രണ്ട്​ വയസുകാരിയെ സിഗരറ്റ്​ കൊണ്ട്​ പൊള്ളിച്ച പൊലീസുകാരൻ അറസ്​റ്റിൽ; ജോലിയിൽ നിന്നും പുറത്താക്കി

റായ്​പൂർ: ചത്തീസ്​ഗഢിൽ രണ്ട്​ വയസുകാരിയെ സിഗരറ്റ്​ കൊണ്ട്​ പൊളളിച്ച പൊലീസ്​ കോൺസ്​റ്റബിളിനെ അറസ്​റ്റ്​ ചെയ്​തു. ഇയാളെ ജോലിയിൽ നിന്നും പുറത്താക്കിയിട്ടുണ്ട്​. ബാലോഡ്​ ജില്ലയിലാണ്​ നാടിനെ നടക്കുന്ന സംഭവമുണ്ടായത്​. പപ്പായെന്ന്​ വിളിക്കാൻ വിസമ്മതിച്ചതിനായിരുന്നു പൊലീസ്​ കോൺസ്​റ്റബിളായ അവിനാശ്​ റായ്​ കുട്ടിയെ സിഗരറ്റ്​ കൊണ്ട്​ പൊളളിച്ചത്​.

ശനിയാഴ്​ച രാത്രി ഭിലായിയിലെ ഒരു ഹോട്ടലിൽ നിന്നാണ്​ അവിനാശിനെ അറസ്​റ്റ്​ ചെയ്​തതെന്ന്​ ​പൊലീസ്​ സുപ്രണ്ട്​ ജിതേന്ദ്ര സിങ്​ മീന പറഞ്ഞു. ഇയാളെ ജോലിയിൽ നിന്ന്​ പുറത്താക്കിയെന്നും അദ്ദേഹം അറിയിച്ചു.

നാടോടി ഗായികയായ ​കുട്ടിയുടെ അമ്മ അവിനാശിൽ നിന്ന്​ പണം കടം വാങ്ങിയിരുന്നു. കഴിഞ്ഞ ദിവസം മദ്യപിച്ചെത്തി ഇയാൾ പണം തിരികെ ചോദിച്ചു. പിന്നീട്​ രണ്ടുവയസുള്ള പെൺകുട്ടിയോട്​ പപ്പ എന്ന്​ വിളിക്കാൻ ആവശ്യപ്പെട്ടു. എന്നാൽ, കുട്ടി അത്​ ചെയ്യാതിരുന്നതോടെ മർദിക്കുകയും സിഗരറ്റ്​ കൊണ്ട്​ മുഖത്തും വയറിലും കാലിലും പൊള്ളിക്കുകയുമായിരുന്നു. പിന്നീട്​ ഇയാൾ ഇവിടെ നിന്നും രക്ഷപ്പെട്ടു.