മനസ്സിൽ മലയാളത്തനിമ നിറച്ച്​ കേരളോത്സവത്തിന്​ സമാപനം

അബൂദബി: കലയിലും രുചിയിലും ആഘോഷത്തിലും മലയാളത്തനിമ നിറച്ച രണ്ട്​ ദിവസത്തെ കേ​രളോത്സവം സമാപിച്ചു. അബൂദബി മലയാളി സമാജം മുസഫയിൽ സംഘടിപ്പിച്ച ഉത്സവമാണ്​ ആയിരങ്ങളെ ആകർഷിച്ചത്​. 25ഓളം സ്​റ്റാളുകളിലായി നടന്ന വ്യാപാരമേളയായിരുന്നു ഉത്സവത്തി​​​​െൻറ പ്രധാന ആകർഷണം. പത്തിലധികം സ്​റ്റാളുകളി​ൽ കേരളത്തി​​​​െൻറ രുചി നിറച്ച ഭക്ഷ്യവിഭവങ്ങൾക്ക് മാത്രമുള്ളതായിരുന്നു. അബൂദബിയിലെ സാംസ്‌കാരിക സംഘടനകളുടെ വനിതാ വിഭാഗമാണ് മിക്ക ഭക്ഷണ സ്​റ്റാളുകൾക്കും നേതൃത്വം നൽകിയത്. 

വസ്ത്രമേള, ആഭരണമേള, പുസ്തകമേള, ആരോഗ്യ പരിശോധനാ ക്യാമ്പ് തുടങ്ങിയവയും  കേരളോത്സവത്തി​​​​െൻറ ഭാഗമായി സംഘടിപ്പിച്ചു. രണ്ട് വേദികളിലായി നാട്ടിലെയും യു.എ.ഇയിലെയും കലാകാരന്മാർ അവതരിപ്പിച്ച നൃത്ത^സംഗീത പരിപാടികളും നടന്നു. പ്രവേശന കൂപ്പൺ നറുക്കിട്ടെടുത്ത് വിജയികളായവർക്ക് കാറടക്കം 50 സമ്മാനങ്ങളും നൽകി. സമാജം പ്രസിഡൻറ്​ വക്കം ജയലാൽ, ജനറൽ സെക്രട്ടറി എ.എം. അൻസാർ, കല വിഭാഗം സെക്രട്ടറി ബിജു വാര്യർ,  ട്രഷറർ ടോമിച്ചൻ വർക്കി, വൈസ് പ്രസിഡൻറ്​ അൻസാരി പള്ളിക്കൽ, കേരളോത്സവം കൺവീനർ പുന്നൂസ്​ ചാക്കോ, കെ.കെ. മൊയ്തീൻ കോയ, നാസർ വിളഭാഗം എന്നിവർ ആദ്യദിനം നടന്ന സാംസ്കാരിക പരിപാടിയിൽ പങ്കെടുത്തു.