ലണ്ടൻ: ഫോർമുല വൺ കാറോട്ട മത്സരങ്ങളുടെ മുൻ മേധാവിയും കോടീശ്വരനുമായ ബേണി എക്ലസ്റ്റൺ 89ാം വയസ്സിൽ വീണ്ടും പിതാവായി. ബേണിയുടെ മൂന്നാം ഭാര്യ ഫാബിയാന ഫ്ലോസി (43) ആണ് കഴിഞ്ഞ ദിവസം ആൺകുഞ്ഞിന് ജന്മം നൽകിയത്.
ബേണിയുടെ ആദ്യ ആൺകുഞ്ഞും ഫാബിയാനയിൽ പിറക്കുന്ന ആദ്യ കുഞ്ഞുമാണിത്. കുഞ്ഞിന് എയ്സ് എന്ന് പേരിട്ടതായി ബേണിയുടെ വക്താവ് അറിയിച്ചു. 2012ലാണ് ബേണി ഫാബിയാനയെ വിവാഹം കഴിക്കുന്നത്.
ആദ്യ രണ്ടു വിവാഹങ്ങളിലായി ബേണിക്ക് മൂന്നു പെൺമക്കളുണ്ട്. ആദ്യ ഭാര്യ ഇവി ബാംഫോർഡിൽ ജനിച്ച മൂത്ത മകൾ ദെബോറയ്ക്ക് ഇപ്പോൾ 65 വയസ്സുണ്ട്. രണ്ടാം ഭാര്യയായ സ്ലാവിസ റാഡിച്ചിൽ ജനിച്ച ടമാര (36), പെട്ര (31) എന്നിവരാണ് ബേണിയുടെ മറ്റു മക്കൾ. ഈ മൂന്നു പേരിലുമായി ബേണിക്ക് അഞ്ചു കൊച്ചുമക്കളുമുണ്ട്. കൊച്ചുമക്കളിൽ ഒരാൾക്കു കൂടി അടുത്തിടെ കുഞ്ഞു ജനിച്ചിരുന്നു.
ഫോർമുല വണ്ണിനെ ഇന്നു കാണുന്ന തലത്തിലേക്ക് വളർത്തിയെടുത്തത് ബേണിയാണ്. 1958ൽ കാർ ഡ്രൈവറായാണ് ബേണി എക്ലസ്റ്റൺ ഫോർമുല വണ്ണിലെത്തുന്നത്. 2017ൽ പുറത്താക്കപ്പെടുന്നതുവരെ 40 വർഷത്തോളം ഫോർമുല വൺ മേധാവിയായിരുന്നു. എങ്കിലും കാറോട്ട രംഗത്ത് ബേണിയുടെ സ്വാധീനത്തിന് കോട്ടം തട്ടിയിട്ടില്ല.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.