താൻ രാഹുലോ സോണിയയോ അല്ലെന്ന് മോദിയോട് കെജ്രിവാൾ

ന്യൂഡൽഹി: താൻ രാഹുലോ സോണിയയോ വാദ്രയോ അല്ലെന്നും കേസെടുത്ത് പേടിപ്പിക്കേണ്ടെന്നും മോദിയോട് ഡൽഹി മുഖ്യമന്ത്രി അരവിന്ദ് കെജ് രിവാൾ. കേെസടുത്തും ഭീഷണിപ്പെടുത്തിയും റെയ്ഡ് നടത്തിയും മോദി ആളുകളെ പേടിപ്പിക്കുകയാണ്. എന്നാൽ താൻ പാറ പോലെ ഉറച്ച് നിൽക്കുമെന്നും പിന്നോട്ട് പോകില്ലെന്നും കെജ് രിവാൾ കൂട്ടിച്ചേർത്തു.

കെജ് രിവാളിനും മുൻമുഖ്യമന്ത്രി ഷീലാ ദീക്ഷിതിനുമെതിരെ അഴിമതി നിരോധ വിഭാഗം കഴിഞ്ഞദിവസം എഫ്.ഐ.ആർ രജിസ്റ്റർ ചെയ്തിരുന്നു. 2012ൽ ഷീലാ ദീക്ഷിത് ജൽബോർഡ് ചെയർ പേഴ്സണായിരിക്കെ സ്വകാര്യ കമ്പനികൾക്ക് വാട്ടർ ടാങ്കുകൾ വാങ്ങാൻ ടെൻഡർ നൽകിയതാണ് കേസിന് ആസ്പദമായ സംഭവം. കഴിഞ്ഞ വർഷം ആം ആദ്മി സർക്കാർ ഇതേക്കുറിച്ച് അന്വേഷിക്കാനായി നിയമിച്ച കമ്മിറ്റി 400 കോടി രൂപയുടെ ക്രമക്കേട് നടന്നതായി കണ്ടെത്തിയിരുന്നു. എന്നാൽ വിവാദമായ കരാർ റദ്ദാക്കിയില്ല എന്നാരോപിച്ചാണ് കെജ് രിവാളിനെതിരെയും കേസെടുത്തത്.