ലോക്​ഡൗൺ നീണ്ടു നിന്നാൽ കോവിഡ്​ മരണങ്ങളേക്കാൾ കൂടുതൽ പട്ടിണി മരണങ്ങളുണ്ടാവും -നാരായണമൂർത്തി

ന്യൂഡൽഹി: ലോക്​ഡൗൺ നീണ്ടു പോയാൽ കോവിഡ്​ മരണ​ങ്ങളേക്കാൾ കൂടുതൽ പട്ടിണി മരണങ്ങളുണ്ടാവുമെന്ന്​ ഇൻഫോസിസ്​ സ്ഥാപകൻ എൻ.ആർ നാരായണമൂർത്തി. ബുധനാഴ്​ച വ്യാപാര പ്രമുഖരുമായി നടത്തിയ വെബിനാറിലായിരുന്നു നാരായണമൂർത്തിയുടെ പ്രസ്​താവന. 

വൈറസ്​ ഭീതിക്കിടയിലും ജീവിതം മുന്നോട്ട്​ കൊണ്ടുപോകാൻ കഴിയണം. രാജ്യത്തെ നിയന്ത്രണങ്ങളിൽ ഇളവു വരുത്തി കർശന സുരക്ഷയോടെ ജനങ്ങൾക്ക്​ ജോലി ചെയ്യാനുള്ള സാഹചര്യമുണ്ടാക്കണം. ഇന്ത്യക്ക്​ അധികകാലം ലോക്​ഡൗണുമായി മുന്നോട്ട്​ പോകാനാവില്ല. അങ്ങനെയുണ്ടായാൽ ഒരു ഘട്ടത്തിൽ കോവിഡ്​ മരണങ്ങളേക്കാൾ കൂടുതൽ പട്ടിണി മരണങ്ങളുണ്ടാവുമെന്നും അദ്ദേഹം പറഞ്ഞു.

നേരത്തെ മുൻ റിസർവ്​ ബാങ്ക്​ ഗവർണർ രഘുറാം രാജനും ലോക്​ഡൗൺ നീട്ടുന്നതിനെതിരെ രംഗത്തെത്തിയിരുന്നു. രാഹുൽ ഗാന്ധിയുമായുള്ള ചർച്ചക്കിടെയായിരുന്നു രഘുറാം രാജ​​​െൻറ പ്രസ്​താവന. ലോക്​ഡൗൺ മൂലം പ്രതിസന്ധിയിലായ രാജ്യത്തെ സാധാരണക്കാരെ രക്ഷിക്കാൻ 65,000 കോടി രൂപ ആവശ്യമാണെന്നും അദ്ദേഹം പറഞ്ഞിരുന്നു.