മുസ്​ലിംകൾ മതേതര രാഷ്ട്രീയത്തിൽ കുടുങ്ങരുത് -അസദുദ്ദീൻ ഉവൈസി

മുംബൈ: മുസ്‌ലിംകൾ മതേതര രാഷ്ട്രീയത്തിൽ കുടുങ്ങരുതെന്നും ഭരണഘടനാപരമായ മതേതരത്വത്തിൽ വിശ്വസിക്കണമെന്നും ആൾ ഇന്ത്യ മജ്‌ലിസെ-ഇത്തിഹാദുൽ മുസ്‌ലിമീൻ (എ.ഐ.എം.ഐ.എം) തലവൻ അസദുദ്ദീൻ ഉവൈസി. മുംബൈയിൽ ഒരു സമ്മേളനത്തെ അഭിസംബോധന ചെയ്തു സംസാരിക്കുകയായിരുന്നു അദ്ദേഹം.

'ഇന്ത്യയിലെ മുസ്​ലിംകൾക്ക്​ മതേതരത്വത്തിൽ നിന്ന് എന്താണ് ലഭിച്ചത്? നമ്മൾക്ക് മതേതരത്വത്തിൽ നിന്ന് സംവരണം ലഭിച്ചോ? മസ്​ജിദ് തകർത്തവർക്ക് ശിക്ഷ ലഭിച്ചോ? ഇല്ല. ആർക്കും കിട്ടിയില്ല. ഒന്നും' -ഉവൈസി പറഞ്ഞു. രാഷ്ട്രീയ മതേതരത്വത്തിലല്ല ഭരണഘടനാപരമായ മതേതരത്വത്തിലാണ് ഞാൻ വിശ്വസിക്കുന്നത്. രാഷ്ട്രീയ മതേതരത്വത്തിൽ കുടുങ്ങരുതെന്ന് എല്ലാവരോടും ഞാൻ അഭ്യർത്ഥിക്കുന്നു -അദ്ദേഹം പറഞ്ഞു. സർക്കാർ കണക്കുകൾ പ്രകാരം മഹാരാഷ്ട്രയിൽ ബിരുദധാരികളായ മുസ്​ലിംകൾ 4.9 ശതമാനം മാത്രമേയുള്ളൂ. മിഡിൽ സ്കൂളിൽ 13 ശതമാനം മുസ്​ലിം വിദ്യാർത്ഥികളുണ്ട്. മഹാരാഷ്ട്രയിലെ 83 ശതമാനം മുസ്​ലിംകളും ഭൂരഹിതരാണ്.