ലൈസൻസ്​ പിഴ ഇളവ്​ വ്യാപകമാക്കി രാജ്യം, വ്യവസായികൾക്ക്​ സുവർണാവസരം

ദുബൈ:  രാഷ്​ട്രപിതാവ്​ ശൈഖ്​ സായിദ്​ ആൽ നഹ്​യാൻ വർഷാചരണത്തിലെ റമദാനിൽ വ്യവസായ സമൂഹത്തിന്​ ആശ്വാസവും ആത്​മവിശ്വാസവും പകർന്ന്​ പിഴകളിൽ ഇളവു നൽകി രാജ്യം. യു.എ.ഇ വൈസ്​പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തും പ്രഖ്യാപിച്ച നിയമ പ്രകാരം  ലൈസൻസ്​ പുതുക്കാത്തതി​​​​െൻറ പേരിൽ ദുബൈ ഇക്കണോമിക്​ ഡിപ്പാർട്ട്​മ​​​െൻറ്​ ചുമത്തിയ പിഴകളെല്ലാം 2018 അവസാനം വരെ റദ്ദാക്കിയിട്ടുണ്ട്​.

ഇത്​ നിരവധി വ്യാപാരികൾക്ക്​ ആശ്വാസകരമാവും. ഏവരും ഇൗ സൗകര്യം ഉപയോഗപ്പെടുത്തണമെന്നും ഏറ്റവും സുഗമമായി വ്യവസായം നടത്താൻ കഴിയുന്ന ഇടം എന്ന ഖ്യാതി ഉൗട്ടി ഉറപ്പിക്കുന്ന നടപടിയായി ഇൗ തീരുമാനം മാറുമെന്നും ദുബൈ ഇക്കണോമി ഡയറക്​ടർ ജനറൽ സാമി അൽ ഖംസി വ്യക്​തമാക്കി. സാമ്പത്തിക വ്യവസായ വളർച്ചക്ക്​ ശക്​തി പകരുന്ന തീരുമാനമാണിതെന്ന്​ ഡി.ഇ.ഡി ലൈസൻസിങ്​ വിഭാഗം സി.ഇ.ഒ ഉമർ ബുഷഹാബ്​ പറഞ്ഞു.

24 മാസത്തിലേറെയായി ലൈസൻസ്​ കാലഹരണപ്പെടുകയും പുതുക്കാനോ, പിൻവലിക്കാനോ, ലിക്യുഡേഷനോ അപേക്ഷിച്ചിരിക്കുന്ന സ്​ഥാപനങ്ങളുടെ പിഴകൾ റദ്ദാക്കാൻ അബൂദബിയും തീരുമാനിച്ചിട്ടുണ്ട്​. അബൂദബിയിലെ വ്യവസായ അന്തരീക്ഷം കൂടുതൽ പ്രോത്​സാഹനകരമാവാൻ ഇതു സഹായിക്കുമെന്ന്​ അബൂദബി ഡി.ഇ.ഡി ആക്​ടിങ്​ അണ്ടർ ​െസക്രട്ടറി ഖലീഫ ബിൻ സാലിം അൽ മൻസൂരി പറഞ്ഞു. അജ്​മാൻ, ഫുജൈറ തുടങ്ങിയ എമിറേറ്റുകളും നേരത്തേ ലൈസൻസ്​ ഫീസ്​ കുടിശിഖ ഇളവ്​ പ്രഖ്യാപിച്ചിരുന്നു.