'യോഗി രക്തം കുടിക്കുന്ന രാക്ഷസൻ' പരാമർശം; മുൻ ഗവർണർ അസീസ്​ ഖുറേഷിക്കെതിരെ രാജ്യദ്രോഹക്കുറ്റം ചുമത്തി

ലഖ്​നോ: ഉത്തർപ്രദേശ്​ മുഖ്യമന്ത്രി യോഗി ആദിത്യനാഥിനെതിരെ വിദ്വേഷകരമായ പരാമർശം നടത്തിയ മുൻ ഗവർണർ അസീസ്​ ഖുറേഷിക്കെതിരെ രാജ്യദ്രോഹക്കുറ്റം ചുമത്തി. 'യോഗി രക്തം കുടിക്കുന്ന രാക്ഷസൻ' എന്ന പരാമർശത്തിനെതിരെയാണ്​ കേസ്​.

ബി.ജെ.പി നേതാവ്​ ആകാശ്​ കുമാർ സ​ക്​സേനയുടെ പരാതിയിൽ സിവിൽ ലൈൻ പൊലീസ്​ എഫ്​.ഐ.ആർ രജിസ്റ്റർ ചെയ്യുകയായിരുന്നു. വിവിധ വാർത്ത ചാനലുകൾ സംപ്രേഷണം ചെയ്​ത ഖുറേഷിയുടെ പ്രസ്​താവന ഉൾപ്പെടുന്ന പെൻഡ്രൈവും സക്​സേന പൊലീസിന്​ കൈമാറി.

സമാജ്​വാദി പാർട്ടി നേതാവ്​ അസം ഖാന്‍റെ വസതി സന്ദർശിച്ചതിന്​ ശേഷമായിരുന്നു മുൻ ഗവർണറുടെ വിവാദ പരാമ​ർശം. രണ്ടു വിഭാഗങ്ങൾക്കിടയിൽ ഇത്​ മതസ്​പർദയുണ്ടാക്കുമെന്നും സമൂഹത്തിലെ സമാധാന അന്തരീക്ഷം തകർക്കുമെന്നും സക്​സേനയുടെ പരാതിയിൽ പറയുന്നു​.

മുതിർന്ന കോൺഗ്രസ്​ നേതാവായ 81കാരൻ ഖുറേഷി 2014-15 കാലയളവിൽ മിസോറാം ഗവർണറായിരുന്നു. കുറച്ചുകാലത്തേക്ക്​ ഉത്തർപ്രദേശിന്‍റെ ചുമതലയും അദ്ദേഹത്തിനുണ്ടായിരുന്നു. നിയമത്തിന്‍റെ അടിസ്​ഥാനത്തിൽ പരാതിയിൽ നടപടി സ്വീകരിക്കുമെന്ന്​ പൊലീസ്​ പറഞ്ഞു.