കോവിഡ്​ വാക്​സിൻ സർട്ടിഫിക്കറ്റിൽ മോദി ചിത്രം തെരഞ്ഞെടുപ്പ്​ ചട്ട ലംഘനമെന്ന്​ തൃണമൂൽ

കൊൽക്കത്ത: കോവിഡ്​ വാക്​സിൻ സ്വീകരിച്ചവർക്ക്​ ​േകന്ദ്ര ആരോഗ്യ മന്ത്രാലയത്തിന്‍റെ പേരിൽ നൽകുന്ന പ്രൊവിഷനൽ സർട്ടിഫിക്കറ്റിൽ പ്രധാനമന്ത്രിയുടെ ​ചിത്രം പതിക്കുന്നത്​ തെരഞ്ഞെടുപ്പ്​ ചട്ട ലംഘനമെന്ന്​ തൃണമൂൽ കോൺഗ്രസ്​. സ്വന്തം ചിത്രം പതിക്കുക വഴി അധികാര ദുർവിനിയോഗം മാത്രമല്ല, കോവിഡ്​ രക്ഷാ ദൗത്യത്തിൽ പങ്കാളികളായ മെഡിക്കൽ രംഗത്തുള്ളവരുടെയും മരുന്ന്​ വികസിപ്പിച്ച വിദഗ്​ധരുടെയും ക്രെഡിറ്റ്​ തട്ടിയെടുക്കുകയാണെന്നും രാജ്യസഭയിലെ തൃണമൂൽ നേതാവ്​ ഡെറക്​ ഒ​ബ്രിയൻ കുറ്റപ്പെടുത്തി.

നികുതി ദായകന്‍റെ ചെലവിൽ തെരഞ്ഞെടുപ്പിനിടെ അനാവശ്യ പ്രചാര വേലകൾ നടത്തുന്നത്​ ചട്ട ലംഘനമാണെന്നും തടയണമെന്നും തെരഞ്ഞെടുപ്പ്​ കമീഷന്​ അയച്ച കത്തിൽ തൃണമൂൽ ആവശ്യപ്പെട്ടു.

കോവിഡ്​ വാക്​സിൻ സ്വീകരിക്കുന്നവർക്ക്​ കേന്ദ്ര ആഭ്യന്തര മന്ത്രാലയത്തിന്‍റെതായി നൽകുന്ന സർട്ടിഫിക്കറ്റിൽ മോദിയുടെ ചിത്രവും സന്ദേശവും ഏറെയായി നിലവിലുണ്ടെന്ന്​ ബന്ധപ്പെട്ട കേന്ദ്രങ്ങൾ പറയുന്നു. പ്രാഥമിക ഘട്ടത്തിൽ വാക്​സിൻ സ്വീകരിച്ച ആരോഗ്യ പ്രവർത്തകരുൾപെടെയു്​ളളവർക്ക്​ ഇത്​ നൽകിയിരുന്നതായാണ്​ സൂചന.

ഫെബ്രുവരി 26നാണ്​​ കേരളം, ആസാം, പശ്​ചിമ ബംഗാൾ, കേരള, പുതുച്ചേരി, തമിഴ്​നാട്​ എന്നിവിടങ്ങളിൽ നിയമസഭ തെരഞ്ഞെടുപ്പ്​ പ്രഖ്യാപിച്ചത്​. ഇതിൽ തൃണമൂൽ ഭരിക്കുന്ന പശ്​ചിമ ബംഗാളിൽ ബി.ജെ.പി അധികാരം പിടിക്കാൻ ശക്​തമായ ശ്രമങ്ങൾ തുടരുകയാണ്​. ഇതിന്‍റെ ഭാഗമായാണ്​ ഈ നടപടി​യുമെന്ന്​ തൃണമൂൽ കുറ്റപ്പെടുത്തുന്നു.

ഡെറക്​ ഒബ്രിയൻ നൽകിയ കത്തിലെ വരികൾ ഇങ്ങനെ: ''തെരഞ്ഞെടുപ്പ്​ നടത്തിപ്പിനിടെ നികുതി ദായകരുടെ ചെലവിൽ പ്രധാനമന്ത്രി അവിഹിത നേട്ടമുണ്ടാക്കുന്നത്​ തടയണമെന്ന്​ ആവശ്യപ്പെടുന്നു. പെരുമാറ്റച്ചട്ടം പാർട്ട്​ ഏഴിലെ വകുപ്പിന്‍റെ ലംഘനമാണിത്​. കേന്ദ്രത്തിലോ സംസ്​ഥാനത്തോ അധികാരത്തിലിരിക്കുന്ന ഒരു കക്ഷിയും ഔദ്യോഗിക പദവി തെരഞ്ഞെടുപ്പ്​ പ്രചാരണത്തിനായി ദുരുപയോഗം നടത്തിയെന്ന പരാതിക്കിടയാക്കുന്ന ഒന്നും ചെയ്യരുത്​....''.