സിനിമയിൽ 90 ശതമാനവും പട്ടിണിക്കാർ, സൂപ്പർ താരങ്ങൾ അതിസമ്പന്നർ -ശ്രീകുമാരൻ തമ്പി

തിരുവനന്തപുരം: സിനിമ മേഖലയിൽ ജോലിചെയ്യുന്നവരിൽ 90 ശതമാനവും പട്ടിണിക്കാരാണെന്നും സൂപ്പർ താരങ്ങളും അവർക്കൊപ്പം നിൽക്കുന്ന ചിലരും മാത്രമാണ് അതിസമ്പന്നരെന്നും ഗാനരചയിതാവും സംവിധായകനുമായ ശ്രീകുമാരൻ തമ്പി. ഭാരത് ഭവൻ സംഘടിപ്പിക്കുന്ന മഴമിഴി മൾട്ടിമീഡിയ സ്ട്രീമിങ്ങി​െൻറ കർട്ടൻ റൈസർ പ്രകാശനം ചെയ്യവെ മന്ത്രി സജി ചെറിയാ​െൻറ സാന്നിധ്യത്തിലായിരുന്നു ശ്രീകുമാരൻ തമ്പിയുടെ പരാമർശം.

സിനിമ തെറ്റിദ്ധരിക്കപ്പെട്ട കലാരൂപമാണ്. ലൈറ്റ് ബോയ്​ ഉൾപ്പെടെയുള്ളവർക്ക്​ കിട്ടുന്ന വരുമാനം തുച്ഛമാണ്. സൂപ്പർ താരങ്ങളെന്ന് അറിയപ്പെടുന്ന ഇരുപതോ മുപ്പതോ പേരും അവർക്കൊപ്പം നിൽക്കുന്ന ചില സംവിധായകരും സാങ്കേതിക പ്രവർത്തകുമാണ് സിനിമ ഭരിക്കുന്നത്. 55 വർഷമായി സിനിമയിൽ പ്രവർത്തിക്കുന്ന താൻ മുഖംമൂടിയില്ലാതെ സത്യം പറയുന്നതുകൊണ്ട് ഇന്നും ദരിദ്രനാണ്. അഭിമാനമുള്ളതിനാലാണ്​ ആരുടെ മുന്നിലും കൈനീട്ടാത്തതെന്നും അദ്ദേഹം പറഞ്ഞു.