യുവാക്കളെയും സ്​കൂൾ പഠനം നിർത്തിയവരെയും ലക്ഷ്യമിട്ട്​ ഡൽഹി പൊലീസിന്‍റെ ഇ ലേണിങ്​ പദ്ധതി

ന്യൂഡൽഹി: ഡൽഹിയിൽ യുവജനങ്ങളെ ബോധവൽക്കരിക്കാനും സ്​കൂൾ പഠനം പാതിവഴിയിൽ ഉപേക്ഷിച്ചവർക്കുമായി ഇ ലേണിങ് പദ്ധതി അവതരിപ്പിച്ച്​ ഡൽഹി പൊലീസ്​. ഡൽഹി പൊലീസ്​ കമ്മീഷണർ രാകേഷ്​ അസ്​താന പദ്ധതി ഉദ്​ഘാടനം ചെയ്​തു.

ഡൽഹി പൊലീസിന്‍റെ 'യുവ' പദ്ധതിക്ക്​ കീഴിലാണ്​ 'ഉന്നതി' ഇ ലേണിങ്​ പദ്ധതി അവതരിപ്പിച്ചിരിക്കുന്നത്​. ലളിതമായ രൂപകൽപ്പനയോടെ തയാറാക്കിയ ഉന്നതി പോർട്ടലിൽ ലാപ്​ടോപ്പ്​, ഡെസ്​ക്​ടോപ്പ്​, ടാബ്​ലറ്റ്​, മൊബൈൽ ഫോൺ എന്നിവ ഉപയോഗിച്ച്​ ആർക്കും എവിടെനിന്ന്​ വേണമെങ്കിലും പഠിക്കാനാകും.

യുവാക്കൾക്ക്​ പോർട്ടലിൽ എൻറോൾ ചെയ്യാനും ഇഷ്​ടമുള്ള പ്രോഗ്രാം തെരഞ്ഞെടുക്കാനും സാധിക്കും. ഇ-ലേണിങ്​ പ്ലാറ്റ്​ഫോം ട്രെയിനികൾക്ക്​ പരിശീലനവും കൗൺസലിങും പ്ലേസ്​മെന്‍റും നൽകും. വിദ്യാർഥികൾക്ക്​ ഒരു ക്ലാസ്​ നഷ്​ടമായാൽ റെക്കോർഡ്​ ചെയ്​ത ക്ലാസുകളും ലഭ്യമാകും.

എല്ലാവർഷം 1.5 ലക്ഷത്തിലധികം പേരെ ഡൽഹി ​െപാലീസ്​ വിവിധ കുറ്റകൃത്യങ്ങൾക്കായി പിടികൂടുന്നു. 85 ശതമാനത്തിലധികം പേര​ുടെയും ആദ്യ കുറ്റകൃത്യമായിരിക്കും. ഇവരെ ലക്ഷ്യമിട്ടാണ്​ യുവ, ഉന്നതി പദ്ധതികൾ. ഇതിലൂടെ ഇവരെ ബോധവൽക്കരിക്കാനും മുഖ്യധാര സമൂഹത്തിന്‍റെ ഭാഗമാകാൻ അവസരം ഒരുക്കുകയും ചെയ്യും -ഡൽഹി പൊലീസ്​ പറഞ്ഞു. കോഴ്​സ്​ പൂർത്തിയാകുന്നതോടെ ഉദ്യോഗാർഥികൾക്ക്​ സർട്ടിഫിക്കറ്റ്​ നൽകും. അതുപയോഗിച്ച്​ പ്ലേസ്​മെന്‍റും ലഭ്യമാക്കും -ഡൽഹി പൊലീസ്​ പി.ആർ.ഒ ചിൻമോയ്​ ബിശ്വാൽ പറഞ്ഞു.

അടിസ്​ഥാന കമ്പ്യൂട്ടർ കോഴ്​സുകൾ ഉൾപ്പെടുത്തി ഡിജിറ്റൽ സാക്ഷരത കോഴ്​സുകൾ, മത്സരപരീക്ഷകൾക്ക്​ തയാറാക്കുന്ന കോഴ്​സുകൾ എന്നിവ ഇതിൽ ഉൾപ്പെടും. ഉന്നതി പ്ലേസ്​മെന്‍റ്​ സെല്ലും സജ്ജീകരിച്ചിട്ടുണ്ട്​.