കാമറക്ക്​ പോസ്​ ചെയ്​ത്​ ഭീമൻ മൂർഖൻമാർ; വൈറൽ ചിത്രം പങ്കുവെച്ച്​ ഐ.എഫ്​.എസ്​ ഓഫീസർ

മുംബൈ: മഹാരാഷ്​ട്രയിലെ ഒരു കാട്ടിൽ വെച്ച്​ പകർത്തിയ പാമ്പുകളുടെ ഭീതിപ്പെടുത്തുന്ന ചിത്രം പങ്കുവെച്ച്​ ഐ.എഫ്​.എസ്​ ഓഫീസർ സുശാന്ത നന്ദ. വലിപ്പമേറിയ മൂന്ന്​ മൂർഖൻമാർ ഒരു മരത്തിൽ ചുറ്റിപ്പിണർന്ന്​ നിൽക്കുന്ന ചിത്രമാണ്​ അദ്ദേഹം സമൂഹ മാധ്യമങ്ങളിൽ പങ്കുവെച്ചത്​. മൂന്ന്​ പാമ്പുകളും ഫണം വിടർത്തി കാമറയ്​ക്ക്​ പോസ്​ ചെയ്യുന്ന രീതിയിലാണുള്ളത്​. 'ഒരേ സമയം മൂന്ന്​ നാഗങ്ങൾ നിങ്ങളെ അനുഗ്രഹിക്കു​േമ്പാൾ' - സുശാന്ത നന്ദ അടിക്കുറിപ്പായി എഴുതി.

'ഇന്ത്യൻ വൈൽഡ്​ ലൈഫ്​' എന്ന ഒരു ലക്ഷത്തിലധികം മെമ്പർമാരുള്ള ഫേസ്​ബുക്ക്​ ഗ്രൂപ്പിലാണ്​ ആദ്യമായി പാമ്പുകളുടെ ചിത്രങ്ങൾ വന്നത്​. പാമ്പിനെ എവിടെ നിന്നോ രക്ഷപ്പെടുത്തി മഹാരാഷ്​ട്രയിലെ അമ്രാവതി ജില്ലയിലെ ഹരിസൽ വനത്തിൽ വിട്ടതായിരുന്നു. രാജേന്ദ്ര സെമാൽക്കർ എന്നയാളാണ്​ പാമ്പുകളുടെ ചിത്രങ്ങൾ ഗ്രൂപ്പിൽ പങ്കുവെച്ചത്​.

എന്തായാലും പാമ്പിന്‍റെ ചിത്രം ക​ണ്ട നെറ്റിസൺസ്​ അവരുടെ ഭീതി കമന്‍റ്​ ബോക്​സിൽ അറിയിക്കുകയും ചെയ്​തു. 'അവ മനോഹരമാണ്, പക്ഷേ അകലെ നിന്ന് മാത്രം. അടുത്ത് നിന്നാണെങ്കിൽ, ഭയന്ന്​വിയർത്തുപോകും...' -ഒരാൾ കുറിച്ചു. "അടുത്ത നാനോ സെക്കൻഡിൽ ഞാൻ ആ സ്ഥലത്ത് നിന്ന് അപ്രത്യക്ഷനാകുമായിരുന്നു." -ഇങ്ങനെയായിരുന്നു മറ്റൊരാൾ കുറിച്ചത്​.