ബി.ജെ.പി നേതാവിന്‍റെ പരാമർശം: സമാധാന യോഗം അലസിപ്പിരിഞ്ഞു

ന്യൂഡൽഹി: ഹനുമാൻ ജയന്തി ഘോഷയാത്ര സംഘർഷത്തിൽ കലാശിച്ച ഡൽഹി ജഹാംഗീർപുരിയിൽ ഇരു സമുദായങ്ങൾക്കിടയിൽ സമാധാനം പുനഃസ്ഥാപിക്കാൻ വിളിച്ചുചേർത്ത യോഗം അലസിപ്പിരിഞ്ഞു. ബംഗ്ലാദേശി മുസ്​ലിംകൾ പ്രദേശത്ത്​ താമസം തുടങ്ങിയതാണ്​ പ്രശ്നങ്ങൾക്ക്​ കാര​ണമെന്ന്​ ബി.ജെ.പി നേതാവ്​ ആരോപിച്ചതാണ്​ ​അലസിപ്പിരിയലിന്​ കാരണമായത്​.

മഹേന്ദർ പാർക്​, ജഹാംഗീർപുരി, ആദർശ്​ നഗർ എന്നിവിടങ്ങളിലെ 'അമൻ കമ്മിറ്റി' (സമാധാന കമ്മിറ്റി) അംഗങ്ങളുമായി ചർച്ച നടത്താൻ പൊലീസ്​ ഡെപ്യൂട്ടി കമീഷണർ ഉഷ രംഗ്​നാനിയുടെ നേതൃത്വത്തിലാണ്​ ഡൽഹി പൊലീസ്​ യോഗം വിളിച്ചത്​. ഊഹങ്ങൾ പ്രചരിപ്പിക്കുന്നതിൽനിന്ന്​ ഇരുസമുദായങ്ങളിലുമുള്ളവർ വിട്ടുനിൽക്കണമെന്നും നിഷ്പക്ഷമായും നീതിപൂർവകമായും പൊലീസ്​ അന്വേഷിക്കുമെന്നും ഉഷ പറഞ്ഞു. ലഹളക്കാർക്കെതിരെ കർശന നടപടിയുണ്ടാകുമെന്നും അവർ പറഞ്ഞു.

തനിക്ക്​ സംസാരിക്കാൻ അവസരം നൽകണമെന്ന ബി.ജെ.പി കൗൺസിലർ ഗരിമ ഗുപ്തയുടെ ആവശ്യം പൊലീസ്​ തള്ളിയെങ്കിലും അവർ സംസാരിച്ചു തുടങ്ങുകയായിരുന്നു. ഹിന്ദുക്കളും മുസ്​ലിംകളും ഇവിടെ സമാധാനത്തോടെ ഒരുമിച്ചാണ്​ കഴിയുന്നതെന്ന്​ പറഞ്ഞ ഗരിമ തുടർന്ന്​ ബംഗ്ലാദേശി മുസ്​ലിംകൾ പ്രദേശത്ത്​ താമസം തുടങ്ങിയതാണ്​ പ്രശ്നങ്ങൾക്ക്​ കാര​ണമെന്ന്​ ആരോപിച്ചതോടെ ഉഷ രംഗ്​നാനി ഇടപെട്ടു. വിഷയത്തിൽനിന്ന്​ വഴിതെറ്റിക്കുന്ന സംസാരമാണിതെന്ന്​ പറഞ്ഞ്​ അവർ യോഗം അവസാനിപ്പിച്ചു. എല്ലാവരും അവരവരുടെ പ്രദേശങ്ങളിലേക്ക്​ പിരിഞ്ഞുപോകണമെന്നും സമാധാനം കാത്തുസൂക്ഷിക്കണമെന്നും ഉഷ രംഗ്​നാനി ആവശ്യപ്പെട്ടു.