സുപ്പർമാർക്കറ്റിൽ മാസ്​ക്​ ധരിക്കാൻ വിസമ്മതിച്ച ഡോക്​ടർക്കെതിരെ കേസ്​; വിഡ്ഡിയാകാനില്ലെന്ന്​ ഡോക്​ടർ

സൂപ്പർമാർക്കറ്റിൽ മാസ്​ക്​ ധരിക്കാൻ വിസമ്മതിക്കുകയും തർക്കിക്കുകയും ചെയ്​ത മംഗളുരുവിലെ ഡോക്​ടർക്കെതിരെ പകർച്ചവ്യാധി നിയമമനുസരിച്ച്​ കേസെടുത്തു. മംഗളുരു കാദ്​രിയിലെ ജിമ്മി സൂപ്പർമാർക്കറ്റിലാണ്​ സംഭവം. ബില്ലിങ്​ കൗണ്ടറിൽ മാസ്​ക്​ ധരിക്കാതെ എത്തിയ ഡോ. ബി. ശ്രീനിവാസ കക്കിലയക്കെതിരെ സൂപ്പർ മാർക്കറ്റ്​ പാർടണറുടെ പരാതിയിൽ കാദ്​രി ​പൊലീസാണ്​ കേസെടുത്തത്​.

മാസ്​ക്​ ധരിക്കാതെ കൗണ്ടറിലേക്ക്​ ബിൽ ചെയ്യാൻ സാധനങ്ങളെടുത്തുവെക്കുന്ന ഡോക്​ടറുടെ വിഡിയോ ദൃശ്യവും സമൂഹ മാധ്യമങ്ങളിൽ പ്രചരിക്കുന്നുണ്ട്​. ബില്ലിങ്​ കൗണ്ടറിലുള്ളയാൾ ഡോക്​ടറോട്​ മാസ്​ക്​ ധരിക്കാൻ ആവശ്യപ്പെടുന്നതും വിഡിയോയിൽ കാണാം. എന്നാൽ, താൻ നേരത്തെ കോവിഡ്​ ബാധിച്ച്​ രോഗം ഭേദമായ ആളാണെന്നാണ്​ ഡോക്​ടർ പറയുന്നത്​. അതുകൊണ്ട്​ തന്നെ രോഗം പകരില്ലെന്നും അദ്ദേഹം പറയുന്നു.

എന്നാൽ, മാസ്​ക്​ ധരിക്കുക എന്നത്​ നിയമമാണെന്നും എല്ലാവരും അനുസരിക്കണമെന്നുമാണ്​ സൂപ്പർ മാർക്കറ്റ്​ ജീവനക്കാരൻ മറുപടി പറയുന്നത്​. മാസ്​ക്​ ധരിക്കാതിരിക്കുന്നതിനാൽ സൂപ്പർ മാർക്കറ്റിലെ ജീവനക്കാരും മറ്റു ഉപഭോക്​താക്കളും രോഗഭീഷണിയിലാകുമെന്നും സൂപ്പർ മാർക്കറ്റ്​ ജീവനക്കാരൻ പറയുന്നുണ്ട്​. ഇരുവരുടെയും സംസാരം ഉച്ചത്തിലാകുകയും തർക്കമാകുകയും ചെയ്യുന്നുണ്ട്​. എന്നാൽ, ഡോക്​ടർ മാസ്​ക്​ ധരിക്കാതെ സാധനങ്ങൾ കൗണ്ടറിലേക്ക്​ വെക്കുന്നത്​ തുടരുകയും ചെയ്​തു.

സർക്കാറുണ്ടാക്കുന്ന വിഡ്ഡി നിയമങ്ങൾ അനുസരിക്കാൻ തന്നെ കിട്ടില്ലെന്നും ഡോക്​ടർ സൂർപ്പർ മാർക്കറ്റ്​ ജീവനക്കാരനോട്​ പറയുന്നുണ്ട്​. രോഗം ബാധിച്ച്​മാറിയ ആൾ ആയതുകൊണ്ട്​ വീണ്ടും രോഗം ബാധിക്കുകയോ രോഗം പടർത്തുകയോ ചെയ്യില്ലെന്നാണ്​ ഡോക്​ടർ ചൂണ്ടികാട്ടുന്ന ന്യായം.

മാസ്​ക്​ ധരിക്കാതെ സൂപ്പർ മാർക്കറ്റ്​ ജീവനക്കാരെയും മറ്റു ഉപഭോക്​താക്കളെയും രോഗഭീഷണിയിലാക്കിയെന്ന ജിമ്മി സൂപ്പർമാർക്കറ്റ്​ പാർടണറുടെ പരാതിയിലാണ്​ ഡോക്​ടർക്കെതിരെ കേസെടുത്തിട്ടുള്ളത്​. കർണാടക പകർച്ചവ്യാധി (പ്രതിരോധ) നിയമം 2020 ലെ വകുപ്പുകൾ ചേർത്താണ്​ കേസ്​ ചുമത്തിയിട്ടുള്ളത്​.

24 മണിക്കൂറിനിടെ 30000 ആളുകൾക്കാണ്​ പുതിയതായി കോവിഡ് സ്​ഥിരീകരിച്ചിട്ടുള്ളത്​. 5.75 ലക്ഷം ആളുകൾ കർണാടകയിൽ കോവിഡ്​ രോഗികളായുണ്ട്​.