ആത്മഹത്യ ചെയ്​ത 18കാരിയെ ഏഴുമാസത്തിനിടെ വിറ്റത്​ ഏഴുതവണ; പുറത്തുവന്നത്​ ഞെട്ടിക്കുന്ന വിവരങ്ങൾ

ഭോപാൽ: ഛത്തീസ്​ഖണ്ഡ്​ സ്വദേശിയായ 18കാരിയെ ഏഴുമാസത്തിനുള്ളിൽ വിറ്റത്​ ഏഴിലധികം തവണ. നിരന്തരം ചൂഷണത്തിന്​​ വിധേയമായ പെൺകുട്ടി കഴിഞ്ഞവർഷം സെപ്​റ്റംബറിൽ ആത്മഹത്യ ചെയ്​തിരുന്നു. തുടർന്ന്​ പൊലീസ്​ നടത്തിയ അന്വേഷണത്തിൽ ഞെട്ടിക്കുന്ന വിവരങ്ങളാണ്​ പുറത്തുവന്നത്​.

മധ്യപ്രദേശ്​, ഉത്തർപ്രദേശ്​, ഛത്തീസ്​ഗഡ്​ സംസ്​ഥാനങ്ങളിലേക്ക്​ അന്വേഷണം വ്യാപിപ്പിച്ച പൊലീസ്​ കേസുമായി ബന്ധപ്പെട്ട്​ എ​ട്ടോളം പേരെ അറസ്​റ്റ്​ ചെയ്​തിട്ടുണ്ട്​.

ഛത്തീസ്​ഗഡിലെ ജഷ്​പൂർ സ്വദേശിയാണ്​ പെൺകുട്ടി. കാർഷിക തൊഴിലാളിയായിരുന്നു പെൺകുട്ടിയുടെ പിതാവ്​. തൊഴിലിൽ പിതാവിനെ സഹായിച്ചുകൊണ്ടിരുന്ന പെൺകുട്ടിയെ ജോലി വാങ്ങി നൽകാമെന്ന്​ അറിയിച്ച്​ ബന്ധു മധ്യപ്രദേശിലെ ഛത്താർപുരി​ലേക്ക്​ കൂട്ടികൊണ്ടുപോകുകയായിരുന്നു.

അവിടെവച്ച്​ പെൺകുട്ടിയെ ഒരു സംഘം തട്ടിക്കൊണ്ടുപോയി. പെൺകുട്ടിയെ വിട്ടു നൽകണമെങ്കിൽ പണം നൽകണമെന്നായിരുന്നു ആവശ്യം. പണം നൽകിയില്ലെങ്കിൽ പെൺകുട്ടിയെ കൊന്നുകളയുമെന്ന്​ ഭീഷണിപ്പെടുത്തിയതോടെ കുടുംബം പൊലീസിനെ വിവരം അറിയിച്ചു.

ഇതോടെ തട്ടികൊണ്ടുപോയവർ പെൺകുട്ടിയെ 20,000 രൂപക്ക്​ ഛത്താർപുർ സ്വദേശിയായ കല്ലു രായ്​ക്​വാർക്ക്​ വിറ്റു. ഇയാൾ പെൺകുട്ടിയെ മറ്റൊരു കൂട്ടർക്ക്​ കൈമാറി. അവസാനമായി പെൺകുട്ടിയെ വാങ്ങിയത്​ യു.പിയിലെ ലളിത്​പുർ സ്വദേശിയായ സന്തോഷ്​ കുഷ്​വാഹായിരുന്നു. 70,000 രൂപക്കാണ്​ 18കാരിയെ ഇയാൾ വാങ്ങിയത്​.

ഇവിടെവെച്ച്​ പെൺകുട്ടിയെ സന്തോഷിന്‍റെ മകൻ ബബ്​ലൂ കുഷ്​വാഹിനെകൊണ്ട്​നിർബന്ധിച്ച്​ വിവാഹം കഴിപ്പിച്ചു. മാനസിക വെല്ലുവിളി നേരിടുന്ന വ്യക്തിയാണ്​ ബബ്​ലൂ.

നിരന്തരം ചൂഷണത്തിന്​ വിധേയമായതോടെ കഴിഞ്ഞവർഷം സെപ്​റ്റംബറിൽ പെൺകുട്ടി ആത്മഹത്യ ചെയ്​തു. ബബ്​ലൂ കുഷ്​വാഹിനെ പിടികൂടാൻ പൊലീസിന്​ കഴിഞ്ഞിട്ടില്ല.

പെൺകുട്ടിയെ പിതാവിന്‍റെ അടുത്തു​നിന്ന്​ അകന്ന ബന്ധുക്കൾ പണം നൽകി വാങ്ങിയതാണെന്ന്​ പൊലീസ്​ പിന്നീട്​ കണ്ടെത്തി. തുടർന്ന്​ ബന്ധുക്കളായ പഞ്ചം സിങ് റായ്​യെയും ഭാര്യയെയും പൊലീസ്​ അറസ്​റ്റ്​ ചെയ്​തു. കേസിൽ എട്ടുപേരാണ്​ അറസ്റ്റിലായിരിക്കുന്നത്​. കൂടുതൽ പെൺകുട്ടികളെ ഇത്തരം കെണിയിൽ ഈ സംഘം വീഴ്​ത്തിയിരിക്കാമെന്ന അനുമാനത്തിലാണ്​ പൊലീസിന്‍റെ അന്വേഷണം.