ്പോർട്ടർമാരോടുള്ള സാമാന്യ ജനങ്ങളുടെ പ്രതികരണം. ബി.ജെ.പിയുടെ അവകാശവാദങ്ങളും വാഗ്​ദാനങ്ങളും പുതുമ നഷ്​ടപ്പെട്ടവയും വിരസവുമായി അവർക്ക്​ തോന്നിത്തുടങ്ങി എന്നതുതന്നെ കാര്യം. വിലക്കയറ്റവും തൊഴിലവസരങ്ങൾ സൃഷ്​ടിക്കുന്നതിൽ സർക്കാർ പുലർത്തിയ ഉപേക്ഷയും ഉൾപ്പെടെ മറ്റു ചില വിഷയങ്ങളും ഈ മേഖലയിലെ ജനങ്ങളെ അലട്ടുന്നുണ്ട്​.

അഖിലേഷ് ​യാദവ്-ജയന്ത്​ ചൗധരി സഖ്യം നടത്തുന്ന പ്രചാരണത്തെ മുഖ്യമന്ത്രി യോഗി ആദിത്യനാഥ്​ നേരിട്ട രീതിപോലും തങ്ങൾക്കെതിരായ പരോക്ഷ ഭീഷണിയായി ജാട്ടുകൾ കാണുന്നുണ്ട്​. അവരുടെ ചൂട്​ ഞാൻ മാറ്റിക്കൊടുക്കാമെന്നും മാർച്ച്​ 10 കഴിയുന്നതോടെ ഇവിടം ഷിംല പോലെയാക്കുമെന്നുമായിരുന്നു ആദിത്യനാഥിന്റെ പറച്ചിൽ. ഒരു മുഖ്യമന്ത്രിക്ക്​ ചേർന്ന ഭാഷയോ ഇതെല്ലാം എന്നു​ ചോദിച്ച​ ഭാരതീയ കിസാൻ യൂനിയൻ മേധാവി രാകേശ്​ ടികായത്​ ഈ ഭീഷണി ബൂമറാങ്​ പോലെ തിരിച്ചടിക്കുമെന്നും മുന്നറിയിപ്പ്​ നൽകുന്നു.

സമാജ്​വാദിയുടെ ഭരണകാലത്ത്​ നിയമരാഹിത്യമായിരുന്നുവെന്ന പ്രചാരണവും പടിഞ്ഞാറൻ മേഖലയിൽ ഏശിയിട്ടില്ല. അഖിലേഷ്​ ഭരിച്ച 2012-17 കാലത്ത്​ കുറ്റകൃത്യ തോത്​ ഉയർന്നിരുന്നു എന്ന്​ സമ്മതിച്ചാൽപോലും ഉന്നാവ്​, ഹാഥറസ്​ കൂട്ടബലാത്സംഗ കേസുകളിലെയും ലഖിംപുർഖേരിയിലെ കർഷകഹത്യയിലെയും പ്രതികൾക്ക്​ യോഗി സർക്കാർ സംരക്ഷണമൊരുക്കിയെന്ന്​ വോട്ടർമാർ ആരോപിക്കുന്നു. യോഗിയുടെ തട്ടകമായ ഗോരഖ്​പുരിൽ ഒരു യുവ വ്യാപാരി കൊല്ലപ്പെട്ട സംഭവവും അവർ എടുത്തുപറയുന്നു. ഈ സംഭവങ്ങളിലെല്ലാം സർക്കാർ കൈക്കൊണ്ട നടപടികൾ എണ്ണിപ്പറയുന്ന സർക്കാർ വക്താക്കൾ ഒരുകാര്യം സൂത്രത്തിൽ മറച്ചുപിടിക്കുന്നു- സുപ്രീംകോടതിയോ അലഹബാദ്​ ഹൈകോടതിയോ ഇടപെട്ടശേഷം മാത്രമാണ്​ സർക്കാർ എന്തെങ്കിലും ചെയ്യാൻ തയാറായത്​ എന്ന യാഥാർഥ്യം.

