തകർത്താടി നിതീഷ്; ബംഗ്ലാദേശിനെതിരെ രണ്ടാം ജയത്തോടെ ഇന്ത്യക്ക് പരമ്പര

ന്യൂഡൽഹി: തുടർച്ചയായ രണ്ടാം മത്സരത്തിലും തകർപ്പൻ ജയവുമായി ബംഗ്ലാദേശിനെതിരായ ട്വന്റി 20 പരമ്പര സ്വന്തമാക്കി ഇന്ത്യ. 86 റൺസിന്റെ വമ്പൻ ജയമാണ് ആതിഥേയർ കുറിച്ചത്. 34 പന്തിൽ 74 റൺസുമായി ഇന്ത്യൻ ബാറ്റിങ്ങിന് അടിത്തറയിട്ട നിതീഷ് കുമാർ റെഡ്ഡി രണ്ട് വിക്കറ്റും നേടി ജയത്തിൽ നിർണായക പങ്കുവഹിച്ചു.

ടോസ് നഷ്ടമായി ആദ്യം ബാറ്റിങ്ങിനിറങ്ങിയ ഇന്ത്യ ഒരുക്കിയ 222 റൺസിന്റെ കൂറ്റൻ വിജയലക്ഷ്യത്തിന് മുന്നിൽ മുട്ടിടിച്ച ബംഗ്ലാദേശുകാർക്ക് നിശ്ചിത ഓവറിൽ ഒമ്പത് വിക്കറ്റ് നഷ്ടത്തിൽ 135 റൺസെടുക്കാനേ കഴിഞ്ഞുള്ളൂ. 39 പന്തിൽ 41 റൺസെടുത്ത മഹ്മൂദുല്ലക്ക് മാത്രമാണ് ബംഗ്ലാ നിരയിൽ പിടിച്ചുനിൽക്കാനായത്. ഇന്ത്യക്കായി ബാളെടുത്തവരെല്ലാം വിക്കറ്റെടുത്ത മത്സരത്തിൽ രണ്ടുപേരെ വീതം പുറത്താക്കിയ നിതീഷ് കുമാർ റെഡ്ഡിയും വരുൺ ചക്രവർത്തിയുമാണ് മികച്ചുനിന്നത്. അർഷ്ദീപ് സിങ്, വാഷിങ്ടൺ സുന്ദർ, അഭിഷേക് ശർമ, മായങ്ക് യാദവ്, റിയാൻ പരാഗ് എന്നിവർ ഓരോ വിക്കറ്റ് നേടി. പരമ്പരയിലെ അവസാന മത്സരം ശനിയാഴ്ച ഹൈദരാബാദിൽ നടക്കും.

കൂറ്റൻ വിജയലക്ഷ്യത്തിലേക്ക് ഇറങ്ങിയ ബംഗ്ലാദേശിനായി ആദ്യ ഓവറിൽ പർവേസ് ഹുസൈൻ ഇമോൺ അർഷ്ദീപിനെതിരെ മൂന്ന് ഫോറടക്കം 14 റൺസ് നേടി ഉദ്ദേശ്യം വ്യക്തമാക്കിയിരുന്നു. എന്നാൽ, അർഷ്ദീപിന്റെ രണ്ടാം ഓവറിലെ രണ്ടാം പന്തിൽ സൂര്യകുമാർ യാദവ് ക്യാച്ചിനുള്ള അവസരം പാഴാക്കിയതിന് പിന്നാലെ പർവേസിന്റെ സ്റ്റമ്പ് തെറിച്ചു. 12 പന്തിൽ 16 റൺസാണ് താരത്തിന് നേടാനായത്. തുടർന്നെത്തിയ നായകൻ നജ്മുൽ ഹുസൈൻ ഷാന്റോയെ (ഏഴ് പന്തിൽ 11) വാഷിങ്ടൺ സുന്ദർ ഹാർദിക് പാണ്ഡ്യയുടെ കൈയിലുമെത്തിച്ചു. പിന്നാലെ ലിട്ടൺ ദാസിനെ (11 പന്തിൽ 14) വരുൺ ചക്രവർത്തി ബൗൾഡാക്കി. തുടർന്നെത്തിയ തൗഹീദ് ഹൃദോയ് (2), മെഹ്ദി ഹസൻ മിറാസ് (16), ജേകർ അലി (1), റിഷാദ് ഹുസൈൻ (9), തൻസീം ഹസൻ ഷാകിബ് (8) എന്നിവരെല്ലാം ചെറിയ സ്കോറുമായി തിരിച്ചുകയറി. അഞ്ച് റൺസുമായി ടസ്കിൻ അഹ്മദും ഒരു റൺസുമായി മുസ്തഫിസുർ റഹ്മാനും പുറത്താകാതെനിന്നു.

