യു.എൻ ജനറൽ അസംബ്ലി ലോക നേതാക്കളുമായി സയ്യിദ് ബദർ കൂടിക്കാഴ്ച നടത്തി
text_fieldsമസ്കത്ത്: യു.എൻ ജനറൽ അസംബ്ലിയുടെ 79ാമത് സെഷനിൽ പങ്കെടുക്കുന്നതിനോടനുബന്ധിച്ച് വിവിധ ലോക നേതാക്കളുമായി ഒമാൻ വിദേശകാര്യ മന്ത്രി സയ്യിദ് ബദർ ഹമദ് അൽബുസൈദി കൂടിക്കാഴ്ച നടത്തി. യമൻ പ്രസിഡൻഷ്യൽ ലീഡർഷിപ്പ് കൗൺസിൽ ചെയർമാൻ ഡോ.റഷാദ് അൽ അലിമിയുമായുള്ള കൂടിക്കാഴ്ചയിൽ ഇരു രാജ്യങ്ങളും തമ്മിലുള്ള ചരിത്രപരവും സൗഹൃദപരവുമായ ബന്ധത്തെക്കുറിച്ച് ചർച്ച ചെയ്തു. യമനിൽ സുരക്ഷയും സ്ഥിരതയും കൈവരിക്കാൻ ലക്ഷ്യമിടുന്ന എല്ലാ ശ്രമങ്ങൾക്കും പിന്തുണ ഊന്നിപ്പറയുകയും യമന്റെ സ്വാതന്ത്ര്യം, പ്രാദേശിക അഖണ്ഡത, പരമാധികാരം എന്നിവ സംരക്ഷിക്കുന്ന സമ്മതത്തോടെയുള്ള രാഷ്ട്രീയ പരിഹാരത്തിനുള്ള പ്രതീക്ഷ പ്രകടിപ്പിക്കുകയും ചെയ്തു.
അൾജീരിയയുടെ വിദേശകാര്യ മന്ത്രി അഹമ്മദ് അത്താഫിനെയും വിദേശകാര്യ മന്ത്രി സന്ദർശിച്ചു. ഒമാനി-അൾജീരിയൻ സംയുക്ത സമിതി എടുത്ത തീരുമാനങ്ങൾ സജീവമാക്കുന്നതിന്റെയും കൂടുതൽ പരസ്പര നേട്ടങ്ങൾക്കായി വിവിധ മേഖലകളിൽ സഹകരണം തുടരേണ്ടതിന്റെയും ആവശ്യകത ഊന്നിപ്പറയുന്ന ഉഭയകക്ഷി ബന്ധങ്ങൾ അവലോകനം ചെയ്തു.സയ്യിദ് ബദർ നോർവേ വിദേശകാര്യ മന്ത്രി എസ്പെൻ ബാർത്ത് ഈഡുമായും കൂടിക്കാഴ്ച നടത്തി. പുനരുപയോഗ ഊർജം, പരിസ്ഥിതി സംരക്ഷണം, സുസ്ഥിര വികസനം, ഭക്ഷ്യ-ജല സുരക്ഷ എന്നീ മേഖലകളിൽ ഇരു രാജ്യങ്ങളും തമ്മിലുള്ള ഉഭയകക്ഷി സഹകരണം മെച്ചപ്പെടുത്തുന്നതിനുള്ള വഴികൾ ചർച്ച ചെയ്തു.
സിംഗപ്പൂർ പ്രധാനമന്ത്രിയുടെ ഓഫിസിലെ മന്ത്രിയും രണ്ടാം വിദേശകാര്യ മന്ത്രിയും രണ്ടാം വിദ്യാഭ്യാസ മന്ത്രിയുമായ ഡോ. മുഹമ്മദ് ഉസ്മാൻ മാലിക്കിയുമായി ഒമാൻ വിദേശകാര്യ മന്ത്രി കൂടിക്കാഴ്ച നടത്തി. കഴിഞ്ഞ ഡിസംബറിൽ സുൽത്താൻ ഹൈതം ബിൻ താരിഖ് അൽ സഈദന്റെ സിംഗപ്പൂർ സന്ദർശനത്തിന്റെ ഫലങ്ങൾ പിന്തുടരാനുള്ള പരസ്പര താൽപര്യം കൂടിക്കാഴ്ചയിൽ ഇരു മന്ത്രിമാരും ഊന്നിപ്പറഞ്ഞു. ഇരു രാജ്യങ്ങളും തമ്മിലുള്ള തന്ത്രപരമായ സംഭാഷണം തുടരാനും ഡിജിറ്റൽ സമ്പദ്വ്യവസ്ഥ, നവീകരണം, ഊർജം, വിദ്യാഭ്യാസം, നൂതന സാങ്കേതികവിദ്യ എന്നിവയുൾപ്പെടെ വിവിധ മേഖലകളിലെ സഹകരണത്തിനും സമ്മതിച്ചു.
അഭിപ്രായവ്യത്യാസങ്ങളും തർക്കങ്ങളും സമാധാനപരമായ മാർഗങ്ങളിലൂടെ പരിഹരിക്കുന്നതിനും, കാഴ്ചപ്പാടുകൾ അടുപ്പിക്കുന്നതിനും ധാരണ കൈവരിക്കുന്നതിനും നയതന്ത്രത്തിന്റെ പ്രധാന പങ്കിനെ പിന്തുണക്കുന്നതിനും സംഭാഷണം, നീതി, ബഹുമാനം എന്നിവയുടെ മൂല്യങ്ങൾ പ്രോത്സാഹിപ്പിക്കേണ്ടതിന്റെ പ്രാധാന്യവും രണ്ട് മന്ത്രിമാരും ഊന്നിപ്പറഞ്ഞു.
മംഗോളിയ വിദേശകാര്യ മന്ത്രി ബറ്റ്സെറ്റ്സെഗ് ബാറ്റ്മുൻഖുമായുള്ള കൂടിക്കാഴ്ചയിൽ വിദേശകാര്യ മന്ത്രി സയ്യിദ് ബദർ ബിൻ ഹമദ് അൽ ബുസൈദി, ഇരു രാജ്യങ്ങളും തമ്മിലുള്ള വ്യാപാര വിനിമയം, നിക്ഷേപം, ടൂറിസം അവസരങ്ങൾ പ്രോത്സാഹിപ്പിക്കുന്നതിനും ഉഭയകക്ഷി സഹകരണത്തിനുമുള്ള നിരവധി അവസരങ്ങൾ ചർച്ച ചെയ്തു. ഇരു മന്ത്രിമാരും കാഴ്ചപ്പാടുകൾ കൈമാറുകയും പൊതുവായ ആശങ്കയുള്ള നിരവധി വിഷയങ്ങളും അവലോകനം ചെയ്തു.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.