ആദ്യ ജെയിംസ്​ ബോണ്ട്​ ഷോൻ കോണറി അന്തരിച്ചു

ജെയിംസ്​ ബോണ്ട്​ സിനിമകളിലൂടെ പ്രശസ്​തനായ സ്​കോട്ടിഷ്​ നടൻ ഷോൻ കോണറി അന്തരിച്ചു. 90 വയസ്സായിരുന്ന താരം ഏറെ ദിവസങ്ങളായി ആരോഗ്യപ്രശ്​നങ്ങൾ നേരിട്ടിരുന്നു. സിനിമയിൽ​ ആദ്യമായി ജെയിംസ്​ ബോണ്ടായി വേഷമിട്ട താരം കൂടിയാണ്​ കോണറി. അദ്ദേഹം ഇതുവരെ ഏഴ്​ ബോണ്ട്​ സിനിമകളിൽ ആണ്​ അഭിനയിച്ചത്​. 1962 മുതൽ 1983 വരെയായി ഇറങ്ങിയ ഡോ. നോ, യു ഒാൺലി ലിവ്​ ട്വയ്​സ്​, ഡയമണ്ട്​സ്​ ആർ ഫോറെവർ, നെവർ സേ നെവർ അഗൈൻ എന്നീ ബോണ്ട്​ സിനിമകളിൽ വേഷമിട്ടു.

ദ അൺടച്ചബിൾസ്​ എന്ന സിനിമയിലൂടെ മികച്ച സഹതാരത്തിനുള്ള ഒാസ്​കറും അദ്ദേഹം നേടിയിരുന്നു. മാർനി (1964), മർഡർ ഒാൺ ദ ഒാറിയൻറ്​ എക്​സ്​പ്രസ്​ (1974), ദ മാൻ ഹു വുഡ്​ ബി കിങ്​ (1975), ദ നെയിം ഒാഫ്​ ദ റോസ്​ (1986), ഹൈലാൻഡർ (1986), ഇന്ത്യാനാ ജോൺസ്​ ആൻഡ്​ ദ ലാസ്റ്റ്​ ക്രൂസേഡ്​ (1989), ദ ഹണ്ട്​ ഫോർ റെഡ്​ ഒക്​ടോബർ (1990), ഡ്രാഗൺ ഹാർട്ട്​ (1996), ദ റോക്ക്​ (1996), ഫൈൻറിങ്​ ഫോറസ്റ്റർ (2000) എന്നിവയാണ്​ കോണറിയുടെ മറ്റ്​ പ്രധാന ചിത്രങ്ങൾ. ഒാസ്​കറും രണ്ട്​ ബാഫ്​ത പുരസ്​കാരങ്ങളും മൂന്ന്​ ഗോൾഡൻ ഗ്ലോബ്​ അവാർഡുകളും കോണറിയുടെ പേരിലുണ്ട്​.