ബി.ജെ.പി നേതാവും അനുയായികളും ചേർന്ന്​ 20കാരിയെ തട്ടിക്കൊണ്ടുപോയി കൂട്ടബലാത്സംഗം ചെയ്​തു

ഭോപാൽ: മധ്യപ്രദേശിൽ 20കാരിയെ ബി.ജെ.പി നേതാവും അനുയായികളും ചേർന്ന്​​ തട്ടിക്കൊണ്ടുപോയി കൂട്ടബലാത്സംഗം ചെയ്​തതായി പരാതി. ശഹ്​ദോൾ ജില്ലയിലാണ്​ സംഭവം. പ്രാദേശിക ബി.ജെ.പി നേതാവാണ്​ പ്രതികളിലൊരാളെന്ന്​ പൊലീസ്​ പറഞ്ഞു.

നാലുപേർ ചേർന്ന്​ യുവതിയെ തട്ടിക്കൊണ്ടുപോയി കളപ്പുരയിലെത്തിച്ച്​ രണ്ടുദിവസത്തോളം കൂട്ടബലാത്സംഗത്തിന്​ വിധേയമാക്കുകയായിരുന്നു. പലവ്യഞ്​ജനം മേടിക്കാനായി കടയിലേക്ക്​ പോയ യുവതി​യെ ഫെബ്രുവരി 18നാണ്​ നാലംഗ സംഘം തട്ടിക്കൊണ്ടുപോകുന്നത്​. യുവതി ബന്ധുവീട്ടിൽ പോയിരിക്കാമെന്ന്​ കരുതി പൊലീസിൽ പരാതി നൽകിയില്ലെന്ന്​ ബന്ധുക്കൾ പറഞ്ഞു. ഫെബ്രുവരി 20ന്​ യുവതിയെ ബോധരഹിതയായ നിലയിൽ വീടിന്​ സമീപത്തുനിന്ന്​ ക​ണ്ടെത്തുകയായിരുന്നു. ഇതോടെ കുടുംബം പൊലീസിൽ പരാതി നൽകി.

ജെയ്​ട്​പുർ ബി.ജെ.പി നേതാവ്​ വിജയ്​ ത്രിപാഠിയും അനുയായികളായ രാ​േജഷ്​ ശുക്ല, മുന്ന സിങ്​, മോനു മഹാരാജ്​ തുടങ്ങിയവരാണ്​ പ്രതികളെന്ന്​ കുടുംബം പൊലീനെ അറിയിച്ചു. യുവതിയുടെ പരാതിയിൽ നാലുപേർക്കെതിരെ കേസ്​ രജിസ്റ്റർ ചെയ്​തതായും പ്രതികൾക്കായി തിരച്ചിൽ ആരംഭിച്ചതായും പൊലീസ്​ പറഞ്ഞു.