യു.പിയിൽ ആറുവയസുകാരിയുടെ കൊല കൂട്ടബലാത്സംഗത്തിനുശേഷം​; ദുർമന്ത്രവാദത്തിനായി ശ്വാസകോശം പുറത്തെടുത്തു

കാൺപുർ: ഉത്തർപ്രദേശിലെ കാൺപുരിൽ മരിച്ച നിലയിൽ കണ്ടെത്തിയ ആറുവയസുകാരിയെ കൂട്ടബലാത്സംഗം ചെയ്​ത്​ കൊലപ്പെടുത്തിയതെന്ന്​ പൊലീസ്​. സംഭവത്തിൽ നാലുപേരെ പൊലീസ്​ അറസ്​റ്റ്​ ചെയ്​തിട്ടുണ്ട്​. കൊലപാതകത്തിന്​ ശേഷം പെൺകുട്ടി​യുടെ ശ്വാസകോശം പു​റത്തെടുത്ത നിലയിലായിരുന്നു മൃതദേഹം. കുട്ടികളുണ്ടാകാനായി ദുർമന്ത്രവാദം നടത്തുന്നതിനുവേണ്ടിയാണ്​ കുഞ്ഞി​െൻറ ശ്വാസകോശം പുറത്തെടുത്തതെന്നും പൊലീസ്​ കൂട്ടിച്ചേർത്തു.

ശനിയാഴ്​ച ദീപാവലിക്ക്​ പടക്കം വാങ്ങാൻ പോയ പെൺകുട്ടിയെ ഗതംപുർ പ്രദേശത്തുനിന്ന്​ കാണാതാകുകയായിരുന്നു. കുട്ടിയെ തിരഞ്ഞ്​ ബന്ധുക്കൾ കാട്ടിലെത്തിലെത്തിയെങ്കിലും കണ്ടെത്താനായിരുന്നില്ല. പിന്നീട്​ ഞായറാഴ്​ച രാവിലെ കുട്ടിയുടെ മൃതദേഹം കാട്ടിൽനിന്ന്​ നാട്ടുകാർ കണ്ടെത്തുകയായിരുന്നു. സമീപത്തെ മരച്ചുവട്ടിൽനിന്ന്​ കുട്ടിയുടെ ആഭരണങ്ങളും വസ്​ത്രവും ചെരുപ്പും കണ്ടെത്തിയിരുന്നു.

തുടർന്ന്​ പ്രതികളായ 20കാരൻ അൻകുൽ കുറിൽ, 31കാരൻ ബീരാൻ എന്നിവരെ ഞായറാഴ്​ചതന്നെ പൊലീസ്​ അറസ്​റ്റ്​ ചെയ്​തിരുന്നു. കൂട്ടബലാത്സംഗം ചെയ്​ത്​ കൊലപ്പെടുത്തിയശേഷം കുട്ടിയുടെ ശ്വാസകോശം പുറത്തെടുക്കുകയും മുഖ്യആസൂത്രകനായ പരശുറാം കുറിലിന്​ ദുർമന്ത്രാവാദത്തിനായി കൈമാറുകയായിരുന്നുവെന്നു​ം മുതിർന്ന പൊലീസ്​ ഉദ്യോഗസ്​ഥൻ ബ്രജേഷ്​ ശ്രീവാസ്​തവ പറഞ്ഞു​.

പരശുറാമിനെ തിങ്കളാഴ്​ച അറസ്​റ്റ്​ ചെയ്​തിരുന്നു. സംഭവത്തെക്കുറിച്ച്​ അറിയാമായിരുന്ന ഇയാളുടെ ഭാര്യയെയും കസ്​റ്റഡിലെടുത്തതായി പൊലീസ്​ പറഞ്ഞു​.

1999ൽ വിവാഹം കഴിഞ്ഞ പരശുറാമിനും ഭാര്യക്കും ഇതുവരെ കുട്ടികളുണ്ടായിരുന്നില്ല. തുടർന്ന്​ കുട്ടികളുണ്ടാകാനായി ദുർമന്ത്രവാദം ചെയ്യാൻ ബന്ധുവായ അങ്കുലിനോടും സുഹൃത്ത്​ ബീരാനോടും കുട്ടിയെ തട്ടിയെടുത്ത്​ ശ്വാസകോശം കൊണ്ടുവരാൻ ആവശ്യപ്പെടുകയായിരുന്നു. തുടർന്ന്​ മദ്യാസക്തിയിലായിരുന്ന അങ്കുലും ബീരാനും പെൺകുട്ടിയെ തട്ടികൊണ്ടുപോകുകയും ക്രുൂരബലാത്സംഗം ചെയ്​ത്​ കൊലപ്പെടുത്തുകയുമായിരുന്നു.