സൗദിയിൽ നിന്ന്​ മൃതദേഹങ്ങൾ നാട്ടിലയക്കാനുള്ള ശ്രമം ഉർജിതമായി

ദമ്മാം: മൃതദേഹങ്ങൾ നാട്ടിലെത്തിക്കാൻ ആഭ്യന്തര വകുപ്പി​​െൻറ അനുമതി കൂടി വേണമെന്ന ഉത്തരവ്​ കേന്ദ്രസർക്കാർ പി ൻവലിച്ചതോടെ സൗദിയിൽ നിന്ന്​ മൃതദേഹങ്ങൾ നാട്ടി​ലയക്കാനുള്ള ശ്രമം ഉർജിതമായി. കേന്ദ്രസർക്കാരി​​െൻറ ആദ്യ തീരു മാനത്തിനെതിരെ ജനപ്രതിനിധികൾ വഴി പ്രവാസ ലോകമുയർത്തിയ പ്രതിഷേധമാണ്​ സർക്കാരിനെ കൊണ്ട്​ സ്വന്തം തീരുമാനം തി രുത്തിക്കാൻ പ്രേരിപ്പിച്ചത്​. നിലവിലെ സാഹചര്യത്തിൽ ലഭ്യമാകുന്ന മാർഗത്തിലൂടെ മൃതദേഹങ്ങൾ നാട്ടിലെത്തിക്കാനുള്ള ശ്രമങ്ങൾ തുടരുന്നതിനിടയിലാണ്​ ആഭ്യന്തര മന്ത്രാലയ അനുമതി ഇരുട്ടടിയായി എത്തിയത്​. നിരവധി ഇന്ത്യക്കാരുടെ മൃതദേഹങ്ങളാണ്​ സൗദിയുടെ വിവിധ പ്രവിശ്യകളിൽ നാട്ടിലേക്കുള്ള ഉൗഴവും കാത്തിരിക്കുന്നത്​.

സൗദിയിലെ പ്രധാന സർക്കാർ മെഡിക്കൽ കോംപ്ലക്​സുകൾ കോവിഡുമായി ബന്ധപ്പെട്ട ചികിത്സകൾക്കായി പ്രത്യേകം മാറിയതോടെ സ്വകാര്യ ആശുപത്രി മോർച്ചറികളിൽ സൂക്ഷിക്കേണ്ടി വരുന്ന മൃതദേഹങ്ങൾക്ക്​ വലിയ തുക നൽകേണ്ടി വരുന്ന അവസ്​ഥയുമുണ്ട്​. കോവിഡ്​ പ്രതിസന്ധികൾക്കിടയിൽ സൗദിയിലെത്തുന്ന എമിറേറ്റ്​സ്​ വിമാനത്തിൽ കൊണ്ടുപോകാൻ നിരവധി ചർച്ചകൾക്കൊടുവിൽ തീരുമാനമായപ്പോഴാണ്​ നാട്ടിലേയും സൗദിയിലേയും വിമാനത്താവളങ്ങൾ പൂർണമായ ലോക്ഡൗണിലേക്ക്​ മാറിയത്​. ഇതോടെ എംബാം ചെയ്​ത മൃതദേഹം പോലും അയക്കാൻ കഴിയാത്ത അവസ്​ഥയിലായി.

കഴിഞ്ഞ ദിവസം ദുബൈയിൽ നിന്ന്​ ചെന്നെയിൽ എത്തിയ മൃതദേഹം തിരിച്ചയക്കപ്പെട്ടതോടെ പ്രതിഷേധം ശക്തമാവുകയായിരുന്നു. കഴിഞ്ഞ രണ്ടാഴ്ചകൾക്കിടയിൽ മാത്രം നാട്ടിലയക്കേണ്ട 25ലേറെ മൃതദേഹങ്ങളുടെ രേഖകളാണ്​ തനിക്ക്​ ലഭിച്ചതെന്ന്​ സാമൂഹിക പ്രവർത്തകൻ നാസ്​ വക്കം ‘ഗൾഫ്​ മാധ്യമ’ത്തോട്​ പറഞ്ഞു. ദിനംപ്രതി മൃതദേഹങ്ങളുടെ എണ്ണം കൂടി വരുന്നത്​ ആ​ശങ്കയുണ്ടാക്കുന്നുണ്ട്​. കൊല്ലപ്പെട്ടതും ആത്മഹത്യ ചെയ്​തതുമടക്കം പല മൃതദേഹങ്ങളും സ്വകാര്യ ആശുപത്രി മോർച്ചറികളിലാണുള്ളത്​. ദിനംപ്രതി കുറഞ്ഞത്​ 400ഒാളം റിയാൽ ​വാടകയായി കൊടുക്കണം സ്വകാര്യ മോർച്ചറികൾക്ക്​. എന്ന്​ നാട്ടിലെത്തിക്കാൻ കഴിയുമെന്നറിയാത്ത ആശങ്ക നിലനിൽക്കുന്നതിനാൽ ബന്ധുക്കൾ കടുത്ത ആശങ്കയിലാണ്​.

എമിറേറ്റ്​സ്​ അധികൃതർ മൃതദേഹങ്ങൾ നാട്ടിലെത്തിക്കാൻ വീണ്ടും തയാറായി വന്നപ്പോഴാണ്​ ആഭ്യന്തര മന്ത്രാലയത്തി​​െൻറ അനുമതി വേണമെന്ന പുതിയ നിയമം തടസമായി വന്നത്​. കടുത്ത എതിർപ്പിനെ തുടർന്ന്​ ശനിയാഴ്​ച ഈ ഉത്തരവ്​ പിൻവലിച്ചതോടെ മൃതദേഹങ്ങൾ നാട്ടിലെത്താനുള്ള സാഹചര്യങ്ങൾ വീണ്ടും ഒരുങ്ങുകയാണ്​.