കോവിഡ് രോഗികൾ വർധിച്ചു; മാസ്ക് ധരിക്കാനും സാമൂഹിക അകലം പാലിക്കാനും അഭ്യർഥിച്ച് തമിഴ്നാട് ആരോഗ്യമന്ത്രി

ചെന്നൈ: കോവിഡ്​ കേസുകളുടെ എണ്ണത്തിൽ നേരിയ വർധനയുണ്ടായതോടെ അഭ്യർഥനയുമായി തമിഴ്നാട് ആരോഗ്യമന്ത്രി എം. സുബ്രഹ്മണ്യൻ. മാസ്ക് ധരിച്ചും സാമൂഹിക അകലം പാലിച്ചും കോവിഡ് പ്രോട്ടോകോൾ പാലിക്കണമെന്ന് എം. സുബ്രഹ്മണ്യൻ ജനങ്ങളോട്​ അഭ്യർത്ഥിച്ചു.

വെള്ളിയാഴ്ച ചെന്നൈ സൈദാപേട്ടയിൽ സംസ്ഥാനത്തെ 1,000 പനി ക്ലിനിക്കുകളുടെ ഉദ്ഘാടനം നിർവഹിച്ച ശേഷം മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം.

തമിഴ്‌നാട് ഉൾപ്പെടെ രാജ്യത്തുടനീളം കോവിഡ് ബാധിതരുടെ എണ്ണം വർധിക്കുന്നതായി ആരോഗ്യമന്ത്രി പറഞ്ഞു. കോവിഡ് കാലഘട്ടത്തിൽ ചെയ്തതുപോലെ പനിയും ജലദോഷവും ഉണ്ടെങ്കിൽ തനിച്ച്​ കഴിയണമെന്നും അദ്ദേഹം പറഞ്ഞു.