തകർത്തടിച്ച് നിതീഷും റിങ്കുവും

അരുൺ ജെയ്റ്റ്ലി സ്റ്റേഡിയത്തിൽ ആദ്യം ബാറ്റിങ്ങിനിറങ്ങിയ ആതിഥേയർ നിശ്ചിത ഓവറിൽ ഒമ്പത് വിക്കറ്റ് നഷ്ടത്തിലാണ് 221 റൺസ് അടിച്ചുകൂട്ടിയത്. മലയാളി താരം സഞ്ജു സാംസൺ ഒരിക്കൽ കൂടി നിരാശപ്പെടുത്തിയ മത്സരത്തിൽ നിതീഷ് കുമാർ റെഡ്ഡിയുടെയും റിങ്കു സിങ്ങിന്റെയും കൂറ്റനടികളാണ് സ്കോർ 200 കടത്തിയത്.

മെഹ്ദി ഹസൻ മിറാസ് എറിഞ്ഞ ആദ്യ ഓവറിൽ തന്നെ ഓപണർമാരായ സഞ്ജു സാംസണും അഭിഷേക് ശർമയും ചേർന്ന് 15 റൺസാണ് അടിച്ചെടുത്തത്. എന്നാൽ, ടസ്കിൻ അഹ്മദ് എറിഞ്ഞ രണ്ടാം ഓവറിലെ അവസാന പന്തിൽ നജ്മുൽ ഹുസൈൻ ഷാന്റോക്ക് പിടികൊടുത്ത് സഞ്ജു മടങ്ങി. ഏഴ് പന്തിൽ 10 റൺസാണ് നേടാനായത്. വൈകാതെ അഭിഷേകും തിരിച്ചുകയറി. 11 പന്തിൽ 15 റൺസെടുത്ത താരത്തിന്റെ സ്റ്റമ്പ് തൻസിം ഹസൻ ഷാകിബ് പിഴുതെറിയുകയായിരുന്നു. വൺ​ഡൗണായെത്തിയ നായകൻ സൂര്യകുമാർ യാദവും (10 പന്തിൽ എട്ട്) നിലയുറപ്പിക്കുംമുമ്പ് മടങ്ങിയതോടെ ഇന്ത്യ 5.3 ഓവറിൽ മൂന്നിന് 41 എന്ന നിലയിലേക്ക് വീണു.

തുടർന്ന് ഒരുമിച്ച നിതീഷ് കുമാർ റെഡ്ഡിയും റിങ്കു സിങ്ങും ചേർന്ന് അതിവേഗം റൺസടിച്ചുകൂട്ടുകയായിരുന്നു. 49 പന്തിൽ 108 റൺസ് ചേർത്താണ് ഈ കൂട്ടുകെട്ട് വഴിപിരിഞ്ഞത്. കരിയറിലെ രണ്ടാം ട്വന്റി 20 മത്സരത്തിനിറങ്ങിയ നിതീഷ് 34 പന്തിൽ ഏഴ് സിക്സും നാല് ഫോറുമടക്കം 74 റൺസടിച്ച് മുസ്തഫിസുർ റഹ്മാന്റെ പന്തിൽ മെഹ്ദി ഹസൻ മിറാസിന് പിടികൊടുക്കുകയായിരുന്നു. തുടർന്നെത്തിയ ഹാർദിക് പാണ്ഡ്യയും ബംഗ്ലാദേശ് ബൗളർമാരെ നിർദയം നേരിട്ടതോടെ സ്കോർ ദ്രുതഗതിയിൽ ചലിച്ചു. ഇതിനിടെ 29 പന്തിൽ മൂന്ന് സിക്സും അഞ്ച് ഫോറുമടക്കം 53 റൺസെടുത്ത റിങ്കു സിങ്ങിനെ ടസ്കിൻ അഹ്മദ് ജേകർ അലിയുടെ കൈയിലെത്തിച്ചു.

19ാം ഓവറിൽ റിയാൻ പരാഗിന്റെ വെടിക്കെട്ടിനും സ്റ്റേഡിയം സാക്ഷിയായെങ്കിലും ആറ് പന്തിൽ രണ്ട് സിക്സടക്കം 15 റൺസ് നേടി പരാഗ് മടങ്ങി. അവസാന ഓവറിലെ ആദ്യ പന്തിൽ ഹാർദിക് പാണ്ഡ്യയും പുറത്തായി. 19 പന്തിൽ രണ്ട് വീതം സിക്സും ഫോറുമടക്കം 32 റൺസായിരുന്നു സമ്പാദ്യം. മൂന്നാം പന്തിൽ വരുൺ ചക്രവർത്തിയും അഞ്ചാം പന്തിൽ അർഷ്ദീപ് സിങ്ങും മടങ്ങിയത് തിരിച്ചടിയായി. റിഷാദ് ഹുസൈൻ എറിഞ്ഞ അവസാന ഓവറിൽ മൂന്ന് വിക്കറ്റാണ് ഇന്ത്യക്ക് നഷ്ടമായത്. ഒരു റൺസുമായി മായങ്ക് യാദവും റൺസെടുക്കാതെ വാഷിങ്ടൺ സുന്ദറും പുറത്താകാതെനിന്നു.

ബംഗ്ലാദേശിനായി റിഷാദ് ഹുസൈൻ മൂന്ന് വിക്കറ്റ് വീഴ്ത്തിയപ്പോൾ ടസ്കിൻ അഹ്മദ്, തൻസിം ഹസൻ ഷാകിബ്, മുസ്തഫിസുർ റഹ്മാൻ എന്നിവർ രണ്ട് വീതം പേരെ മടക്കി.