അഖിലേഷിനെ ഉന്നംവെച്ച്​ പ്രധാനമന്ത്രി നടത്തുന്ന പരിവാർവാദ്​ (കുടുംബവാഴ്​ച) ആരോപണവും അൽപം ഊതിപ്പെരുപ്പിച്ചതായാണ്​ അനുഭവപ്പെടുന്നത്​. യാദവ്​ കുടുംബത്തിലെ 45 പേരാണ്​ രാഷ്​ട്രീയ സ്​ഥാനമാനങ്ങൾ കൈയാളുന്നത്​ എന്ന ആരോപണം അഖിലേഷിനെ താറടിക്കാൻ കൊള്ളാമെന്നല്ലാതെ​ വസ്​തുതകളുടെ യാതൊരു പിൻബലവുമുള്ള കാര്യമല്ല.

കഴിഞ്ഞ തെരഞ്ഞെടുപ്പുകളിൽ നിർണായക ശക്തിയായിരുന്ന ബഹുജൻ സമാജ്​വാദി പാർട്ടി (ബി.എസ്​.പി) ഇക്കുറി പടിഞ്ഞാറൻ യു.പിയിൽ കാര്യമായ നേട്ടമുണ്ടാക്കില്ല. എന്നാൽ, പാർട്ടി മേധാവിയും മുൻ മുഖ്യമന്ത്രിയുമായ മായാവതിയുടെ നീക്കങ്ങളും തന്ത്രങ്ങളും അത്ര പെ​ട്ടെന്ന്​ ഒരാൾക്കും പിടികിട്ടുകയുമില്ല. ഇക്കുറി തെരഞ്ഞെടുപ്പ്​ ബഹളങ്ങളിൽനിന്ന്​ ഒതുങ്ങി മാറിനിന്ന്​ ബി.ജെ.പിയുടെ ബി ടീം എന്ന മട്ടിലൊരു കളിയാണ്​ ബി.എസ്​.പി കളിക്കുന്നത്​. ജയസാധ്യതയില്ലാഞ്ഞിട്ടും പടിഞ്ഞാറൻ യു.പിയിൽ കണ്ടമാനം മുസ്​ലിം സ്​ഥാനാർഥികളെ അണിനിരത്തിയത്​ വോട്ടുകൾ ഭിന്നിപ്പിച്ച്​ ബി.ജെ.പിക്ക്​ സൗകര്യമൊരുക്കാനുള്ള നീക്കമായാണ്​ വിലയിരുത്തപ്പെടുന്നത്​.

ബി.എസ്.പി സ്​ഥാനാർഥികളെ കണ്ടില്ലെന്നുനടിച്ച്​, ബി.ജെ.പിയെ അകറ്റിനിർത്തണമെന്നുറച്ച്​ മുസ്​ലിം വോട്ടർമാർ സമാജ്​വാദി-ആർ.എൽ.ഡി സഖ്യത്തിനനുകൂലമായി നിലകൊള്ളുന്നുവെന്നതി​ന്റെ സൂചനയാണ്​ വ്യാഴാഴ്​ചത്തെ വോട്ടിങ്​ പാറ്റേണിൽ പ്രകടമായത്​. ആദ്യഘട്ട വോ​ട്ടെടുപ്പ്​ നടന്ന ഇടങ്ങളിൽ ബി.ജെ.പിയുടെ സീറ്റ്​ സംഖ്യ ഇക്കുറി കുറയുമെന്ന കാര്യം ഒരാളും നിഷേധിക്കുന്നില്ല. എന്നാൽ, നഷ്​ടത്തി​ന്റെ ആഘാതം കുറക്കാൻ വേണ്ടതെല്ലാം ചെയ്യുന്നുണ്ട്​ ആ പാർട്ടിയുടെ ഉന്നത നേതൃത്വം. ആദ്യഘട്ട പോളിങ്​ നടക്കുന്ന ദിവസവും കേരളത്തിനും ബംഗാളിനും നേരെപ്പോലും കുത്തുവാക്കുകൾ പറഞ്ഞ്​ 14ന്​ വോ​ട്ടെടുപ്പ്​ നടക്കാനിരിക്കുന്ന മണ്ഡലങ്ങളിലെ റാലികളിൽ അണികളെ ആവേശഭരിതരാക്കാനുള്ള യജ്ഞത്തിലായിരുന്നു അവർ.