പ്രവർത്തകർ തിരിഞ്ഞുനോക്കിയില്ല; ബി.ജെ.പി നേതാവി​െൻറ മൃതദേഹം സംസ്​കരിച്ചത്​ തൃണമൂൽ കോൺഗ്രസുകാർ

കൊൽക്കത്ത: സ്വന്തം നേതാവ്​ മരിച്ചിട്ടും തിരിഞ്ഞുനോക്കാതെ ബി.ജെ.പി പ്രവർത്തകർ. ഒടുവിൽ മൃതദേഹം സംസ്​കരിക്കാനായി മുന്നോട്ടുവന്ന്​ തൃണമൂൽ കോൺഗ്രസുകാർ. കഴിഞ്ഞദിവസം പശ്ചിമ ബംഗാളിലെ ഈസ്റ്റ് ബർദ്വാൻ ജില്ലയിലാണ്​ സംഭവം. ബി.ജെ.പിയുടെ ബൂത്ത് പ്രസിഡൻറായിരുന്ന അനൂപ് ബാനർജി (60) ഹൃദയാഘാതത്തെ തുടർന്ന് വെള്ളിയാഴ്​ചയാണ്​ മരിക്കുന്നത്​. തുടർന്ന്​ ഇവരുടെ ഭാര്യ റീന സഹായത്തിനായി ബി.ജെ.പി പ്രവർത്തകരെ വിളിച്ചെങ്കിലും ആരും വീട്ടിലേക്ക്​ വന്നില്ല.

ഇതോടെ​ ഒരു രാത്രി മുഴുവൻ റീന ഭർത്താവി​െൻറ മൃതദേഹത്തോടൊപ്പം കഴിച്ചുകൂട്ടാൻ നിർബന്ധിതയായി. വീണ്ടും സഹായത്തിനായി ആവർത്തിച്ച്​ വിളിച്ചെങ്കിലും കോവിഡ്​ ഭീതി കാരണം ആരും വരാൻ തയാറായില്ല. സംഭവമറിഞ്ഞ്​ ശനിയാഴ്ച ഉച്ചയോടെ പ്രാദേശിക തൃണമൂൽ കോൺഗ്രസ്​ നേതാവ് ബുഡൂൺ ഷെയ്ക്ക് പാർട്ടി പ്രവർത്തകരോട്​ ​കുടുംബത്തെ സഹായിക്കാൻ നിർദേശിച്ചു. അവർ ബാനർജിയുടെ മൃതദേഹം കൊണ്ടുപോയി സംസ്‌കരിക്കുകയും ചെയ്​തു.

'ഉച്ചക്ക് ഒരു മണിയോടെയാണ് എ​െൻറ ഭർത്താവ് മരിച്ചത്. അദ്ദേഹത്തിന് കോവിഡ് ലക്ഷണങ്ങൾ ഒന്നുമുണ്ടായിരുന്നില്ല. ഹൃദയാഘാതത്തെ തുടർന്നാണ്​ അദ്ദേഹം മരിക്കുന്നത്​. നിയമസഭാ തെരഞ്ഞെടുപ്പിൽ പാർട്ടിക്ക് വേണ്ടി​ എ​െൻറ ഭർത്താവ്​ ഒരുപാട്​ കഠിനാധ്വാനം ചെയ്​തിരുന്നു.

അദ്ദേഹത്തി​െൻറ കൂടെയുണ്ടായിരുന്ന എല്ലാം ബി.ജെ.പി പ്രാദേശിക നേതാക്കളെയും പ്രവർത്തകരെയും ഞാൻ അറിയിച്ചു. തുടക്കത്തിൽ അവർ ഉടൻ വരുമെന്ന് പറഞ്ഞെങ്കിലും പിന്നെ ആരെയും കണ്ടില്ല. എ​െൻറ ഭർത്താവ് കോവിഡ് മൂലം മരിച്ചുവെന്ന അഭ്യൂഹവും ഞാൻ കേൾക്കാനിടയായി' ^അനൂപ് ബാനർജിയുടെ ഭാര്യ റീന പറഞ്ഞു.