വാകിസ്​നേഷൻ അവസാന ലാപ്പിൽ

12നു മുകളിൽ പ്രായമുള്ളവരിൽ 90.2 ശതമാനവും ഒരു ഡോസ്​

വാക്​സിനെങ്കിലും സ്വീകരിച്ചു

ദോഹ: കോവിഡ്​ വാക്​സിനേഷൻ പ്രോഗ്രാമിൽ 90 ശതമാനം എന്ന മറ്റൊരു നാഴികക്കല്ല്​ കൂടി പിന്നിട്ട്​ ഖത്തർ. ആരോഗ്യ മന്ത്രാലയം തിങ്കളാഴ്​ച ട്വിറ്റർ സന്ദേശത്തിലൂടെയാണ്​ രാജ്യത്ത്​ വാക്​സിൻ സ്വീകരിച്ചവരുടെ കണക്ക്​ 90 ശതമാനം തികഞ്ഞതായി അറിയിച്ചത്​.

വാക്​സിൽ നൽകിത്തുടങ്ങിയ പ്രയാവിഭാഗം ഉൾപ്പെടുന്ന ജനസംഖ്യയുടെ 90.2ശതമാനം പേർ ഒരു ഡോസ്​ വാക്​സിനെങ്കിലും സ്വീകരിച്ചു.

നിലവിൽ 12 വയസ്സിനു​ മുകളിലുള്ളവർക്കാണ്​ ഖത്തറിൽ വാക്​സിനേഷൻ പുരോഗമിക്കുന്നത്​. കഴിഞ്ഞ 24 മണിക്കൂറിനുള്ളിൽ 28,533പേർക്കു​കൂടി വാക്​സിൻ നൽകിയതോടെയാണ്​ രാജ്യം നിർണായക കണക്കിലെത്തിയത്​.

സമ്പൂർണ വാക്​സിനേഷൻ എന്ന ലക്ഷ്യത്തിലേക്ക്​ കുതിക്കുന്ന ഖത്തറിൻെറ അവസാന ലാപ്​ റണ്ണപ്പായാണ്​ ആരോഗ്യ മന്ത്രാലയത്തിൻെറ പ്രഖ്യാപനത്തെ പ്രദേശിക മാധ്യമങ്ങൾ വിശേഷിപ്പിച്ചത്​.

76.2 ശതമാനം പേർ രണ്ട്​ ഡോസും സ്വീകരിച്ച്​ സമ്പൂർണ കോവിഡ്​ വാക്​സിനേറ്റഡ്​ ആയി. രാജ്യത്തെ ആകെ ജനസംഖ്യയുടെ 77.9 ശതമാനം പേർ ഒരു ഡോസും, 66.1 ശതമാനം പേർ രണ്ട്​ ഡോസും സ്വീകരിച്ചതായി ആരോഗ്യ മന്ത്രാലയം പുറത്തുവിട്ട കണക്കുകൾ വ്യക്​തമാക്കുന്നു.

നിലവിൽ 40.67 ലക്ഷം ഡോസാണ്​ വാക്​സിൻ ഒമ്പതാം മാസത്തിലേക്ക്​ നീണ്ട ​പ്രതിരോധ മരുന്ന്​ കാമ്പയി​നിൽ വിതരണം ചെയ്​തത്​.

യോഗ്യരായിട്ടും മടിക്കുന്നവർ എത്രയും വേഗം വാക്​സിൻ എടുക്കണമെന്ന്​ ആരോഗ്യമന്ത്രാലയവും മുന്നറിയിപ്പ്​ നൽകി.

65 വയസ്സ്​ പിന്നിട്ടവർ, ഗർഭിണികൾ, 12നും 15നും ഇടയിൽ പ്രായമുള്ള കുട്ടികൾ എന്നിവരുടെ വാക്​സിനേഷൻ നടപടികൾക്കായി സമൂഹമാധ്യമങ്ങൾ വഴി മന്ത്രാലയവും പ്രചാരണ കാമ്പയിനുകളുമായി രംഗത്തുണ്ട്​.