സാമ്പത്തിക പാക്കേജ്​ ഓഹരി വിപണിയേയും സ്വാധീനിച്ചില്ല; നഷ്​ടത്തോടെ വ്യാപാരം തുടങ്ങി

മുംബൈ: കോവിഡ്​ 19 വൈറസ്​ ബാധ മറികടക്കാൻ കേന്ദ്രസർക്കാർ പ്രഖ്യാപിച്ച സാമ്പത്തിക പാക്കേജ്​ ഇന്ത്യൻ സമ്പദ്​വ്യവസ്ഥയിൽ സ്വാധീനം ചെലുത്തിയില്ല. ബോംബെ സുചിക സെൻസെക്​സ്​ 200 പോയിൻറ്​ നഷ്​​ടത്തോടെയാണ്​ വ്യാപാരം തുടങ്ങിയത്​. നിഫ്​റ്റി 9100 പോയിൻറിന്​ താഴെ പോയി. 

ബാങ്കിങ്​ സ്​റ്റോക്കുകളാണ്​ ഏറ്റവും കൂടുതൽ നഷ്​ടം നേരിട്ടത്​. ഐ.സി.ഐ.സി.ഐ ബാങ്ക്​, ബജാജ്​ ഫിനാൻസ്​, ആക്​സിസ്​ ബാങ്ക്​, എസ്​.ബി.ഐ തുടങ്ങിയവ നഷ്​ടം രേഖപ്പെടുത്തി. കൽക്കരി മേഖലയിൽ വലിയ രീതിയിലുള്ള സ്വകാര്യവൽക്കരണം പ്രഖ്യാപിച്ചതിന്​ പിന്നാലെ കോൾ ഇന്ത്യയുടെ ഓഹരി വിലയിടിഞ്ഞു. 

പ്രതിസന്ധി നേരിടുന്ന ചെറുകിട-ഇടത്തരം വ്യവസായങ്ങൾക്ക്​ വായ്​പ അനുവദിക്കുമെന്ന്​ കേന്ദ്രസർക്കാർ പ്രഖ്യാപിച്ചിരുന്നു. പ്രതിസന്ധിയിലുള്ള വ്യവസായങ്ങൾക്ക്​ വായ്​പ അനുവദിക്കാനുള്ള തീരുമാനം നിഫ്​റ്റി ബാങ്കിങ്​ ഇൻഡക്​സ്​ ഇടിയുന്നതിന്​ കാരണമായി. സിപ്ല, ഇൻഫ്രാടെൽ, ഇൻഫോസിസ്​, ടെക്​ മഹീന്ദ്ര, ടി.സി.എസ്​, റിലയൻസ്​, സൺ ഫാർമ തുടങ്ങിയ കമ്പനികളുടെ ഓഹരികളാണ്​ നേട്ടമുണ്ടാക്കിയത്​. നാലാംഘട്ട ലോക്​ഡൗൺ പ്രഖ്യാപിച്ചതും ഓഹരി വിപണിയിൽ തിരിച്ചടിയാവുന്നുണ്ട്​.