മദീന ഇന്ത്യൻ ഫുട്ബാൾ ചാമ്പ്യൻസ് ലീഗ്; വിസിലൂതാൻ അഖിലേന്ത്യ സെവൻസ് റഫറിമാരും

മ​ദീ​ന: പ്ര​വാ​സ ഭൂ​മി​യി​ലെ ക​ളി​യാ​വേ​ശ​ത്തി​ന്‍റെ അ​ല​ക​ട​ലി​ര​മ്പു​ന്ന പ്ര​കാ​ശ​പൂ​രി​ത​മാ​യ സെ​വ​ൻ​സ് മൈ​താ​ന​ങ്ങ​ളി​ൽ അ​തി​മി​ടു​ക്കോ​ടെ വി​സി​ലൂ​തി ഫു​ട്ബാ​ൾ പ്രേ​മി​ക​ളു​ടെ ഹൃ​ദ​യ​ങ്ങ​ളി​ലേ​ക്ക്​ ഡ്രി​ബ​ള​ടി​ച്ച് ക​യ​റു​ക​യാ​ണ് കേ​ര​ള​ത്തി​ൽ നി​ന്നെ​ത്തി​യ അ​ഖി​ലേ​ന്ത്യ സെ​വ​ൻ​സി​നെ നി​യ​ന്ത്രി​ക്കു​ന്ന റ​ഫ​റി​മാ​ർ. മ​ദീ​ന ഇ​ന്ത്യ​ൻ ഫു​ട്ബാ​ൾ അ​സോ​ഷി​യേ​ഷ​​ന്‍റെ (മി​ഫ) നേ​തൃ​ത്വ​ത്തി​ൽ സം​ഘ​ടി​പ്പി​ക്കു​ന്ന ചാ​മ്പ്യ​ൻ​സ് ലീ​ഗ് മ​ത്സ​ര​ങ്ങ​ൾ​ക്കാ​യാ​ണ് നാ​ട്ടി​ൽ​നി​ന്നും അ​ഖി​ലേ​ന്ത്യ സെ​വ​ൻ​സ് ഫെ​ഡ​റേ​ഷ​ൻ അം​ഗ​ങ്ങ​ളാ​യ ശി​ഹാ​ബു​ദ്ദീ​ൻ ചേ​ളാ​രി, ഹ​ബീ​ബ് കോ​ട്ട​ക്ക​ൽ, മു​ജീ​ബു​റ​ഹ്മാ​ൻ അ​രീ​ക്കോ​ട് എ​ന്നി​വ​ർ മ​ദീ​ന​യി​ലെ​ത്തി​യ​ത്.

കേ​ര​ള​ത്തി​ലും പു​റ​ത്തു​മാ​യി ഒ​ട്ട​നേ​കം സെ​വ​ൻ​സ് മൈ​താ​ന​ങ്ങ​ളി​ൽ മ​ത്സ​ര പേ​രാ​ട്ട​ങ്ങ​ൾ​ക്ക് വി​സി​ലൂ​തി​യി​ട്ടു​ണ്ടെ​ങ്കി​ലും പ്ര​വാ​സ​ലോ​ക​ത്ത് ഇ​താ​ദ്യ​മാ​യാ​ണ് മൂ​വ​രും ക​ളി നി​യ​ന്ത്രി​ക്കാ​നെ​ത്തു​ന്ന​ത്. കേ​ര​ള​ത്തി​ലെ പോ​ലെ ത​ന്നെ പ്ര​വാ​സ​ലോ​ക​ത്തും കാ​ൽ​പ​ന്തു​ക​ളി​യെ സ്നേ​ഹി​ക്കു​ന്ന​വ​ർ ഒ​ട്ടേ​റെ​യാ​ണെ​ന്നി​വ​ർ പ​റ​യു​ന്നു. സ്വ​ന്തം ഉ​പ​ജീ​വ​നാ​ർ​ഥം മ​റ്റൊ​രു രാ​ജ്യ​ത്ത് എ​ത്തു​മ്പോ​ഴും ഒ​ട്ടും ആ​വേ​ശം ചോ​രാ​തെ പാ​തി​രാ​ത്രി​ക​ളി​ൽ പോ​ലും ഫു​ട്ബാ​ൾ മ​ത്സ​ര​ങ്ങ​ളെ വീ​ക്ഷി​ക്കാ​ൻ സ്വ​ന്തം കു​ടും​ബ​ത്തോ​ടൊ​പ്പം ഒ​ത്തു​ചേ​രു​ന്ന​വ​ർ ഫു​ട്ബാ​ൾ മ​ത്സ​ര​ങ്ങ​ൾ​ക്കും കാ​യി​ക പ്ര​തി​ഭ​ക​ൾ​ക്കും പ്ര​വാ​സ​ലോ​ക​ത്ത് വ​ലി​യ പ്രോ​ത്സാ​ഹ​ന​വും പ്ര​ചോ​ദ​ന​വും ന​ൽ​കു​ന്ന​ത് ഇ​ത്ത​രം കാ​ഴ്ച​ക​ളി​ൽ മ​ന​സ്സ​റി​ഞ്ഞ സ​ന്തോ​ഷ​മു​ണ്ടെ​ന്ന​വ​ർ പ​റ​ഞ്ഞു.

ഒ​രു മാ​സ​ത്തോ​ള​മാ​യി മ​ദീ​ന​യി​ൽ ന​ട​ക്കു​ന്ന മി​ഫ ചാ​മ്പ്യ​ൻ​സ് ലീ​ഗ് സെ​മി ഫൈ​ന​ലി​ലേ​ക്ക് പ്ര​വേ​ശി​ച്ചു. ക​ലാ, സാം​സ്കാ​രി​ക പ​രി​പാ​ടി​ക​ളു​ടെ അ​ക​മ്പ​ടി​ക​ളോ​ടെ​യാ​ണ് വി​വി​ധ മ​ത്സ​ര​ങ്ങ​ൾ ആ​രം​ഭി​ക്കു​ന്ന​ത്. മ​ത്സ​ര​ങ്ങ​ൾ കാ​ണാ​ൻ ക​ളി അ​വ​സാ​നി​ക്കു​ന്ന പു​ല​ർ​ച്ച​യോ​ളം കു​ടും​ബ​ത്തോ​ടൊ​പ്പം കാ​ത്തി​രി​ക്കു​ന്ന​തി​ലൂ​ടെ പ്ര​വാ​സ​ത്തി​ലെ ഫു​ട്ബാ​ൾ മേ​ള​ക​ൾ ആ​ഘോ​ഷ​രാ​വു​ക​ളാ​ക്കി മാ​റ്റു​ക​യു​മാ​ണ് ക​ളി​ക്ക​മ്പ​ക്കാ​രാ​യ മ​ദീ​ന​യി​ലെ നൂ​റു​ക​ണ​ക്കി​ന് ഫു​ട്ബാ​ൾ പ്രേ​മി​ക​ൾ.